Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami  |  August 2013

Dipotšišo tša Beibele di a Arabja

Dipotšišo tša Beibele di a Arabja

Na Modimo o theetša dithapelo ka moka?

Modimo o theetša batho bao ba tšwago ditšhabeng ka moka. (Psalme 145:18, 19) Lentšu la gagwe e lego Beibele, le re kgothaletša go bolela le yena ka selo le ge le sefe seo se re tshwenyago. (Bafilipi 4:6, 7) Lega go le bjalo, dithapelo tše dingwe ga di thabiše Modimo. Ka mohlala, go boaboeletša dithapelo tšeo di swerwego ka hlogo ga go mo thabiše.—Bala Mateo 6:7.

Le gona, Jehofa ga a kgahlwe ke dithapelo tša batho bao ba hlokomologago molao wa gagwe ka boomo. (Diema 28:9) Ka mohlala, mehleng ya Beibele, Modimo o ile a gana go theetša dithapelo tša Baisiraele bao ba bego ba na le molato wa go bolaya. Go molaleng gore re swanetše go fihlelela dinyakwa tše itšego e le gore re kwewe ke Modimo.—Bala Jesaya 1:15.

Re swanetše go dira eng e le gore re kwewe ke Modimo?

Re ka se kgone go batamela Modimo ka thapelo ka ntle le tumelo. (Jakobo 1:5, 6) Re swanetše go kgodišega gore o gona e bile o na le taba le rena. Re ka matlafatša tumelo ya rena ka go ithuta Beibele ka gobane tumelo ya kgonthe e theilwe bohlatseng le dikgonthišetšong tšeo re di hwetšago ka Lentšung la Modimo.—Bala Baheberu 11:1, 6.

Re swanetše go rapela ka go botega le ka boikokobetšo. Gaešita le Morwa wa Modimo, Jesu, o be a ikokobeditše ge a be a rapela. (Luka 22:41, 42) Ka gona, go e na le go botša Modimo gore a dire eng, re swanetše go leka go kwešiša dinyakwa tša gagwe ka go bala Beibele. Ke moka re ka rapela ka go dumelelana le thato ya Modimo.—Bala 1 Johane 5:14.