Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI MAY 2013

Dikahlolo tša Modimo—Na di be di le Sehlogo?

Dikahlolo tša Modimo—Na di be di le Sehlogo?

GO ARABA potšišo ye, anke re hlahlobeng ka boripana mehlala e mebedi ya ka Beibeleng ya dikahlolo tša Modimo—Meetsefula a mehleng ya Noa le go fedišwa ga Bakanana.

MEETSEFULA A MEHLENG YA NOA

SEO O KA SE KWAGO: “Modimo o be a le sehlogo ge a be a tliša meetsefula ao a fedišitšego batho ka moka ka ntle le Noa le ba lapa la gagwe.”

SEO BEIBELE E SE BOLELAGO: Modimo o itše: “Ga ke kgahlwe ke lehu la yo kgopo, eupša ke kgahlwa ke gore motho yo kgopo a furalele tsela ya gagwe gomme a tšwele pele a phela.” (Hesekiele 33:11) Ka baka leo, Modimo ga se a ka a kgahlwa ke go fedišwa ga batho ba kgopo ba mehleng ya Noa. Bjale ke ka baka la’ng a ile a ba fediša?

Beibele e araba ka gore ge Modimo a be a tliša dikahlolo tše bjalo kgahlanong le batho bao ba sa boifego Modimo ba mehleng e fetilego, o be a “beela batho ba sa boifego Modimo mohlala wa dilo tše di tlago go tla.” (2 Petro 2:5, 6) Modimo o ile a bea mohlala ofe?

Sa pele, Modimo o ile a bontšha gore gaešita le ge a kwešwa bohloko ke go fediša batho, o ela hloko batho ba sehlogo bao ba bakago tlaišego gomme a ba ahlola ka baka la ditiro tša bona. Mafelelong, o tla fediša go hloka toka ka moka gotee le tlaišego.

Sa bobedi, mohlala wa ditiro tša Modimo tša nakong e fetilego o bontšha gore Modimo ka lerato o lemoša batho pele a ka phethagatša kahlolo. Noa e be e le mmoledi wa toko, eupša batho ba bantši kudu ba ile ba mo hlokomologa. Beibele e re: “Ba se ele hloko go fihla Meetsefula a etla a ba gogola ka moka.”—Mateo 24:39.

Na Modimo o kgomaretše mohlala woo? Ee. Ka mohlala, o ile a lemoša setšhaba sa gagwe sa Isiraele gore ge se be se ka retologela ditirong tše kgopo go swana le ditšhaba tšeo di bego di se dikologile, o be a tla dumelela manaba a šwahlela naga ya sona; a fediše mošate wa sona e lego Jerusalema; gomme a se iše bothopša. Isiraele e ile ya retologela ditirong tše kgopo—ya ba ya dira dihlabelo ka bana. Na Jehofa o ile a tšea kgato? Ee, eupša e bile feela ka morago ga ge a rometše baporofeta go yo lemoša setšhaba sa gagwe leboelela gore se fetoše ditsela tša sona pele maloba e eba maabane. O ile a ba a re: “Mmuši Morena Jehofa a ka se dire selo ka ntle le ge a utolletše bahlanka ba gagwe ba baporofeta sephiri.”—Amose 3:7.

 KAMOO O AKARETŠWAGO KA GONA: Mohlala woo re o bonago dikahlolong tša Jehofa tša nakong e fetilego o re nea kholofelo. Re ka fagahlela ka kgodišego kahlolong ya Modimo go bao ba bakago tlaišego ka sehlogo. Beibele e re: “Badirabobe bona ba tla fedišwa . . . Eupša ba boleta bona e tla ba beng ba lefase, ba tla thaba kudu ka baka la go ata ga khutšo.” (Psalme 37:9-11) O nagana’ng ka kahlolo yeo e imollago batho tlaišegong? Na ke e sehlogo, goba ke ya kgaugelo?

GO FEDIŠWA GA BAKANANA

SEO O KA SE KWAGO: “Go fedišwa ga Bakanana e be e le ntwa e sehlogo ge e bapišwa le dipolao tša mehleng yeno tša molokwanarite.”

SEO BEIBELE E SE BOLELAGO: “Ditsela tša [Modimo] ka moka ke tša toka. Ke Modimo yo a botegago, yoo go yena go se nago go hloka toka.” (Doiteronomio 32:4) Tiro ya toka ya Modimo e ka se bapišwe le ntwa ya batho. Ka baka la’ng? Ka gobane ka go se swane le batho, Modimo o kgona go hlahloba dipelo—ke gore, seo batho ba lego sona ka gare.

Ka mohlala, ge Modimo a be a ahlola metse ya Sodoma le Gomora gomme a ikemišeditše go tlo e fediša, monna yo a botegago Aborahama o be a tshwenyegile ka gore Modimo a bontšhe toka. O be a sa nagane Modimo wa gagwe yo a nago le toka a ka “fediša baloki gotee le ba kgopo.” Ka go se fele pelo, Modimo o ile a mo kgonthišetša gore ge e ba go be go ena le batho ba lokilego ba lesome Sodoma, O be a ka se fediše motse woo ka baka la bona. (Genesi 18:20-33) Go molaleng gore Modimo o ile a hlahloba dipelo tša batho bao gomme a bona bogolo bja bokgopo bja bona.—1 Dikoronika 28:9.

Ka mo go swanago, Modimo o ile a ahlola Bakanana gomme a laela ka mo go swanetšego gore ba fedišwe. Bakanana ba be ba tumile gampe ka ditiro tša bona tše sehlogo, tšeo di bego di akaretša go tšhungwa ga bana ba sa phela mellong ya go dira dihlabelo. * (2 Dikgoši 16:3) Bakanana ba be ba tseba gore Jehofa o be a laetše Baisiraele gore ba thope naga yeo ka moka. Bao ba ilego ba kgetha go dula gomme ba lwa ba be ba sa lwe le Baisiraele feela eupša gape ba be ba elwa le Jehofa, yoo a bego a ba neile bohlatse bjo matla bja gore o be a ena le batho ba gagwe.

Go oketša moo, Modimo o ile a gaugela Bakanana bao ba bego ba tlogetše bokgopo bja bona gomme ba amogela ditekanyetšo tše phagamego tša Jehofa tša boitshwaro. Ka mohlala, mogweba-ka-mmele wa Mokanana e lego Rahaba o ile a phološwa, gotee le ba lapa la gabo. Gape, ge badudi ba motseng wa Kanana wa Gibeoni ba be ba nyaka go gaugelwa, bona le bana ba bona ka moka ba ile ba phološwa.—Joshua 6:25; 9:3, 24-26.

KAMOO O AKARETŠWAGO KA GONA: Re ka ithuta thuto e bohlokwa kahlolong ya Bakanana. Re batamela ka lebelo “letšatši la kahlolo le la tshenyego ya batho ba sa boifego Modimo” leo le boletšwego e sa le pele. (2 Petro 3:7) Ge e ba re rata Jehofa, re tla holega ge a fediša tlaišego ya batho ka go fediša bao ba ganago pušo ya gagwe ya go loka mo lefaseng.

Bakanana ba be ba tumile gampe ka ditiro tša bona tše sehlogo, gomme ba ile ba lwantšha Modimo le batho ba gagwe ka boomo

Jehofa ka lerato o re gopotša gore dikgetho tša batswadi di kgoma bana ba bona. Lentšu la Modimo le re: “Le kgethe bophelo e le gore le dule le phela, lena le bana ba lena, ka gore le rate Jehofa Modimo wa lena, ka go theetša lentšu la gagwe le ka go mo kgomarela.” (Doiteronomio 30:19, 20) Na mantšu ao ke a Modimo yo sehlogo goba ke a Modimo yoo a ratago batho e bile a nyakago gore ba dire dikgetho tše nepagetšego?

^ ser. 15 Baepi ba marope ba epolotše bohlatse bja gore borapedi bja Bakanana bo be bo akaretša go dira dihlabelo ka masea.