Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI JUNE 2013

Na re Swanetše go Rapela Bakgethwa?

Na re Swanetše go Rapela Bakgethwa?

BATHO ba bantši ba ile ba lebeletšana le matshwenyego bophelong gomme ba ikwa ba nyaka thušo ya motho yo mongwe. Go ithekgile ka seo se re bakelago matshwenyego, mohlomongwe re tla kgetha mogwera yo a nago le kwelobohloko le yo a nago le phihlelo ka bothata bjo re lebeletšanego le bjona. Mogwera yo a nago le kwelobohloko e bile a na le phihlelo e ba yo a rategago kudu.

Ba bangwe ba ka ikwa ka tsela e swanago tabeng ya thapelo. Go e na le go batamela Modimo—yo a ka bonagalago a ba phagametše le yo ba mmoifago—ba ikwa ba lokologa go batamela yo mongwe wa bakgethwa. Ba nea mabaka ka gore ka ge bakgethwa ba ile ba lebeletšana le diteko le mathata ao a tlwaelegilego bathong, ba tla ba le kwelobohloko kudu. Ka mohlala, batho bao ba lahlegetšwego ke selo se bohlokwa kudu go bona ba ka kgetha go batamela yo go thwego ke Mokgethwa Anthony wa Padua, yo e lego moemedi wa kgale wa dilo tšeo di lahlegilego le tšeo di utswitšwego. Ge e ba ba rapelela phoofolo yeo e babjago, ba ka kgetha yo go thwego ke Mokgethwa Francis wa Assisi goba yo a bitšwago Mokgethwa Jude Thaddeus ge ba ikwa ba itlhobogile.

Lega go le bjalo, re ka kgodišega bjang gore go rapela bakgethwa ke tsela yeo e swanetšego go ya ka Mangwalo? Ka ge re boledišana le Modimo ka dithapelo tša rena, ruri re nyaka go tseba gore: Na Modimo o kwa dithapelo tša rena? Ka gona, na ga ra swanela go ipotšiša gore: Modimo o ikwa bjang ka go rapela bakgethwa?

PONO YA MANGWALO KA GO RAPELA BAKGWETHWA

Go rapela bakgethwa go ithekgile ka thuto ya go rapelelwa ke bakgethwa, yeo e rutwago ke Kereke ya Katholika. Go ya ka New Catholic Encyclopedia, kgopolo ya motheo ya thuto yeo ke “go kgopelelwa ga motho yo mongwe kgaugelo ke motho yoo Modimo a mmonago a na le tshwanelo ya go dira bjalo”. Ka gona, motho yo a rapelago bakgethwa o dira bjalo a holofetše gore ka bona o tla gaugelwa ka tsela e kgethegilego ka ge ba amogelwa ke Modimo.

Na Beibele e ruta thuto e bjalo? Ba bangwe ba re moapostola Paulo ke yena a theilego motheo wa go rapela bakgethwa mangwalong a gagwe. Ka mohlala, o ngwaletše Bakriste ba Roma ka gore: “Bjale bana bešo, ke le kgothatša ka Morena wa rena Jesu Kriste le ka lerato leo moya o mokgethwa o le tšweletšago gore le katane le nna dithapelong tša go nthapelela go Modimo.” (Baroma 15:30) Na Paulo o be a kgopela Bakristegotee le yena gore ba iše dithapelo tša gagwe go Modimo? Ruri ga go bjalo. Go e na le moo, e be e ka ba bona ba kgopelago Paulo, moapostola wa Kriste, gore a ba išetše dithapelo go Modimo. Paulo o be a bontšha gore ga se phošo go kgopela Mokristegotee le rena gore a re bee dithapelong. Eupša go fapane ka mo go feletšego le go rapela motho yoo go dumelwago gore o legodimong gore a tsebiše Modimo dikgopelo tša rena. Ka baka la’ng?

Ebangeding ya moapostola Johane, Jesu o re: “Ke  nna tsela le therešo le bophelo. Ga go yo a tlago go Tate ge e se ka nna.” (Johane 14:6) E bile o re: “Tate o tla le nea selo le ge e le sefe seo le mo kgopelago sona ka leina la ka.” (Johane 15:16, The New Jerusalem Bible) Jesu o be a sa bolele gore re swanetše go lebiša dithapelo tša rena go yena le gore o tla re bolelela le Modimo. Go e na le moo, gore dithapelo tša rena di kwewe, re swanetše go di lebiša go Modimo leineng la Jesu e sego leineng la motho yo mongwe.

Ge barutiwa ba Jesu ba be ba mo kgopela gore a ba rute go rapela, Jesu o ile a re: “Neng le neng ge le rapela le re: ‘Tate, leina la gago a le kgethagatšwe.” (Luka 11:2) Ee, “neng le neng,” goba nako le nako ge re rapela, ga se ra swanela go lebiša dithapelo go Jesu goba motho le ge e le ofe, eupša re di lebiše go Modimo ka boyena. Go ya ka dithuto tše tšeo di kwagalago tša Jesu, na ga se mo go kwagalago go phetha ka gore dithapelo tša rena di swanetše go lebišwa go Modimo leineng la Jesu Kriste, e sego go baemedi goba bao go thwego ke bakgethwa?

Thapelo ke karolo ya bohlokwa ya borapedi bja rena, ka gona go rapela motho le ge e le ofe go e na le Modimo ga go dumelelane le thuto ya Beibele ka mo go feletšego. (Johane 4:23, 24; Kutollo 19:9, 10) Ke ka baka leo re swanetšego go lebiša dithapelo tša rena go Modimo feela.

NA O SWANETŠE GO BOIFA GO BATAMELA MODIMO?

Thutong ya gagwe ya thabeng, Jesu o ile a nea mohlala ka ngwana yo a kgopelago tatagwe dijo. Na tate o tla nea ngwana wa gagwe leswika go e na le senkgwa? Goba na o tla mo nea noga e nago le mpholo go e na le hlapi? (Mateo 7:9, 10) E tla be e le go hloka tlhaologanyo gore motswadi yo lerato a dire selo sa mohuta woo!

Modimo o nyaka re boledišana le yena go swana le tate yo lerato le ngwana wa gagwe

Nagana ka mohlala wo o swanago go ya ka pono ya motswadi. Akanya ngwana wa gago a na le selo seo a nyakago go go kgopela sona go tšwa pelong. O šetše o hlagoletše tswalano e botse le yena ka šedi, gomme o be a dutše a kgona go go batamela ka dinako tšohle. Lega go le bjalo, ka baka la ge a go tšhaba ntle le lebaka, o romeletša motho yo mongwe gore a mo kgopelele selo seo go wena. O be o tla ikwa bjang? Go thwe’ng ge e ba a dula a boledišana le wena ka go romeletša motho yoo gomme a bontšha gore o ikemišeditše go tšwela pele a dira seo? Na o be o tla thabela seo? Ruri ga go bjalo! Batswadi ba lerato ba nyaka gore bana ba bona ba tle go bona ka go lebanya le go ikwa ba lokologile go ba kgopela seo ba se nyakago.

Ge Jesu a hlalosa mohlala wa gagwe wa ngwana yo a kgopelago dijo, o itše go lešaba: “Ka gona, ge e ba lena gaešita le ge le le kgopo le tseba go nea bana ba lena dimpho tše dibotse, gona Tatago lena yo a lego magodimong o tla nea gakaakang dilo tše dibotse go bao ba mo kgopelago.” (Mateo 7:11) Ga go pelaelo gore kganyogo ya motswadi ya go nyaka go nea ngwana wa gagwe dilo tše dibotse ke e matla. Kganyogo ya Tatago rena wa legodimong ya go kwa le go araba dithapelo tša rena ke e matla le go feta.

Modimo o nyaka gore re mo rapele ka go lebanya le ge re ikwa re imetšwe ke mathata a motho ka noši. Modimo ga a abele batho ba bangwe gore ba theetše dithapelo tša rena. Beibele e re kgothaletša gore: “Lahlela maima a gago go Jehofa, gomme yena o tla go thekga.” (Psalme 55:22) Go e na le gore re ithekge ka go rapelelwa ke bakgethwa goba motho le ge e le ofe, re swanetše go ba le pono e botse ka Jehofa Modimo.

Tatago rena wa legodimong o na le taba le yo mongwe le yo mongwe wa rena. O nyaka go re thuša ka mathata a rena gomme o re laletša go batamela kgauswi le yena. (Jakobo 4:8) Re thaba kudu ka ge re na le sebaka sa go batamela Modimo wa rena le Tatago rena, yo e lego “Mokwi wa thapelo”!—Psalme 65:2.