Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami  |  July 2013

 BATAMELA KGAUSWI LE MODIMO

O Khoriša ‘Dipelo tša Rena ka mo go Feletšego’

O Khoriša ‘Dipelo tša Rena ka mo go Feletšego’

Na Jehofa ruri o na le taba le rena, goba na o hlokomologa mathata a batho lefaseng le? Karabo ya Beibele mabapi le potšišo yeo e a re homotša. Modimo ruri o na le taba le batho, gomme o nyaka re thabela bophelo. Letšatši le letšatši o dumelela batho—gaešita le bao ba tlogago ba sa mo leboge—gore ba holwe ke botho bja gagwe bjo bogolo. Ela hloko mantšu a moapostola Paulo.—Bala Ditiro 14:16, 17.

Ge Paulo a be a bolela le batho ba motse wa Lisitara bao e bego e se barapedi ba Modimo, o ile a re: “Melokong e fetilego [Modimo] o ile a dumelela ditšhaba ka moka gore di sepele ka ditsela tša tšona, gaešita le ge ruri a ile a se lese go nea bohlatse ka dilo tše botse tše a di dirilego, ka go le nea dipula go tšwa legodimong le dihla tše di enywago, a khoriša dipelo tša lena ka mo go feletšego ka dijo le lethabo.” Mantšu ao a be a bolela’ng go batheetši ba Paulo?

Go be go le bonolo gore batho ba Lisitara ba kwešiše therešo ya mantšu a Paulo. Bona e be e le karolo ya setšhaba sa temo gomme ba phela tikologong ya mobu o nonnego le yeo e nago le meetse a mantši. Eupša, bjalo ka ge Paulo a ile a ba gopotša, Modimo ke yena Mothopo wa pula le dihla tše enywago. Ka gona, ka mehla ge ba be ba hwetša puno e ntši gomme ba thabela dijo tše bose, ba be ba holwa ke botho bja Modimo.

Mantšu ao Paulo a a boditšego batho ba Lisitara a re ruta dithuto tše mmalwa tše bohlokwa ka Jehofa Modimo.

Jehofa o re nea tokologo ya go ikgethela. Ela hloko gore Jehofa o ile a dumelela ditšhaba tša Bantle “gore di sepele ka ditsela tša tšona.” Puku e nngwe ya ditšhupetšo ya bafetoledi ba Beibele e bolela gore polelwana ye e ka ra gore, “go sepela ka tsela yeo ba e ratago” goba “go dira ka tsela yeo bona ba bego ba nagana gore e lokile.” Jehofa ga a gapeletše motho le ge e le ofe gore a mo rapele. O re neile tokologo ya go ikgethela—bokgoni bja go ikgethela gore re tla phela bjang.—Doiteronomio 30:19.

Jehofa o nyaka gore re mo tsebe. Paulo o hlalositše gore Modimo ga se “a lese go nea bohlatse.” Puku ya ditšhupetšo yeo go boletšwego ka yona pejana e bolela gore polelwana ye e ka fetolelwa ka gore, “o bontšhitše batho gabotse gore ke Modimo wa mohuta mang.” Tlholo ya Modimo e nea bohlatse bjo bo bonagalago ka “dika tša gagwe tše di sa bonagalego,” go akaretša go loka, bohlale, matla le lerato. (Baroma 1:20) Jehofa o utolotše mo gontši kudu ka yena ka Beibeleng. (2 Timotheo 3:16, 17) Na ga se mo go kwagalago gore o nyaka re mo tseba?

Letšatši le letšatši o dumelela batho—gaešita le bao ba tlogago ba sa mo leboge—gore ba holwe ke botho bja gagwe bjo bogolo

Jehofa o nyaka gore re thabe. Paulo o boletše gore Modimo o khoriša ‘dipelo tša rena ka mo go feletšego ka dijo le lethabo.’ Gaešita le modiradibe yo a sa dumelego go Jehofa o kgona go ja dijo a kgotsofala gomme a thaba ka tekanyo e itšego bophelong. Lega go le bjalo, Modimo o nyaka re eba le lethabo la kgonthe le leo le swarelelago. Seo se a kgonega ge feela re ithuta therešo ka yena gomme re e diriša maphelong a rena.—Psalme 144:15; Mateo 5:3.

Ka moka re holwa ke botho bja Jehofa ka mehla. Ke ka baka la’ng o sa ithute ka mo go oketšegilego mabapi le kamoo o ka lebogago Modimo yo a khorišago pelo ya gago “ka mo go feletšego ka dijo le lethabo”?

Mmalo wa Beibele o šišintšwego bakeng sa July

Ditiro 11–28