Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

MOROKAMI APRIL 2013

Jesu, Senotlelo se se Lebišago Bophelong bjo bo Nago le Morero

Jesu, Senotlelo se se Lebišago Bophelong bjo bo Nago le Morero

NA Jesu ruri o be a ena le bophelo bjo bo nago le morero? Go bonagala a ile a godišetšwa lapeng la bobotlana, e bile o feditše bophelo bja gagwe a se na dilo tše kaalo tše bonagalago. Ge e le gabotse, o be a se “na mo a ka latšago hlogo ya gagwe gona.” (Luka 9:57, 58) Go oketša moo, o ile a hloiwa, a thomeletšwa, gomme mafelelong a bolawa ke manaba a gagwe.

O ka bea mabaka ka gore, ‘Ga ke nagane gore bophelo bjo bjalo bo na le morero!’ Eupša go na le mo gontši mo re swanetšego go go ela hloko ka bophelo bja Jesu. A re hlahlobeng dikarolo tše nne tša bophelo bja gagwe.

1. JESU O BE A ENA LE MORERO BOPHELONG—GO DIRA THATO YA MODIMO.

“Dijo tša ka ke gore ke dire thato ya yo a nthomilego.”—Johane 4:34.

Jesu o be a nyaka go phetha thato ya Tatagwe wa legodimong, Jehofa, * ka mantšu a gagwe le ka ditiro. Jesu o ile a thabišwa kudu ke go dira thato ya Modimo. Ge e le gabotse o ile a bapiša go dira thato ya Modimo le dijo, bjalo ka ge go bontšhitšwe lengwalong leo le sa tšwago go tsopolwa. Ela hloko maemo ao a dirilego papišo yeo a le go ona.

Jesu o boletše mantšu ao mo e ka bago mosegare wa sekgalela. (Johane 4:6) O be a sepetše nageng ya meboto ya Samaria mosegare ka moka, ka go re’alo o be a tloga a swerwe ke tlala. Ge e le gabotse, barutiwa ba gagwe ba be ba mo kgothaditše ka gore: “Rabi, eja.” (Johane 4:31) Ka karabo ya gagwe, Jesu o bontšhitše gore ruri o be a ikwa a fepša le go matlafatšwa ke go dira thato ya Modimo. Na ga a kwagale e le motho yoo bophelo bja gagwe bo bego bo ena le morero?

2. JESU O BE A RATA TATAGWE KUDU.

“Ke rata Tate.”—Johane 14:31.

Jesu o be a ena le tswalano ya kgauswiuswi le Tatagwe yo a lego legodimong. Ka ge Jesu a be a rata Modimo kudu, lerato leo le ile la mo šušumeletša go bolela ka Tatagwe—leina la Gagwe, merero le dika tša Gagwe. Ka mantšu a gagwe, ditiro le boemo bja gagwe bja kgopolo, Jesu o ile a bonagatša semelo sa Tatagwe ka mo go phethagetšego—go fihla bokgoleng bjoo re bonago Jesu ba bjalo ka ge eka re bana ka Tatagwe. Ka baka leo, ge Filipi a be a kgopela Jesu a re: “Re bontšhe Tate,” Jesu o ile a araba ka gore: “Yo a bonego nna o bone le Tate.”—Johane 14:8, 9.

Jesu o be a rata Tatagwe kudu moo a bego a ikemišeditše go mo kwa go fihla lehung. (Bafilipi 2:7, 8; 1 Johane 5:3) Go rata Modimo kudu ka tsela yeo go ile gwa dira gore bophelo bja Jesu bo be le morero kudu.

 3. JESU O BE A RATA BATHO.

“Ga go yo a nago le lerato le le fetago le, gore motho a gafe moya wa gagwe ka baka la bagwera ba gagwe.”—Johane 15:13.

Ditebelelo tša rena tša bokamoso bjalo ka batho ba sa phethagalago ruri ga di kgahliše. Beibele e hlalosa ka gore: “Ka motho o tee [Adama] sebe se tsene lefaseng gomme lehu la tsena ka sebe, ka go re’alo lehu le aparetše batho bohle gobane bohle ba dirile sebe.” (Baroma 5:12) Ka borena re ka se kgone go phonyokga ditlamorago tša sebe, e lego lehu.—Baroma 6:23.

Se se kgahlišago ke gore Jehofa ka lerato o neile tharollo ya boemo bjo batho ba lego go bjona. O dumeletše Morwa wa gagwe yo a phethagetšego le yo a se nago sebe, yoo a ilego a tsebja e le Jesu, gore a tlaišege le go hwa e le gore a nee topollo bakeng sa go lokolla batho bokgobeng bja sebe le lehu. Jesu, a šušumetšwa ke go rata ga gagwe Tatagwe le batho, o ile a dira seo ka go rata gomme a neela bophelo bja gagwe bjo bo phethagetšego e le motho bakeng sa rena. (Baroma 5:6-8) Lerato le bjalo la boikgafo le dirile gore bophelo bja gagwe bo be le morero. *

4. JESU O BE A TSEBA GORE TATAGWE O A MO RATA LE GO MO AMOGELA.

“Yo ke Morwa wa ka, morategi, yo ke mo amogetšego.”—Mateo 3:17.

Jehofa o boletše mantšu ao a le legodimong nakong ya kolobetšo ya Jesu. Ka go re’alo Jehofa o ile a bolela phatlalatša gore o be a rata Morwa wa gagwe, Jesu, le go mo amogela. Ga go makatše ge Jesu a ile a gatelela ka gore: ‘Tate o a nthata’! (Johane 10:17) Ka ge a be a tseba gore Tatagwe o be a mo rata le go mo amogela, Jesu o ile a kgotlelela kganetšo le go swawa diphošo. O ile a ba a dula a ena le tekatekano gotee le go tsepama maikwelong ge a be a lebane le lehu. (Johane 10:18) Go tseba ga Jesu gore Tatagwe o a mo rata le go mo amogela ka ntle le pelaelo go ile gwa dira gore bophelo bja gagwe bo be le morero le go feta.

Ka ntle le pelaelo bophelo bja Jesu bo be bo ena le morero. Go molaleng gore re ka ithuta mo gontši go yena mabapi le kamoo re ka phelago bophelo bjo bo nago le morero wa kgonthe. Sehlogo se se latelago se tla hlahloba e nngwe ya keletšo e kwagalago yeo Jesu a e neilego balatedi ba gagwe ya kamoo ba swanetšego go phela ka gona.

^ ser. 6 Jehofa ke leina la Modimo bjalo ka ge le utolotšwe ka Beibeleng.

^ ser. 15 Bakeng sa go ithuta ka mo go oketšegilego ka mohola o lopollago wa lehu la Jesu, bona kgaolo 5 ya puku ya Ke Eng Seo ge e le Gabotse Beibele e se Rutago? yeo e gatišitšwego ke Dihlatse tša Jehofa.