Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI APRIL 2013

 TABA YA LETLAKALA LA KA NTLE: BOPHELO BJO BO NAGO LE MORERO BO A KGONEGA

Na Bophelo bjo bo Nago le Morero Ruri bo a Kgonega?

Na Bophelo bjo bo Nago le Morero Ruri bo a Kgonega?

“Nywaga ya bophelo bja rena ke nywaga e masome a šupago, gomme go yo thata ke nywaga e masome a seswai, gomme segolothata mo go yona ke tapišego le tshwenyego.”—Psalme 90:10, Phetolelo ya Kgale.

MANTŠU ao ruri ke therešo! Bophelo lefaseng le gantši bo tletše “tapišego le tshwenyego.” Mohlomongwe o ile wa ipotšiša gore, ‘Na ruri go a kgonega go ba le bophelo bjo nago le morero?’

Ela hloko mohlala wa Maria. E be e le motho wa go ba le matšato, eupša ga bjale, ka ge a ena le nywaga e 84, ga a sa kgona go tšwa ka ngwakong. Tlhaologanyo ya gagwe e sa dutše e šoma gabotse, eupša go bonagala mmele wa gagwe o gana. A ka kgona bjang go bona bophelo bjo bjalo bo ena le morero?

Go thwe’ng ka wena? O ka ba o kile wa ipotšiša ge e ba bophelo bja gago bo ena le morero. Mošomo wa gago e ka ba e le wa go dira selo setee, wo o lapišago le wo o lešago bodutu. Batho ba bantši ba ka no se lemoge maiteko goba mošomo wa gago. Gaešita le ge dilo di ka ba di go sepelela gabotse, o ka no ikwa o sa kgodišege ka bokamoso bja gago. Ka dinako tše dingwe, o ka ba wa ikwa o lewa ke bodutu goba o gateletšegile. Lapa la gago le ka ba le phela ka dintwa le dingangišano. O ka ba o hwetšwe ke motho yo o mo ratago. Monna yo a bitšwago André o be a rata tatagwe kudu, gomme tatagwe o ile a babja go sa letelwa ke moka a hlokofala. André o ile a kwa bohloko o šoro, gomme se se mo šiile le ntho yeo a naganago gore e ka se fole.

Go sa šetšwe gore o lebeletšana le tapišego efe, go na le selo se itšego seo re tlogago re swanetše go se tseba: Na bophelo bjo bo nago le morero ruri bo a kgonega? Re ka hwetša karabo bophelong bja monna yoo a ilego a phela mo lefaseng nywageng e ka bago e 2 000 e fetilego—Jesu Kriste. Go sa šetšwe mapheko ka moka ao a ilego a lebeletšana le ona, ruri bophelo bja Jesu bo be bo ena le morero. Le rena re ka ba le bophelo bjo bjalo ge e ba re latela mohlala wa gagwe.