Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI JULY 2013

Na o ka Bota Bodumedi Tabeng ya Tšhelete?

Na o ka Bota Bodumedi Tabeng ya Tšhelete?

Estelle * ka mehla o be a eya kerekeng le bana ba gagwe ba mmalwa. O re: “Ke ile ka botša moruti wa ka gore ke nyaka go ithuta Beibele.” Eupša moruti wa gagwe ga se a ka a mo ruta yona. Mafelelong, o ile a kgaotša go ya kerekeng. O tšwela pele ka gore: “Bahlankedi ba kereke ba ile ba ngwala lengwalo gomme ba fo re ge e ba ke sa kgone go ba gona, ke fo romela tšhelete. Ke ile ka nagana gore, ‘Ga ba na taba le gore ke ya kerekeng; ba fo nyaka tšhelete ya ka.’”

Angelina, yo e bego e dutše e le motho wa bodumedi, o itše: “Kerekeng yeo ke bego ke e tsena, ba be ba fetiša serotwana gararo tirelong e nngwe le e nngwe ya borapedi, gomme go be go letetšwe gore re ntšhe tšhelete dinakong tšeo ka moka. Ba be ba dula ba kgopela tšhelete. Ke ile ka ipotša gore, ‘Ga ba na moya wa Modimo.’”

Na madumedi a tikologong ya geno a hwetša tšhelete ka go gapeletša batho go neela goba ka go ba hlalefetša? Na seo se dumelelana le Beibele?

KE ENG SEO BEIBELE E SE RUTAGO?

Jesu, mothomi wa Bokriste, o itše: “Le amogetše feela, neang feela.” (Mateo 10:8) Molaetša wa Beibele o ka se rekwe ka tšhelete gomme o swanetše go hwetšwa ke batho ka moka bao ba o nyakago.

Bakriste ba pele ba be ba hlokomela bjang ditshenyagalelo tša phuthego?

Yo mongwe le yo mongwe o be a neela “feela kamoo a phethilego ka gona pelong ya gagwe, e sego ka go kgokgona goba ka go gapeletšwa, gobane Modimo o rata monei yo a neago ka go hlalala.” (2 Bakorinthe 9:7) Moapostola Paulo o itše: “Re be re šoma bošego le mosegare e le gore re se ke ra rweša le ge e le ofe wa lena morwalo o boima ge re be re le botša ditaba tše dibotse.” (1 Bathesalonika 2:9) Paulo o be a dira ditente gore a itlhokomele bodireding bja gagwe.—Ditiro 18:2, 3.

DIHLATSE TŠA JEHOFA DI FIHLELELA BJANG SEO?

Dihlatse tša Jehofa gantši di kopanela meagong yeo e sa bitšego kudu yeo e bitšwago Diholo tša Mmušo. Ditshenyagalelo di lefelelwa bjang? Dihlatse ga di ke di fetiša dipoleite tša koleke, e bile ga di romele dienfelopo bakeng sa go kgopela meneelo. Go e na le moo, motho le ge e le ofe yo a tšeelago godimo lenaneo la dilo tša moya a ka tsenya moneelo ka bohlale lepokising la meneelo Holong ya Mmušo.

Bodumedi bo swanetše go thekgwa bjang ka tša ditšhelete?

Ga go pelaelo gore go gatiša makasine wo le go o romela go bitša tšhelete. Lega go le bjalo, le ka mohla o ka se bone o bapatšwa go tša thekišo goba o rekišwa. Go gatelelwa kudu taba ya go phatlalatša therešo ya Beibele.

O nagana’ng: Na tsela ye ya go lefelela ditshenyagalelo e dumelelana le mantšu a Jesu le mohlala wa Bakriste ba pele?

^ ser. 2 Maina a mangwe lelokelelong le la dihlogo a fetotšwe.