Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

MOROKAMI MAY 2013

Na o tla Bota Modimo?

Na o tla Bota Modimo?

AKANYA o ena le mogwera yoo o mo ratago kudu, eupša a dira selo seo o sa kgonego go se kwešiša. Ba bangwe ba mo swaya diphošo bakeng sa seo a se dirilego e bile ba ahlola maikemišetšo a gagwe, ba bolela gore mogwera wa gago o sehlogo. Na o be o tla akgofela go dumelelana le bona, goba na o be o tla emela go kwa gore mogwera wa gago o re’ng? Ge e ba a be a se moo bakeng sa go ka itlhalosa, na o be o ka se kgethe go se mo felele pelo, le go nagana ka yena ka tsela e nepagetšego?

Pele o araba, o ka nyaka go tseba ka mo go oketšegilego. O ka botšiša gore, ‘Ke tseba mogwera yo wa ka kudu gakaaka’ng, le gona ke na le motheo ofe wa go mo rata?’ Seo se a kwagala. Eupša ela hloko se: Na re ka se diriše melao e swanago ya motheo potšišong ye ya ge e ba Modimo a le sehlogo?

O ka thatafalelwa ke go kwešiša dilo tše dingwe tšeo Modimo a di dirilego, goba wa makatšwa ke seo a dumeletšego gore se direge. Go na le batho ba bantši bao ba ka go botšago gore Modimo o sehlogo le bao ba ka go kgothaletšago go ahlola maikemišetšo a gagwe go swana le bona. Na o tla nagana ka yena ka tsela e nepagetšego go fihlela o tseba ka mo go oketšegilego? Karabo e ka ithekga ka gore na o tseba Modimo gabotse gakaaka’ng. Ipotšiše gore, ‘Modimo o bile mogwera wa mohuta mang go nna?’

Ge e ba bophelo bja gago bo be bo le thata, o ka lekega go bolela gore Modimo ga se a ka a ba mogwera wa gago. Eupša nagana go se nene. Na Modimo ke yena a go baketšego mathata bophelong bja gago—goba na o be a go šegofatša? Bjalo ka ge re bone, Sathane ke “mmuši wa lefase le,” e sego Jehofa. (Johane 12:31) Ka baka leo, Sathane ke yena yo a bakago masetlapelo le go hloka toka mo lefaseng. Le gona, na ga o dumele gore mathata a rena a mantši a bakwa ke go se phethagale ga rena le maemo a sa letelwago?

Na Modimo ke yena a go baketšego mathata bophelong bja gago—goba na o be a go šegofatša?

Ka lehlakoreng le lengwe, Modimo o be a ikarabela ka eng? Ela hloko seo Beibele e se bolelago: gore Modimo ke “Modiri wa legodimo le lefase”; gore mediro ya gagwe e akaretša mebele ya rena, yeo e ‘dirilwego ka tsela e makatšago’; le gore Jehofa ke “Modimo yoo mohemo wa gago [o] lego ka seatleng sa gagwe.” (Psalme 124:8; 139:14; Daniele 5:23) Seo ka moka se bolela’ng?

Se bolela gore Mmopi wa rena ke yena a re filego mohemo wa rena e bile a dirilego gore re be gona. (Ditiro 17:28) Se bolela gore mpho ya bophelo, bobotse bjo bo re dikologilego mo lefaseng, lethabo le le tlišwago ke lerato le bogwera, go thabela tatso, go kgwatha, go kwa le go dupa—dilo tše ka moka ke dimpho tše tšwago go Modimo. (Jakobo 1:17) Na ga o dumele gore ditšhegofatšo tšeo di mo dira Mogwera yoo re swanetšego go mo tšeela godimo le go mmota?

Ke therešo gore o ka thatafalelwa ke go bota Modimo. Mohlomongwe o bona eka ga se wa hlwa o mo tseba ka mo go lekanego go ka mmota. Gomme seo se a kwagala. Dihlogong tše tše dikopana, re ka se kgone go nea mabaka ka moka ao a dirago gore ba bangwe ba ahlole Modimo ka gore o sehlogo. Eupša na ga se mo gobotse go dira maiteko a go tseba Modimo gakaone? * Re holofela gore ge o dira bjalo, o tla feleletša o tseba therešo ka Modimo. Na o sehlogo? Aowa: “Modimo ke lerato.”—1 Johane 4:8.

^ ser. 8 Ka mohlala, hwetša tsebišo e oketšegile mabapi le lebaka leo ka lona Modimo a dumelelago bokgopo go kgaolo 11 ya puku ya Ke Eng Seo ge e le Gabotse Beibele e se Rutago? yeo e gatišitšwego ke Dihlatse tša Jehofa.

 

 

Ithute ka mo go oketšegilego

DITABA TŠE DIBOTSE TŠE DI TŠWAGO GO MODIMO!

Ke ka Baka la Eng Modimo a Dumelela Bobe le Tlaišego?

Bobe bo thomile bjang, gona ke ka baka la eng Modimo a ile a dumelela gore bo tšwele pele? Na tlaišego e tla ka ya fela?