Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI APRIL 2013

Bophelo bjo bo Nago le Morero—Jesu o Bontšha Tsela

Bophelo bjo bo Nago le Morero—Jesu o Bontšha Tsela

“Sepela kamoo Jesu a sepetšego ka gona.”—1 Johane 2:6, NET Bible.

BJALO ka ge re bone sehlogong se se fetilego, Jesu o phetše bophelo bjo bo nago le morero. Ka gona, ge e ba re nyaka gore bophelo bja rena bo be le morero, re swanetše go ekiša mohlala wa gagwe le go kwa keletšo ya gagwe.

Ge e le gabotse, Jehofa o re kgothaletša go dira sona seo, bjalo ka ge lengwalo le le lego ka mo godimo le bontšha. Go sepela go swana le Jesu go akaretša go dumelelanya bophelo bja rena ka moka le mohlala wa gagwe gotee le dithuto tša gagwe. Go dira bjalo go tla re thuša go amogelwa ke Modimo gotee le go ba le bophelo bjo bo nago le morero.

Dithuto tša Jesu di be di akaretša melao ya motheo yeo e ka re thušago go sepela go swana le yena. Re hwetša e mmalwa ya melao ye ya motheo Thutong ya gagwe e tumilego ya Thabeng. A re hlahlobeng e sego kae ya melao yeo ya motheo gotee le kamoo re ka e dirišago maphelong a rena.

MOLAO WA MOTHEO: “Go thaba bao ba lemogago gore ba nyaka dilo tša moya.”—Mateo 5:3.

KAMOO MOLAO WO WA MOTHEO O THUŠAGO GO BA LE MORERO BOPHELONG:

Jesu o bontšhitše gore batho ba nyaka dilo tša moya ka tlhago. Re hlologela go tseba dikarabo tša dipotšišo tše bjalo ka tše: Ke ka baka la’ng re le mo? Ke ka baka la’ng go ena le tlaišego e kaakaa mo lefaseng? Na Modimo ruri o na le taba le rena? Na go na le bophelo ka morago ga lehu? Re nyaka go tseba dikarabo tša dipotšišo tšeo e le gore re be le bophelo bjo bo nago le morero. Jesu o be a tseba gore go na le mothopo o tee feela wa dikarabo tša dipotšišo tšeo—Lentšu la Modimo. Ge a be a rapela Tatagwe, Jesu o itše: “Lentšu la gago ke therešo.” (Johane 17:17) Na ruri Lentšu la Modimo le ka re thuša go kgotsofatša go nyaka ga rena dilo tša moya?

SEO SE DIREGILEGO E LE KA KGONTHE:

Bjalo ka mohlabeledi wa sehlopha se se tumilego sa mmino, Esa o be a bonala a le tseleng ya go ba naletšana ya mmino wa rock. Lega go le bjalo, Esa o be a ikwa a hlaelelwa. O re: “Gaešita le ge ke be ke thabela go ba sehlopheng seo sa mmino, ke be ke hlologetše go ba le morero wa kgonthe bophelong.” Lega go le bjalo, ge nako e dutše e eya, Esa o ile a gahlana le yo mongwe wa Dihlatse tša Jehofa. Esa o dumela ka gore: “Ke ile ka mmotšiša dipotšišo tše dintši. Dikarabo tša gagwe tše nago le tlhaologanyo le tša Mangwalo di ile tša nkgahla kudu moo ke ilego ka dumela gore a tle a ithute Beibele le nna.” Seo Esa a ithutilego sona thutong ya gagwe ya Beibele se ile sa mo kgoma pelo le go mo šušumeletša go neela bophelo bja gagwe go Jehofa. O re: “Nakong e fetilego, ke be ke dula ke wela mathateng le go tšwa go wona. Ga bjale ke na le morero wa kgonthe bophelong.” *

MOLAO WA MOTHEO: “Go thaba bagaugedi.”—Mateo 5:7.

KAMOO MOLAO WO WA MOTHEO O THUŠAGO GO BA LE MORERO BOPHELONG:

Kgaugelo e akaretša go bontšha ba bangwe kwelobohloko, go ba botho le go ba naganela. Jesu o ile a bontšha bahloki kgaugelo. O ile a šušumeletšwa ke kwelobohloko gore a gate mogato wa pele wa go fediša tlaišego ya ba bangwe. (Mateo 14:14; 20:30-34) Ge re ekiša Jesu ka go ba le kgaugelo, re oketša morero wa bophelo bja rena, ka ge bao ba gaugelago ba bangwe ba tla thaba. (Ditiro 20:35) Re ka bontšha ba bangwe kgaugelo ka mantšu a botho le ditiro, e lego go imolla bao ba tsomago thušo ya rena. Na go bontšha kgaugelo ruri go kaonefatša boemo bja rena bja tša maphelo?

Maria le Carlos

SEO SE DIREGILEGO E LE KA KGONTHE:

Maria le monna wa gagwe, Carlos, ba beile mohlala wa go ba le kgaugelo. Tatago Maria ke mohlolo, gomme nywageng ya morago bjale o dula a le malaong ka baka la bolwetši. Maria le Carlos ba dula le yena lapeng la bona e bile ba hlokomela dinyakwa tša gagwe ka moka. Ba ile ba fetša mašego a mantši ba sa robale, gaešita le go mo  kitimišetša bookelong ge a tshwenywa ke bolwetši bja gagwe bja swikiri. Ba dumela gore ka dinako tše dingwe ba lapa kudu. Eupša ba thabile, bjalo ka ge Jesu a boletše, ka gobane ba kgotsofetše kudu ka ge ba tseba gore ba nea tatago Maria tlhokomelo yeo a e nyakago.

MOLAO WA MOTHEO: “Go thaba badirakhutšo.”—Mateo 5:9.

KAMOO MOLAO WO WA MOTHEO O THUŠAGO GO BA LE MORERO BOPHELONG:

Go ba modirakhutšo go dira bjang gore bophelo bo be le morero? Se sengwe ke gore re ba le ditswalano tše kaone le bao ba re dikologilego. Re dira gabotse ge re ekwa keletšo ya Beibele e rego: “Ge e ba go kgonega, go fihla moo go ithekgilego ka lena, ebang le khutšo le batho bohle.” (Baroma 12:18) “Batho bohle” ba akaretša ditho tša lapa le ba bangwe bao ditumelo tša bona tša bodumedi di sa swanego le tša rena. Na go dira khutšo le “batho bohle” ruri go thuša go ba le morero bophelong?

Nair

SEO SE DIREGILEGO E LE KA KGONTHE:

Ela hloko phihlelo ya mosadi yoo a bitšwago Nair. Go theoša le nywaga, o ile a lebeletšana le maemo a mantši a gateletšago ao a ilego a leka bokgoni bja gagwe bja go dira khutšo, kudukudu ka lapeng la gagwe. Ga e sa le go tloga ge monna wa gagwe a mo lahla nywageng e ka bago e 15 e fetilego, o be a godiša bana ba gagwe a nnoši. Yo mongwe wa barwa ba gagwe o be a lemaletše dihlaretagi gomme a fela a sa laolege e bile a tšhošetša yena le morwedi wa gagwe. Nair o dumela gore seo a ithutilego sona ka Beibeleng se ile sa mo nea matla a go dira khutšo, gaešita le ka tlase ga maemo a lekago. O leka go se dire manganga goba go lwela dilo tše dingwe. O katanela go ba botho, go ba le kwelobohloko le go kwešiša ba bangwe. (Baefeso 4:31, 32) O kgodišegile gore go ithuta go ba modirakhutšo go mo dirile gore a kgone go ba le ditswalano tše kaone ka mo go kgonegago le ditho tša lapa gotee le ba bangwe.

GO NAGANA KA BOKAMOSO

Ge e ba re latela keletšo ya Jesu, re tla hwetša lethabo le kgotsofalo bophelong. Lega go le bjalo, gore re be le bophelo bjo bo nago le morero wa kgonthe, gape re swanetše go tseba seo bokamoso bo se huperego. Go ba gona, bophelo bo ka ba le morero bjang mola seo re se tsebago e fo ba gore re tlo feleletša re tšofetše, ra babja gomme ra hwa? Lega go le bjalo, tše ke ditherešo tša bophelo mo lefaseng le.

Lega go le bjalo, go na le ditaba tše dibotse! Jehofa o ikemišeditše go tlo šegofatša kudu bohle bao ba katanelago go “sepela kamoo Jesu a sepetšego ka gona.” Jehofa o holofetša gore go se go ye kae o tla tliša lefase le lefsa le le lokilego, moo batho ba botegago ba tla phelago kamoo Jehofa a rerilego gore ba phele ka gona—go phela ka mo go sa felego ba ena le boemo bjo bo phethagetšego bja tša maphelo. Lentšu la gagwe le re: “Bonang! Tente ya Modimo e bathong, o tla dula le bona gomme e tla ba batho ba gagwe. Modimo ka noši o tla ba le bona. O tla phumola megokgo ka moka mahlong a bona gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona. Dilo tša pele di fetile.”—Kutollo 21:3, 4.

Maria, e lego mokgekolo wa nywaga e 84 yo go boletšwego ka yena sehlogong sa mathomo lelokelelong le la dihlogo, o thabišwa ke tebelelo ya go tlo bona mantšu ao a phethagala. Go thwe’ng ka wena? Na o ka rata go tseba ka mo go oketšegilego ka “[bophelo] bja kgonthe”—bjo bo tlago go tla ka tlase ga Mmušo wa Modimo? (1 Timotheo 6:19) Ge e ba go le bjalo, o ka botšiša Dihlatse tša Jehofa tša lefelong la geno goba o ngwalele bagatiši ba makasine wo. *

^ ser. 8 O ka bala kanegelo ya Esa ka moka ga yona sehlogong seo se rego, “Beibele e Fetoša Maphelo—Ke be ke le yo Šoro”.

^ ser. 18 Puku ya Ke Eng Seo ge e le Gabotse Beibele e se Rutago?, yeo e gatišitšwego ke Dihlatse tša Jehofa, e thušitše ba bantši go ithuta Mangwalo ka tsela e rulagantšwego ka dihlogo.

 

Ithute ka mo go oketšegilego

Morero wa Bophelo ke Ofe?

Na o kile wa ipotšiša gore: ‘Morero wa bophelo ke ofe?’ Ithute kamoo Beibele e arabago potšišo yeo.

Mmušo wa Modimo o tla Phetha Eng?

Ithute seo o ka se letelago ge mmušo wa Modimo o tla be o buša lefase.