Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI AUGUST 2013

 BABADI BA RENA BA A BOTŠIŠA . . .

Ke ka Baka la Eng Baanegwa ba Bangwe ba ka Beibeleng ba sa Bitšwe ka Maina?

Ke ka Baka la Eng Baanegwa ba Bangwe ba ka Beibeleng ba sa Bitšwe ka Maina?

Ka pukung ya Beibele ya Ruthe, monna yo a ilego a gana go phetha boikarabelo bja gagwe go ya ka Molao wa Moshe o fo bitšwa Semangmang. (Ruthe 4:1-12) Na re swanetše go phetha ka gore baanegwa ka moka ba ka Beibeleng bao ba sa bitšwego ka maina ba be ba tsebja ka mekgwa e mebe goba ba se bohlokwa gakaalo gore ba ka bitšwa ka maina?

Aowa. Ela hloko mohlala o mongwe. Ge Jesu a be a lokišetša Selalelo sa gagwe sa mafelelo, o ile a botša barutiwa ba gagwe gore ba “[ye] motseng go motho tsoko [“monna yo mongwe,” The New English Bible]” gomme ba lokišetše dilo ga gagwe. (Mateo 26:18) Na re swanetše go nagana gore motho yo a bitšwago “motho tsoko” temaneng ye e be e le motho yo mobe goba o be a se bohlokwa gakaalo go ka bitšwa ka leina? Le gatee; ga go pelaelo gore “monna yo mongwe” yo go bolelwago ka yena mo e be e le morutiwa wa Jesu. Ka ge go be go se bohlokwa gore go bolelwe ka leina la gagwe pegong ye, ga se la bolelwa.

Go feta moo, pego ya Beibele e na le maina a mantši a batho ba babe; e bile e na le mehlala ya batho ba bantši ba botegago bao ba sa bitšwego ka maina. Ka mohlala, leina la Efa, e lego mosadi wa pele, le tsebja kudu. Lega go le bjalo, boithati le go se kwe ga gagwe di kgathile tema sebeng sa Adama, seo se re lobišitšego kudu. (Baroma 5:12) Go fapana le seo, mosadi wa Noa ga a bitšwe ka leina ka Mangwalong, eupša re thušitšwe kudu ke moya wa gagwe wa go hloka boithati le wa go kwa go thekgeng monna wa gagwe ge a be a dira modiro o bohlokwa. Go molaleng gore go se bolelwe ga leina la gagwe ga go bontšhe gore o be a se bohlokwa goba a sa amogelwe ke Modimo.

Pegong ya Beibele go na le batho ba bangwe bao ba sa bitšwego ka maina bao ba kgathilego tema e bohlokwa—gaešita le ya go bontšha sebete—morerong wa Jehofa. Nagana ka ngwanenyana yo monyenyane wa Moisiraele yo e bego e le mohlanka ntlong ya Naamane, molaodi wa madira a Siria. Ka sebete o ile a botša mong wa gagwe, mosadi wa Naamane, ka moporofeta wa Jehofa wa kua Isiraele. Se se ile sa lebiša mohlolong o mogolo. (2 Dikgoši 5:1-14) Morwedi wa moahlodi wa Moisiraele e lego Jefeta le yena o ile a bea mohlala o mobotse kudu wa tumelo. O ile a gafa ka go rata tebelelo ya go ka nyalwa le go ba le bana e le gore a phethagatše keno yeo tatagwe a bego a e dirile. (Baahlodi 11:30-40) Ka mo go swanago, go na le bangwadi ba dipsalme tša ka godimo ga tše 40 bao ba sa bitšwego ka maina gotee le baporofeta bao ba sa bitšwego ka maina bao ba ilego ba phetha dikabelo tša bona tše bohlokwa ka go botega.—1 Dikgoši 20:37-43.

Mohlomongwe mohlala o kgahlišago kudu ke wa barongwa ba botegago. Go na le barongwa ba dimilione tše makgolo, eupša ke ba babedi feela bao ba bitšwago ka maina ka Beibeleng, e lego Gabariele le Mikaele. (Daniele 7:10; Luka 1:19; Juda 9) Ba bangwe ka moka ga ba bitšwe ka maina ka Beibeleng. Ka mohlala, Manoa, tatago Simisone, o ile a botšiša morongwa a re: “Leina la gago o mang gore re tle re go godiše ge mantšu a gago a phethega?” Morongwa o ile a re’ng? O ile a re: “Ke ka baka la’ng o mpotšiša leina la ka?” Ka boipoetšo, morongwa yoo o ile a gana go fiwa kgodišo yeo e bego e swanetše go fiwa Modimo feela.—Baahlodi 13:17, 18.

Ga se ka mehla Beibele e hlalosago lebaka leo ka lona batho ba bangwe ba bitšwago ka maina mola ba bangwe ba sa bitšwe ka ona. Eupša re ka ithuta mo gontši bathong ba botegago bao ba ilego ba hlankela Modimo ba se na taba le go tuma.