Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI MARCH 2013

 PHIHLELO

“Ke Ile ka Bona, Eupša ka se Kwešiše”

“Ke Ile ka Bona, Eupša ka se Kwešiše”

Ke be ke ena le nywaga e mebedi ka 1975 ge mma a thoma go belaela gore go be go na le seo se sa tlwaelegago ka nna. Ge mma a be a nkukile, mogwera wa gagwe o ile a wiša selo se boima, gomme sa dira lešata le legolo. Mma o ile a lemoga gore ga se ka ka ka tširoga le ganyenyane. Ge ke ena le nywaga e meraro, ke be ke sa dutše ke sa kgone go bolela. Ke moka lapa lešo le ile la botšwa ditaba tše di sa kgahlišego—ditsebi di ile tša kgonthišetša taba ya gore ke be ke le sefoa ka mo go feletšego!

Batswadi ba ka ba ile ba hlalana ge ke be ke sa le lesea, gomme mma o ile a gapeletšega go godiša nna le bomogolo’ake—barwarre ba babedi le kgaetšedi—a nnoši. Ka nako yeo, bana ba difoa ba Fora ba be ba sa rutwe ka tsela yeo ba rutwago ka yona lehono, gomme mekgwa yeo e bego e dirišwa ka dinako tše dingwe e be e baka tlaišo e kgolo. Lega go le bjalo, go tloga bjaneng ke be ke dutše ke holega ka tsela yeo difoa tše dintši di sa holegego ka yona. E re ke hlalose.

Ge ke be ke ena le nywaga e ka bago e mehlano

Go tšere nako e itšego barutiši ba bantši ba dumela gore bana bao e lego difoa ba swanetše go rutwa go bolela le go kgona go bona gore motho o re’ng ka go lebelela molomo wa gagwe. Ge e le gabotse, Fora, moo ke goletšego gona, go bolela ka diatla go be go thibetšwe ka mo go feletšego dikolong. Bana ba bangwe bao e bego e le difoa ba be ba bile ba tlengwa diatla ka morago nakong ya dithuto.

Nywageng e sego kae ya pele ya bophelo bja ka, ke be ke fetša diiri tše dintši bekeng e nngwe le e nngwe ke ena le setsebi sa tša polelo. Ke be ke swarwa mohlagareng goba hlogong gomme ke gapeletšwa gore ke dule ke ntšha medumo yeo ke bego ke sa kgone go e kwa. Ke be ke sa kgone go boledišana le bana ba bangwe. Yeo e bile nywaga yeo ke ilego ka tlaišega ka yona.

Ka morago, ge ke be ke ena le nywaga e tshela, ke ile ka romelwa sekolong sa bana ba difoa seo se nago le bodulabarutwana. E be e le la mathomo ke kopana le bana ba bangwe bao e lego difoa. Mo le gona polelo ya diatla e be e thibetšwe. Ge re be re ka dira ditšhupetšo ka klaseng, re be re ipea kotsing ya go bethwa malokololong a menwana goba go gogwa ka moriri. Lega go le bjalo, re be re bolela ka diatla ka sephiring, re diriša mekgwa yeo re itlhametšego yona. Ke ile ka feleletša ke kgona go boledišana le bana ba bangwe. Ke kamoo go ilego gwa thoma nywaga e mene ya go thaba ga ka.

Lega go le bjalo, ge ke be ke ena le nywaga e lesome, ke ile ka hudušetšwa sekolong sa tlase sa bana bao ba kgonago go bolela. Ke be ke nyamile o šoro! Ke be ke nagana gore bana ba bangwe ka moka ba difoa ba hwile gomme go šetše nna ke nnoši lefaseng. Ba lapa lešo ka go latela keletšo ya dingaka, tšeo di bego di boifa gore nka lahlegelwa ke go holwa ke kalafo ya tša polelo, ba be ba se ba ithuta polelo ya diatla gomme ke be ke sa dumelelwa go gwerana le bana ba bangwe ba difoa. Ke sa dutše ke gopola ge ke be ke ile go setsebi sa tša go kwa. Se be se beile puku ya polelo ya diatla tesekeng ya sona. Ge ke be ke bona diswantšho letlakaleng la ka ntle, ke ile ka e šupa gomme ka re, “Ke nyaka puku yeo!” Ngaka e ile ya uta puku yeo kapejana. *

 KE ILE KA THOMA GO ITHUTA DITHEREŠO TŠA BEIBELE

Mma o ile a leka go godiša rena bana ka melao ya motheo ya Bokriste. O be a eya le rena dibokeng tša Phuthego ya Mérignac ya Dihlatse tša Jehofa, kgauswi le Bordeaux. Ge ke be ke sa le ngwana, ke be ke kwešiša dilo tše sego kae kudu dibokeng. Lega go le bjalo, ditho tša phuthego di be di šiedišana ka go dula kgauswi le nna go nngwalela dintlha ka seo se bego se bolelwa. Ke ile ka kgongwa ke lerato la tšona le go tshwenyega ka nna. Ge ke le gae, mma o be a ithuta Beibele le nna, eupša ke be ke sa kwešiše ka mo go feletšego seo a bego a nthuta sona. Ke be ke ikwa ka tsela e itšego ke swana le moporofeta Daniele yoo, ka morago ga gore a amogele porofeto yeo e tšwago go morongwa, a itšego: Ke ile “ka kwa eupša ka se kwešiše.” (Daniele 12:8) Go nna, e be e le taba ya gore “Ke ile ka bona, eupša ka se kwešiše.”

Lega go le bjalo, ke ile ka ithuta ditherešo tša motheo tša Beibele ganyenyane-ganyenyane. Ke be ke tšeela godimo dilo tšeo ke bego ke di kwešiša gabotse gomme ke leka go di diriša bophelong bja ka. Gape ke ile ka ithuta ka go bogela boitshwaro bja ba bangwe. Ka mohlala, Beibele e re botša gore re se ke ra fela pelo. (Jakobo 5:7, 8) Ke be ke tloga ke sa kwešiše gore go se fele pelo go bolela eng. Lega go le bjalo, ka go bogela badumedigotee le nna ba bonagatša seka se, ke ile ka kgona go kwešiša gore go se fele pelo go bolela eng. Ruri phuthego ya Bokriste e nthušitše kudu.

GO NYAMA O ŠORO LE SELO SE SEBOTSE SEO SE SA LETELWAGO

Stéphane o ile a nthuša go kwešiša Beibele

Ka letšatši le lengwe, ge ke be ke sa le mahlalagading, ke ile ka bona bafsa ba bangwe ba difoa setarateng ba boledišana ka diatla. Ke ile ka thoma go gwerana le bona ka sephiring gomme ka thoma go ithuta Polelo ya Diatla ya Fora (French Sign Language [FSL]). Ke ile ka tšwela pele ke eya dibokeng tša Bokriste, moo Hlatse e nngwe ya mofsa, e lego Stéphane, e ilego ya nkgahlegela. O be a dira boiteko bjo bogolo bja go boledišana le nna, gomme ke ile ka ikwa ke mo rata kudu. Lega go le bjalo, ke be ke letetšwe ke go nyama o šoro. Stéphane o ile a golegelwa go gana ga gagwe go tsenela tša bohlabani. Ke ile ka nyama o šoro! Ka ge Stéphane a be a se gona, ke ile ka nyama kudu gomme ka thoma go ya dibokeng ka sewelo.

Ka morago ga dikgwedi tše 11, Stéphane o ile a lokollwa gomme a boa gae. Akanya kamoo ke ilego ka makala ka gona ge Stéphane a thoma go boledišana le nna ka polelo ya diatla. Ke be ke sa kgolwe seo mahlo a ka a bego a mpontšha sona! Go be go diregile’ng? Stéphane o be a ithutile FSL ge a be a le kgolegong. Ke ile ka bogela mosepelo wa diatla tša Stéphane le ponagalo ya sefahlego sa gagwe, gomme ka thaba kudu ge ke naganišiša ka sohle seo se se bego se tla se bolela go nna.

GO KWEŠIŠA THEREŠO YA BEIBELE MAFELELONG

Stéphane o ile a thoma go ithuta Beibele le nna. Go tloga ka nako yeo go ya pele ke ile ka thoma go kopanya dikarolwana tša therešo ya Beibele tšeo ke bego ke ithutile tšona. Ge ke be ke sa le ngwana, ke be ke rata go lebelela diswantšho tše dibotse dikgatišong tša rena tšeo di theilwego Beibeleng, ke bapiša baanegwa ba tšona le go hlahloba ditaba ka botlalo gore ke nweletše dikanegelo tšeo monaganong wa ka. Ke be ke tseba ka Aborahama, “peu” ya gagwe le “lešaba le legolo,” eupša ke ile ka thoma go kwešiša seo se bolelwago ke dikgopolo tšeo ge ke be ke bona di hlaloswa ka polelo ya diatla. (Genesi 22:15-18; Kutollo 7:9) Go be go le molaleng gore ke be ke hweditše polelo yeo ke e kwešišago, yeo e fihlelelago pelo ya ka.

Ka ge bjale ke be ke kgona go kwešiša seo se bolelwago dibokeng, pelo ya ka e ile ya kgomega gomme ka nyaka go ithuta ka mo go oketšegilego. Ka thušo ya Stéphane, kwešišo ya ka ya Beibele e ile ya dula e gola, gomme ka 1992, ka neela bophelo bja ka go Jehofa Modimo le go kolobetšwa. Lega go le bjalo, go sa šetšwe kgatelopele yeo ke bego ke šetše ke e dirile, ke be ke na le dihlong e bile ke le šedi gore ke gwerana le bomang ka baka la ge ke be ke se ka kgona go ithuta go boledišana le batho ba bangwe ge ke be ke sa le yo monyenyane.

 GO LWANTŠHA GA KA DIHLONG

Mafelelong, sehlopha se senyenyane sa difoa tšeo ke bego ke kopanela le tšona se ile sa kopanywa le phuthego ya Pessac, e lego motse wa ka ntle ga toropo ya Bordeaux. Seo se ile sa nthuša kudu, gomme ka dula ke dira tšwelopele ya moya. Gaešita le ge ke be ke sa dutše ke katana le go se kgone ga ka gakaalo go boledišana le ba bangwe, bagwera ba ka bao ba kgonago go bolela ba be ba le šedi go kgonthišetša gore ke kwešiša dilo ka moka. Banyalani ba bangwe, Gilles le Elodie, ba be ba iteka ka matla go boledišana le nna. Ba be ba fela ba ntaletša gore ke yo ja goba go nwa kofi le bona ka morago ga diboka, ka go re’alo ra ba bagwera ba babotse. Go thabiša kudu go ba gare ga batho bao ba latelago ditsela tša Modimo tša go bontšha lerato!

Mosadi wa ka, Vanessa, o nthekga e le ka kgonthe

Ke ile ka kopana le Vanessa yo a kgahlišago phuthegong yona yeo. Ke ile ka kgahlwa ke go kgomega ga gagwe ka ba bangwe le go ahlola dilo ka toka. O be a sa ke a lebelela bofoa bja ka e le tšhitišo, eupša go e na le moo, o bo lebelela e le tsela ya gore a ithute go boledišana le motho wa sefoa. O ile a nkgapa pelo gomme ra nyalana ka 2005. Gaešita le ge ke thatafalelwa ke go boledišana le ba bangwe gabotse, Vanessa o nthušitše go lwantšha ga ka dihlong le gore ke boledišane le ba bangwe ka bolokologi. Ke tloga ke leboga thekgo ya gagwe ge ke dutše ke phetha boikarabelo bja ka.

MPHO E NNGWE E TŠWAGO GO JEHOFA

Ngwageng woo re nyalanego ka wona, ofisi ya lekala ya Dihlatse tša Jehofa ya Fora yeo e lego Louviers e ile ya ntaletša gore ke tlo fetša kgwedi ke tlwaeletšwa mošomo wa bofetoledi. Nywageng ya morago bjale lekala le be le dutše le šoma ka thata kudu go tšweletša dikgatišo tše dintši tša DVD ka FSL. Eupša ka ge modiro o montši o be o sa letše ka pele, sehlopha sa bofetoledi se be se nyaka go tiišwa.

Ge ke be ke nea polelo ya Beibele ka Polelo ya Diatla ya Fora

Nna le Vanessa re be re nagana gore go yo hlankela ga ka lekaleng e be e ele tokelo e kgolo kudu le mpho e tšwago go Jehofa Modimo, eupša ke nyaka go dumela gore re be re boifa. Go be go tla direga’ng ka sehlopha sa rena sa batho ba polelo ya diatla? Re be re tla dira’ng ka ntlo ya rena? Na Vanessa o be a tla hwetša mošomo tikologong yeo? Jehofa o ile a rarolla bothata bjo bongwe le bjo bongwe ka tsela e makatšago. Ke ile ka tloga ke ekwa lerato leo Jehofa a ratago rena le batho ba difoa ka lona.

GO THEKGWA KE BATHO BAO BA NAGO LE BOTEE

Ka ge ke ile ka šoma bofetoleding, ke kgona go kwešiša gakaone sohle seo se dirwago go thuša batho ba difoa go tseba Modimo. Ke thaba kudu go bona bašomigotee le rena ba leka go boledišana le nna! Ditšhupetšo tše mmalwa tšeo ba di dirišago gomme ba leka go di diriša di nkgoma pelo. Ga ke ikwe ke phaelwa ka thoko le gatee. Dipontšho tšeo ka moka tša lerato di bontšha botee bjo bo sa tlwaelegago gare ga batho ba Jehofa.—Psalme 133:1.

Ge ke šoma Lefapheng la Bofetoledi ofising ya lekala

Ke leboga Jehofa gore ka phuthego ya Bokriste, o ile a kgonthišetša gore go dula go ena le motho yo a nthušago. E bile ke tšeela godimo tema e nyenyane yeo ke e kgathilego go thušeng difoagotee le nna go tseba Mmopi wa rena yo lerato le go batamela kgauswi le yena. Ke fagahletše letšatši leo ka lona ditšhitišo ka moka tša poledišano di tla bego di tlošitšwe gomme bohle ba bolela “leleme le le sekilego”—therešo ka Jehofa Modimo le merero ya gagwe—e le karolo ya lapa la batho le nago le botee.—Tsefanya 3:9.

^ ser. 9 Ka 1991, mmušo wa Fora o ile wa laela semmušo gore go dirišwe polelo ya diatla go ruta bana ba difoa.