Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI MAY 2013

 BATAMELA KGAUSWI LE MODIMO

Na Jehofa Ruri o na le Taba le Wena?

Na Jehofa Ruri o na le Taba le Wena?

“Go ikwa ke se na mohola ke lepheko le legolo leo ke lekago go lebeletšana le lona.” Mantšu ao a boletšwe ke mosadi yo mongwe yo a bego a thatafalelwa ke go dumela gore Jehofa a ka hwetša lebaka la go ba kgauswi le yena. Na le wena o ikwa ka tsela yeo? Ge e ba go le bjalo, o ka ipotšiša gore: ‘Na Jehofa ruri o na le taba le yo mongwe le yo mongwe wa barapedi ba gagwe?’ Karabo ke ee! Re hwetša bohlatse bja gore Jehofa o na le taba le rena mantšung a Jesu.—Bala Johane 6:44.

Jesu, yo a tsebago semelo sa Jehofa le thato ya gagwe gakaone go feta motho le ge e le ofe, o re’ng? (Luka 10:22) Jesu o hlalositše gore: “Ga go motho yo a ka tlago go nna ge a sa gogwe ke Tate yo a nthomilego.” Ka gona, re ka se be balatedi ba Kriste—le barapedi ba Tatago rena wa legodimong, Jehofa—ka ntle le ge re ka gogwa ke Jehofa. (2 Bathesalonika 2:13) Ge e ba re kwešiša seo Jesu a se boletšego, gona re tla bona bohlatse bjo matla mantšung a gagwe bja gore Modimo o na le taba le rena.

Ke eng seo se bolelwago ke taba ya gore Jehofa o a re goga? Lediri la Segerika leo le fetoletšwego e le “gogwa” gape le dirišwa bakeng sa go goga lokwa la dihlapi. (Johane 21:6, 11) Na Jehofa o re goga re sa rate, a re gapeletša gore re mo hlankele? Aowa. Jehofa o re nea tokologo ya boikgethelo, ka gona ga a re gapeletše gore re bule dipelo tša rena. (Doiteronomio 30:19, 20) Seithuti se sengwe se bea taba ka gore: “Mojako wa pelo ya motho ga o na mokgoko ka ntle. O swanetše go bulwa ka gare.” Jehofa o hlahloba dipelo tše dibilione lefaseng le, a tsoma batho bao ba mo nyakago. (1 Dikoronika 28:9) Ge a hwetša motho yo bjalo, Jehofa o arabela ka tsela e kgomago. Bjang?

Jehofa ka bonolo o goga dipelo tša batho bao ba nago le “tshekamelo e swanetšego.” (Ditiro 13:48) Jehofa o dira bjalo ka ditsela tše pedi—ka molaetša wa Beibele wa ditaba tše dibotse, wo o fihlelelago yo mongwe le yo mongwe wa rena, le ka moya wa gagwe o mokgethwa. Ge Jehofa a bona pelo yeo e arabelago therešong ya Beibele, o diriša moya wa gagwe go thuša motho go hwetša le go diriša therešo yeo bophelong bja gagwe. (1 Bakorinthe 2:11, 12) Ka ntle le thušo ya Modimo, re ka se tsoge re kgonne go ba balatedi ba kgonthe ba Jesu goba barapedi bao ba ineetšego ba Jehofa.

“Mojako wa pelo ya motho ga o na mokgoko ka ntle. O swanetše go bulwa ka gare”

Bjale, ke eng seo mantšu a Jesu ao a begilwego go Johane 6:44 a re rutago sona ka Jehofa Modimo? Jehofa o goga batho ka gobane a bona se botse dipelong tša bona le go ba le taba le yo mongwe le yo mongwe. Go kwešiša therešo ye yeo e kgothatšago go ile gwa homotša mosadi yo go boletšwego ka yena mathomong. O re: “Go ba mohlanka wa Jehofa ke tokelo e kgolo yeo yo mongwe le yo mongwe a ka bago le yona. Ka gona, ge e ba Jehofa a nkgetha gore ke be mohlanka wa gagwe, gona ke swanetše go ba ke le wa bohlokwa go yena.” Go thwe’ng ka wena? Na go tseba gore Jehofa o na le taba le yo mongwe le yo mongwe wa barapedi ba gagwe go go tutueletša gore o nyake go bula mojako wa pelo ya gago?

Mmalo wa Beibele o šišintšwego bakeng sa May

Luka 22-24Johane 1-16

 

Ithute ka mo go oketšegilego

Ga go na Seo se Kago re “Aroxanya le Leratô la Modimo”

Lahla kgopolo ya maaka ya gore Modimo ga a go rate goba ga o bohlokwa go yena.