Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami  |  June 2013

 BATAMELA KGAUSWI LE MODIMO

Jehofa “ga a Bebe Sefahlego”

Jehofa “ga a Bebe Sefahlego”

Na o kile wa lebeletšana le kgethollo? Na o kile wa tingwa kgopelo e itšego, wa se direlwe tirelo e itšego goba mohlomongwe wa swarwa ka lenyatšo ka baka la mmala wa gago, setlogo sa gago goba maemo a gago setšhabeng? Ge e ba go le bjalo, ga se wena o nnoši. Lega go le bjalo, ditaba tše dibotse šidi: Gaešita le ge ditiro tše bjalo tša go nyatšwa di atile lefaseng, ga di gona legodimong. Moapostola Petro wa Mokriste o boletše a kgodišegile kudu gore: “Modimo ga a bebe sefahlego.”Bala Ditiro 10:34, 35.

Petro o boletše mantšu ao a le boemong bjo bo bego bo sa tlwaelega—legaeng la motho wa Bantle yo a bitšwago Koronelio. Petro, yo e bego e le Mojuda, o phetše nakong yeo Bajuda ba bego ba lebelela Bantle e le bao ba sa hlwekago gomme ka go re’alo go gwerana le bona go sa amogelege ka tsela le ge e le efe. Ka gona, ke ka baka la’ng Petro a be a le legaeng la Koronelio? Ke feela gore Jehofa Modimo e be e le yena a rulagantšego gore ba kopane. Petro o ile a ba le pono e tšwago go Modimo yeo go yona a ilego a botšwa gore: “Kgaotša go bitša dilo tše Modimo a di hlwekišitšego gore di šilafetše.” Petro o be a sa tsebe gore letšatši pele ga moo, Koronelio le yena o be a ile a ba le pono, yeo go yona morongwa a ilego a mo laela gore a bitše Petro. (Ditiro 10:1-15) Ge Petro a lemoga gore Jehofa o be a akaretšwa tabeng yeo, o ile a palelwa ke go homola.

Petro o itše: “Bjale gona ke kwešiša gabotse gore Modimo ga a bebe sefahlego.” (Ditiro 10:34) Polelwana ya Segerika yeo e fetoletšwego e le ‘go beba sefahlego’ e ra gore “ga a reke sefahlego.” (The Kingdom Interlinear Translation of the Greek Scriptures) Seithuti se sengwe se hlalosa mabapi le polelwana ye ka gore: “E šupa go moahlodi yo a lebelelago motho sefahlego gomme a mo ahlola, e sego go ya kamoo molato o swanetšego go ahlolwa ka gona, eupša go ya ka gore o rata motho yoo goba ga a mo rate.” Modimo ga a amogele yo mongwe go feta yo mongwe ka baka la gore ke wa morafo ofe, setšhaba sefe, o na le maemo afe setšhabeng goba ka baka la dilo le ge e le dife tšeo re ka di bonago.

Go e na le moo, Jehofa o bona seo se lego dipelong tša rena. (1 Samuele 16:7; Diema 21:2) Ka morago Petro o itše: “Setšhabeng se sengwe le se sengwe motho yo a mmoifago gomme a dira se se lokilego o a amogelega go yena.” (Ditiro 10:35) Go boifa Modimo go bolela go mo hlompha, go mo godiša le go mmota, gomme ra phema go dira selo le ge e le sefe seo se mo nyamišago. Go dira go loka go akaretša go rata go dira dilo tše di lokilego mahlong a Modimo. Jehofa o thabela motho yoo pelo ya gagwe e tletšego poifo yeo e mo šušumeletšago go dira se se lokilego.Doiteronomio 10:12, 13.

Ge Jehofa a lebelela fase a le legodimong, o bona batho bao ba lekanago

Ge e ba o kile wa lebeletšana le kgethollo, go na le lebaka le lebotse la gore o kgothatšwe ke seo Petro a se boletšego ka Modimo. Jehofa o gogela batho ba ditšhaba ka moka borapeding bja therešo. (Johane 6:44; Ditiro 17:26, 27) O theetša le go araba dithapelo tša barapedi ba gagwe go sa šetšwe gore ke ba morafo ofe, setšhaba sefe goba gore ba na le maemo afe setšhabeng. (1 Dikgoši 8:41-43) Re ka kgodišega gore ge Jehofa a lebelela fase a le legodimong, o bona batho bao ba lekanago. Na o tutueletšega go ithuta mo go oketšegilego ka Modimo yo yo a sa bebego sefahlego?

Mmalo wa Beibele o šišintšwego bakeng sa June

Johane 17-21Ditiro 1-10