Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI AUGUST 2013

 TABA YA LETLAKALA LA KA NTLE

Diswantšho tša Batho Bao ba sa Aparago—Na ga di Kotsi Goba na ke Mpholo?

Diswantšho tša Batho Bao ba sa Aparago—Na ga di Kotsi Goba na ke Mpholo?

Diswantšho tša batho bao ba sa aparago di tletše kudu lefaseng lehono. * Di ka hwetšwa dipapatšong, fešeneng, difiliming, mminong le dimakasineng gotee le thelebišeneng, dipapading tša dibidio, megalathekeng ya maemo yeo e bitšwago di-smartphone, didirišweng tša elektroniki, Diwepesaeteng gomme ga bjale di hwetšwa le ditirelong tša go abelana dinepe Inthaneteng. Go bonagala diswantšho tša batho bao ba sa aparago di tlwaelegile kudu bathong ba mehleng yeno. Batho ba bantši mafelong a mantši ba nwelela kudu diswantšhong tša batho bao ba sa aparago go feta le ge e le neng pele historing.—Bona lepokisi le le rego,  “Ditherešo Mabapi le Diswantšho tša Batho Bao ba sa Aparago.”

Mehuta ya diswantšho tša batho bao ba sa aparago le yona e a fetoga. Moprofesara Gail Dines o ngwala gore: “Diswantšho tša lehono di thomile go fetelela kudu mo e lego gore tšeo di bego di lebelelwa e le diswantšho tše di feteletšego tša batho bao ba sa aparago ga bjale di tšewa e le diswantšho tše di tlwaelegilego tša batho bao ba sa aparago.”

Wena o re’ng ka mekgwa e bjalo? Na diswantšho tša batho bao ba sa aparago ke ditlošabodutu tše di sego kotsi, mpholo o bolayago goba di fo ba magareng? Jesu o itše: “Sehlare se sengwe le se sengwe se sebotse se enywa dienywa tše dibotse, eupša sehlare se sengwe le se sengwe se se bodilego se enywa dienywa tše di hlokago mohola.” (Mateo 7:17) Diswantšho tša batho bao ba sa aparago di enywa dienywa tša mohuta mang? A re hwetšeng karabo ka go hlahloba dipotšišo tše itšego tša motheo tša mabapi le diswantšho tša batho bao ba sa aparago.

 Diswantšho tša batho bao ba sa aparago di kgoma batho bjang?

SEO DITSEBI DI SE BOLELAGO: Go bonolo kudu go lemalela diswantšho tša batho bao ba sa aparago, e bile banyakišiši ba bangwe le dingaka ba di swantšha le seokobatši seo se bitšwago cocaine yeo e sekišitšwego.

Brian, * yo a ilego a tanywa ke diswantšho tša batho bao ba sa aparago Inthaneteng o re: “Go be go se na seo se ka nthibelago. Ke be ke ikwa eka ke lefelwaneng le itšego la ditoro. Ke be ke thothomela moo ke bego ke feleletša ke opša ke hlogo. Go be go le thata go kgaotša, le ka morago ga nywaga e mentši ke be ke sa dutše ke di lemaletše.”

Batho bao ba lemalelago diswantšho tša batho bao ba sa aparago gantši ba uta mokgwa wa bona. Ba na le sephiri e bile ba na le maaka. Ga go makatše ge batho ba bantši bao ba tlaišwago ke mokgwa wo ba rata go ipea lekatana, ba lewa ke dihlong, ba dula ba tshwenyegile, ba eba le kgateletšego e bile ba galefa. Maemong a mangwe, ba ka feleletša ba eba le tshekamelo ya go nyaka go ipolaya. Serge, yo mo e ka bago letšatši le letšatši a bego a taoneloutela diswantšho tša batho bao ba sa aparago mogalathekeng wa gagwe, o re: “Ke be ke inyaka ke nnoši e bile ke tlaletšwe. Ke be ke ikwa ke se na mohola, ke na le letswalo le molato, ke lewa ke bodutu e bile ke kgakgetšwe. Ke be ke lewa ke dihlong kudu e bile ke tšhaba go kgopela thušo.”

Gaešita le go fo gaša mahlo ka motsotswana diswantšhong tša batho bao ba sa aparago goba go di bona ka phošo go ka ba le tutuetšo e mpe. Ge Ngaka Judith Reisman, yo e lego monyakišiši yo mogolo ditabeng tša diswantšho tša batho bao ba sa aparago a be a nea bohlatse pele ga komiti ya Senate ya United States, o itše: “Diswantšho tša batho bao ba sa aparago di gatišega bjokong gomme tša bo fetoša, tša dira gore motho a dule a di gopola ka go fo itlela feela a sa itebetše ka baka la dikhemikhale tšeo di lego monaganong wa gagwe [gomme] go thata goba ga go kgonege go di phumola.” Susan wa nywaga e 19, yo a ilego a tsena Diwepesaeteng tša diswantšho tša batho bao ba sa aparago, o re: “Diswantšho tšeo di gatišegile monaganong wa ka. Di fo tla ke sa itebetše. Ke ikwa eka nka se tsoge ke kgonne go di phumola ka mo go feletšego.”

THEREŠO E SA FETOGEGO: Diswantšho tša batho bao ba sa aparago di dira bao ba di bogelago makgoba e bile di a ba senya.—2 Petro 2:19.

Diswantšho tša batho bao ba sa aparago di kgoma malapa bjang?

SEO DITSEBI DI SE BOLELAGO: “Diswantšho tša batho bao ba sa aparago di aroganya banyalani le malapa.”—The Porn Trap, ka Wendy le Larry Maltz.

Diswantšho tša batho bao ba sa aparago di senya manyalo le malapa

  • Ka go dira gore banyalani ba se sa botana, ba se sa ba le tswalano ya kgauswi le go se sa ratana.—Diema 2:12-17.

  • Ka go kgothaletša moya wa boithati, go se be le taba le molekane wa gago le go se kgotsofatšwe ke yena.—Baefeso 5:28, 29.

  • Ka go gakatša dikakanyo tše di sa hlwekago tša thobalano le dikganyogo.—2 Petro 2:14.

  • Ka go goketša bao ba di bogelago gore ba gapeletše balekane ba bona go ba le thobalano ka tsela e sa amogelegego.—Baefeso 5:3, 4.

  • Ka go kgothaletša go se botegelane maikwelong le ka tsela ya kgonthe.—Mateo 5:28.

Beibele e botša banyalani gore ba se ke ‘ba radiana.’ (Maleaki 2:16) Go se botegelane ke mohuta wa boradia wo o ka hlafišago boemo lenyalong gomme wa baka karogano  le tlhalo. Ka morago, dikarogano tše bjalo di ka gobatša bana ba lenyalong leo.

Le gona, diswantšho tša batho bao ba sa aparago di ka senya bana ka go lebanya. Brian, yo go boletšwego ka yena pejana, o re: “Ge ke be ke na le nywaga e ka bago e lesome, ke ile ka wela dimakasine tša tate tša diswantšho tša batho bao ba sa aparago ge re be re bapala papadi ya go khutelana. Ke ile ka thoma go di bogela ka sephiring, le ge ke be ke sa nape ke kwešiša gore ke be ke gogelwa ke eng diswantšhong tše bjalo. Ke moo go ilego gwa thoma mokgwa wo o senyago wo ke bilego le wona go fihlela ke le yo mogolo.” Dinyakišišo di bontšha gore diswantšho tša batho bao ba sa aparago di ka dira gore bafsa bao ba lego mahlalagading ba be le thobalano e sa le ba banyenyane le go ba le yona le batho ba bantši, e be ba šoro ditabeng tša thobalano le ba sa tsepamago maikwelong le monaganong.

THEREŠO E SA FETOGEGO: Diswantšho tša batho bao ba sa aparago di fetoga mpholo ditswalanong tše lerato gomme di feleletša ka manyami le bohloko.—Diema 6:27.

 Beibele e re’ng ka diswantšho tša batho bao ba sa aparago?

LENTŠU LA MODIMO LE RE: “Ka gona bolayang mekgwa . . . yeo e lego dithong tša mebele ya lena, e lego bootswa, go se hlweke, kganyogo e fošagetšego ya go robala ga monna le mosadi, kganyogo e gobatšago le megabaru, e lego borapedi bja medimo ya diswantšho.”—Bakolose 3:5.

Ge re bea taba phaa, re ka re Jehofa * Modimo o hloile diswantšho tša batho bao ba sa aparago. Ga se ka gobane a tšhošwa ke thobalano. Ke yena a dirilego gore re be le kganyogo ya thobalano ka morero wa gore banyalani ba e dirišetše go thabišana, go batamelana maikwelong le go tšea karolo mohlolong wa go tliša bana lefaseng.—Jakobo 1:17.

Eupša ke ka baka la’ng re re Jehofa o hloile kudu diswantšho tša batho bao ba sa aparago? Ela hloko mabaka a sego kae feela.

  • O a tseba gore diswantšho tša batho bao ba sa aparago di ka senya maphelo.—Baefeso 4:17-19.

  • O a re rata e bile o nyaka go re šireletša gore re se ke ra gobala.—Jesaya 48:17, 18.

  • Jehofa o nyaka go šireletša manyalo le malapa.—Mateo 19:4-6.

  • O nyaka gore re hlweke boitshwarong le go hlompha ditshwanelo tša ba bangwe.—1 Bathesalonika 4:3-6.

  • O nyaka gore re hlomphe matla a rena a go kgona go ikatiša gomme re a diriše ka tsela e hlomphegago.—Baheberu 13:4.

  • Jehofa o a tseba gore diswantšho tša batho bao ba sa aparago di bontšha pono e kgopamego, ya boithati le ya bosathane mabapi le thobalano.—Genesi 6:2; Juda 6, 7.

THEREŠO E SA FETOGEGO: Diswantšho tša batho bao ba sa aparago di senya segwera sa motho le Modimo.—Baroma 1:24.

Lega go le bjalo, Jehofa o šokela kudu bao ba nyakago go tšwa molabeng wa diswantšho tša batho bao ba sa aparago. Beibele e re: “Jehofa o a gaugela e bile o a šokela, o diega go galefa e bile o tletše botho. Gobane yena o tseba gabotse kamoo re bopegilego ka gona, a gopola gore re lerole.” (Psalme 103:8, 14) O laletša bao ba ikokobeditšego gore ba retologele go yena gore ba “hwetše kgaugelo gotee le botho bjoo e le gore [ba] thušwe ka nako e swanetšego.”—Baheberu 4:16; bona lepokisi le le rego,  “Go Kgaotša go Bogela Diswantšho tša Batho Bao ba sa Aparago.”

Batho ba bantši kudu ba ile ba amogela thušo ya Modimo. Na thušo ya gagwe e a hola? Ela hloko seo Beibele e se bolelago ka ba bangwe ba bao ba ilego ba fenya mekgwa e mebe ge e re: “Le hlatswitšwe la hlweka, . . . le kgethagaditšwe, . . . go boletšwe gore le lokile leineng la Morena wa rena Jesu Kriste le ka moya wa Modimo wa rena.” (1 Bakorinthe 6:11) Batho ba bjalo ba ka bolela go swana le moapostola Paulo ba re: “Dilong tšohle ke na le matla ka baka la yo a mphago matla.”—Bafilipi 4:13.

Susan, yo a ilego a fenya mokgwa wa gagwe wa go lemalela diswantšho tša batho bao ba sa aparago o re: “Jehofa ke yena feela a ka go thušago go boela sekeng. Ge o ka mo kgopela thušo le tlhahlo, o ka boela wa hlweka pele ga gagwe. A ka se go nyamiše.”

^ ser. 3 Polelwana e rego “diswantšho tša batho bao ba sa aparago” e šupa dilong tšeo di pepentšhago thobalano tšeo di reretšwego go tsoša kganyogo ya yo a di bogetšego, a balago ka tšona goba a theeditšego ge go bolelwa ka tšona. Di ka akaretša dinepe, dilo tše di ngwadilwego le dilo tše di theetšwago.

^ ser. 8 Maina sehlogong se a fetotšwe.

^ ser. 25 Jehofa ke leina la Modimo bjalo ka ge le utolotšwe ka Beibeleng.

Ithute ka mo go oketšegilego

O ka Ganetša Teko!

O ka thušwa ke megato e meraro gore o be le boikemišetšo.