Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami  |  April 2013

 BATAMELA KGAUSWI LE MODIMO

“Tšwelang Pele le Kgopela Gomme le tla Newa”

“Tšwelang Pele le Kgopela Gomme le tla Newa”

“Morena, re rute go rapela.” (Luka 11:1) Kgopelo yeo e be e lebišitšwe go Jesu ke yo mongwe wa barutiwa ba gagwe. Karolong ya karabo ya gagwe, Jesu o ile a bolela ka dipapišo tše pedi tšeo di re rutago gore re ka rapela bjang e le gore Modimo a re kwe. Ge e le gore o kile wa ipotšiša ge e ba Modimo a ekwa dithapelo tša gago, o tla kgahlwa ke karabo ya Jesu.—Bala Luka 11:5-13.

Papišo ya pele e mabapi le yoo a rapelago. (Luka 11:5-8) Papišong yeo, motho yo mongwe o ba le moeng bošego gomme ga a na dijo tšeo a ka mo neago tšona. Go yo a nago le moeng, taba yeo ke ya tšhoganetšo. Go sa šetšwe gore ke nako mang, o ya ntlong ya mogwera go yo kgopela senkgwa. Mathomong, mogwera o dikadika go tsoga ka ge ba lapa la gagwe ba šetše ba ile ka boroko. Eupša a phegelela a sa lewe ke dihlong, motho yoo yo a nago le moeng o tšwela pele a kgopela go fihlela mogwera wa gagwe a tsoga a mo nea dilo tšeo a di nyakago. *

Ke eng seo papišo yeo e re rutago sona ka thapelo? Jesu o re botša gore re swanetše go phegelela—go tšwela pele re kgopela, re tsoma, e bile re kokota. (Luka 11:9, 10) Ka baka la’ng? Na Jesu o be šišinya gore ge re rapela, ge e le gabotse, re kokota mojakong wa Modimo yo a ganago go re kwa? Aowa. Ntlha ya Jesu ke gore, ka go se swane le mogwera yo a dikadikago go thuša, Modimo o fagahletše go nea dilo tša kgonthe go bao ba mo rapelago ka tumelo. Re bontšha tumelo e bjalo ka go phegelela. Ka go kgopela re sa kgaotše, re bontšha gore re tloga re nyaka seo re se kgopelago le gore re dumela e le ka kgonthe gore Modimo a ka re nea sona—ge e ba seo se dumelelana le thato ya gagwe.—Mareka 11:24; 1 Johane 5:14.

Papišo ya bobedi e mabapi le “Mokwi wa thapelo,” Jehofa. (Psalme 65:2) Jesu o botšiša gore: “Ruri ke tate ofe mo gare ga lena yo e ka rego ge morwa wa gagwe a kgopela hlapi, yena a mo nea noga go e na le hlapi? Goba ge e ba a bile a kgopela lee, a ka mo neago phepheng?” Karabo e molaleng—ga go na tate yo lerato yo a neago bana ba gagwe dilo tše kotsi. Ka gona, Jesu o hlalosa papišo yeo ka gore: Ge e ba botate bao ba sa phethagalago ba nea bana ba bona “dimpho tše dibotse,” “gona Tate yo a lego legodimong o tla nea gakaakang moya o mokgethwa”—mpho e bohlokwa go feta tšohle—go bana ba gagwe ba lefaseng bao ba mo kgopelago! *Luka 11:11-13; Mateo 7:11.

Modimo o fagahletše go nea dilo tša kgonthe go bao ba mo rapelago ka tumelo

Ke eng seo papišo ye e re rutago sona ka Jehofa, “Mokwi wa thapelo”? Jesu o re laletša go bona Jehofa bjalo ka Tate yo lerato yo a ikemišeditšego go nea bana ba gagwe seo ba se kgopelago. Ka gona, barapedi ba Jehofa ba ka ikwa ba lokologile go mo kgopela seo se lego dipelong tša bona. Gomme ka go tseba gore o ba kganyogela tše botse, ba ka dula ba ikemišeditše go hwetša karabo ya seo ba se kgopelago, gaešita le ge e ba karabo e se yeo ba e letetšego. *

Mmalo wa Beibele o šišintšwego bakeng sa April

Luka 7-21

^ ser. 4 Papišo ya Jesu e bontšha seo se tlwaetšwego go dirwa bophelong. Bajuda ba be ba lebelela go amogela baeng bjalo ka modiro o mokgethwa. Lapa le be le apea senkgwa seo se lekanego letšatši, ka gona go kgopela go be go tlwaelegile ge e ba motho a feletšwe ke dilo. Ka gona, ge le be le diila, lapa ka moka le be le robala fase ka phaphošing e tee.

^ ser. 6 Jesu gantši o be a diriša tsela ya go nea mabaka ya “gakaakang”—a nea mabaka go tloga tabeng e nyenyane go ya go e kgolo. Jesu o be a diriša tsela ye ya go nea mabaka bakeng sa go gatelela kamoo Modimo a phalago batho ka gona.

^ ser. 7 Bakeng sa go ithuta kamoo go oketšegilego mabapi le gore o ka rapela bjang e le gore o kwewe ke Modimo, bona kgaolo 17 ya puku ya Ke Eng Seo ge e le Gabotse Beibele e se Rutago? yeo e gatišitšwego ke Dihlatse tša Jehofa.