Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami  |  September 2013

 TABA YA LETLAKALA LA KA NTLE: KE KA BAKA LA ENG TLAIŠEGO E ATILE GAKAAKAA? E TLA FELA NENG?

Go Fedišwa Maphelo a Batho ba Bantši Kudu Bao ba se Nago Molato!

Go Fedišwa Maphelo a Batho ba Bantši Kudu Bao ba se Nago Molato!

Noelle yo monyenyane e be e le ngwana yo a rategago yo a bego a rata go thala diswantšho. Mantšiboeng a mangwe a selemo o be a itshepelela jarateng ya gabo ka morago ga ntlo gomme gwa direga gore a wele ka letamong la go rutha. O ile a kgangwa ke meetse a šaletšwe ke dibeke tše pedi feela gore a fetše nywaga e mene.

Charlotte, Daniel, Olivia le Josephine . . . A ke a mangwe a maina a bana ba 20 ba nywaga e tshela goba e šupa gare ga batho ba 26 bao ba ilego ba bolawa ka go thunywa sekolong sa kua Connecticut, U.S.A., ka December 14, 2012. Tirelong ya poloko ya bona, Mopresidente Obama o ile a bitša maina a bana gomme a botša batho bao ba nyamilego bao ba bego ba le gona a re: “Masetlapelo a a swanetše go fela.”

Bano wa nywaga e 18 o hudugile Iraq ka 1996 le ba lapa labo ba yo dula Norway. Bagwera ba gagwe ba be ba mmitša ka leina la dikwero la Mahlasedi a Letšatši. Lega go le bjalo, ka manyami ka July 22, 2011, Bano e bile yo mongwe wa batho ba 77 bao ba ilego ba bolawa ke mofišegelathoko yo mongwe, yo a ilego a ikgantšha ka gore: “Ke kgopela tshwarelo . . . gore ga se ka kgona go bolaya ba bangwe ba bantši.”

Ditaba tša go swana le tšeo tše di garolago pelo di begilwe gantšintši lefaseng ka moka. Nagana ka manyami le bohloko tšeo di bakilwego ke dikotsi, bosenyi, ntwa, botšhošetši, dikotsi tša tlhago le masetlapelo a mangwe. Gantši go fedišwa maphelo a batho ba bantši kudu bao ba se nago molato e bile go ba le tlaišego e ntši kudu, ka ntle le lebaka!

Batho ba bangwe ba phara Modimo molato, ba bolela gore Mmopi wa rena ga a na taba le batho. Ba bangwe ba phetha ka gore Modimo o bona tlaišego ya rena eupša o fo kgetha go re lesa. Ba bangwe bona ba re masetlapelo a bjalo a rerilwe e sa le pele. Go bonagala go na le dikgopolo tše dintši kudu ka taba ye. Re ka hwetša kae dikarabo tše di ka botwago le tšeo di kgotsofatšago? Dihlogong tše di latelago, re tla hlahloba Lentšu la Modimo, Beibele, bakeng sa dikarabo mabapi le seo se bakago tlaišego le kamoo e tlago go fedišwa ka gona.