Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami  |  July 2013

 BEIBELE E FETOŠA MAPHELO

“Ga ke sa Ikwa Eka ke Swanetše go Fetoša Lefase”

“Ga ke sa Ikwa Eka ke Swanetše go Fetoša Lefase”
  • NGWAGA WA MATSWALO: 1966

  • NAGA: FINLAND

  • BOPHELO BJA PELE E EBA MOKRISTE: MOTHO YO A FIŠEGELAGO TŠA LEAGO

BOPHELO BJA KA BJA NAKONG E FETILEGO:

Ke ratile tlhago go tloga bjaneng. Gantši lapa lešo le be le intšhetša dithokgweng tše kgahlišago le matsheng a mabotse ao a bego a dikologile toropo ya gešo ya Jyväskylä, e lego Bogareng bja Finland. Gape ke rata diphoofolo. Ge ke be ke sa le ngwana, ke be ke nyaka go gokarela katse le mpša e nngwe le nngwe yeo ke bego ke e bona! Ge ke gola, ke ile ka tshwenywa ke tsela yeo gantši batho ba tlaišago diphoofolo. Ge nako e dutše e eya, ke ile ka ba setho sa mokgatlo wa ditshwanelo tša diphoofolo, moo ke kopanego le batho ba go swana le nna.

Re be re dula re etšwa masolo a go lwela ditshwanelo tša diphoofolo. Re be re phatlalatša tsebišo le go rulaganya megwanto gotee le megwanto ya boipelaetšo kgahlanong le mabenkele a go rekiša boya le dilaporatori tša go hlahloba diphoofolo. Re ile ra ba ra thoma mokgatlo o mofsa wa go šireletša diphoofolo. Ka ge re be re gatile megato e feteletšego ya go leka go tšwetša pele merero ya rena, gantši re be re elwa le bahlankedi ba mmušo. Ke ile ka golegwa le go išwa kgorong ya tsheko gantši.

Go tlaleletša go tshwenyegeng ga ka ka diphoofolo, ke be ke tshwenywa ke mathata a mangwe go dikologa lefase. Mafelelong, ke ile ka dirišana le mekgatlo e mmalwa, go akaretša Amnesty International le Greenpeace. Ke ile ka thekga mediro ya bona ka matla a ka ka moka. Ke ile ka emelela ditshwanelo tša badiidi, bao ba bolawago ke tlala le batho ba bangwe ba tlasana.

Lega go le bjalo, ganyenyane-ganyenyane ke ile ka lemoga gore nka se fetoše lefase. Le ge e le gore mekgatlo yeo e ile ya lokiša mathata a mangwe a manyenyane, go be go bonagala mathata a magolo a mpefala le go feta. Go be go le bjalo ka ge eka bobe bo be bo tletše lefase ka moka gomme go se na yo a nago le taba le seo. Ke be ke ikwa ke feletšwe ke matla.

KAMOO BEIBELE E FETOTŠEGO BOPHELO BJA KA:

Ke ile ka thoma go nagana ka Modimo le Beibele, ka ge ke be ke nyamišitšwe  ke go palelwa ga ka. Ke be nkile ka ithuta Beibele le Dihlatse tša Jehofa. Le ge ke be ke rata gore Dihlatse di be di le botho e bile di nkgahlegela, ke be ke se ka tšwa ke nyaka go fetoša bophelo bja ka. Ga bjale, dilo di be di fetogile.

Ke ile ka tšea Beibele ya ka gomme ka thoma go e bala. E ile ya nkhomotša kudu. Ke ile ka lemoga ditemana tše dintši tša Beibele tšeo di re rutago gore re sware diphoofolo ka botho. Ka mohlala, Diema 12:10 e re “batho ba lokilego ba hlokomela diphoofolo tša bona.” (Good News Translation) Ke ile ka ithuta le gore Modimo ga se yena a bakago mathata a lefase. Go e na le moo, mathata a rena a mpefetše ka ge batho ba bantši ba sa latele tlhahlo ya gagwe. Ke ile ka kgongwa kudu ke go ithuta ka lerato la Jehofa le go se fele pelo ga gagwe.—Psalme 103:8-14.

Nakong yona yeo, ke ile ka hwetša setlankana sa mabapi le puku ya Ke Eng Seo ge e le Gabotse Beibele e se Rutago? gomme ka se romela. Go se go ye kae, banyalani bao e lego Dihlatse ba ile ba kokota mojakong wa ka gomme ba ithaopela go ithuta Beibele le nna, gomme ka dumela. Le gona ke ile ka thoma go ya dibokeng tša Bokriste Holong ya Mmušo. Mafelelong, ke ile ka thoma go rata seo ke bego ke ithuta sona ka Beibeleng.

Ka thušo ya Beibele, ke ile ka kgona go dira diphetogo tše dintši. Ke tlogetše go kgoga le go nwa kudu. Ke fetošitše ponagalo ya ka le tsela ya ka ya go bolela. Le gona ke ile ka fetoša pono ya ka ka babuši ba lefase. (Baroma 13:1) Ke ile ka ba ka tlogela le go phela ka tsela e gobogilego, e lego karolo yeo ke bego ke tloga ke se na boitshwaro go yona.

Seo se ilego sa nthatafalela kudu e bile go ba le pono e swanetšego ka mekgatlo ya tša leago. Seo ga se sa direga ka bošego bjo tee. Mathomong, ke be ke ikwa eka ke a rabela ge ke tlogela mekgatlo yeo. Lega go le bjalo, mafelelong ke ile ka lemoga gore Mmušo wa Modimo ke wona kholofelo e nnoši ya kgonthe bakeng sa lefase. Ke ile ka dira phetho ya go diriša matla a ka ka moka go thekgeng Mmušo woo le go thuša ba bangwe go ithuta ka wona.—Mateo 6:33.

KAMOO KE ILEGO KA HOLEGA KA GONA:

Ka ge ke be ke le motho yo a fišegelago tša leago, ke be ke arola batho ka dihlopha tše pedi—e ka ba ba lokilego goba ba babe—le gona ke be ke ikemišeditše go lwa le bao ke ba tšeago e le ba babe. Ka thušo ya Beibele, ga ke sa hloile batho ba bangwe. Go e na le moo, ke leka go hlagolela lerato la Bokriste go batho ka moka. (Mateo 5:44) Tsela e nngwe ya go bontšha lerato le ke ka go abelana ditaba tše dibotse tša Mmušo wa Modimo le ba bangwe. Ke thabela go bona kamoo modiro wo o mobotse o tlišago khutšo le lethabo le go nea batho kholofelo ya kgonthe.

Ke hweditše khutšo ya monagano ka go tlogelela dilo diatleng tša Jehofa. Ka ge e le Mmopi, ke kgodišegile gore a ka se dumelele go tlaišwa ga sa ruri ga diphoofolo le batho goba a dumelela lefase le lebotse le senywa. Go fapana le seo, ka Mmušo wa gagwe, kgauswinyane o tla lokiša tshenyo ka moka yeo e dirilwego. (Jesaya 11:1-9) Ga ke thabišwe feela ke go tseba ditherešo tše eupša ke thabišwa le ke go thuša ba bangwe gore ba dumele go tšona. Ga ke sa ikwa eka ke swanetše go fetoša lefase.