Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI MARCH 2013

 RUTA BANA BA GAGO

Petro le Ananiase ba Ile ba Bolela Maaka—Ke Eng Seo re ka Ithutago Sona?

Petro le Ananiase ba Ile ba Bolela Maaka—Ke Eng Seo re ka Ithutago Sona?

Bjalo ka ge o tseba, maaka ke selo seo o se bolelago o tseba gore ga se therešo. Na o kile wa bolela maaka? * Gaešita le batho ba bagolo bao ba ratago Modimo le bona ba ile ba bolela maaka. Mohlomongwe o tseba motho yo mongwe ka Beibeleng yo a ilego a bolela maaka. Leina la gagwe ke Petro, yo mongwe wa baapostola ba 12 ba Jesu. Anke re kwe gore ke ka baka la’ng a ile a bolela maaka.

Ka morago ga ge Jesu a golegilwe, o ile a išwa legaeng la moperisita yo a phagamego. E be e le ka masa. Petro o ile a tsena lapeng la moperisita ntle le go lemogwa. Seetšeng sa mollo, ngwanenyana wa mohlanka wa lapeng la moperisita yo a ilego a dumelela Petro go tsena o ile a mo lemoga. O ile a re: “Le wena o be o na le Jesu.” Petro, ka poifo o ile a re o be a se na le yena.

Beibele e re ka morago “ngwanenyana yo mongwe [o ile] a mo lemoga.” O ile a re: “Motho yo o be a na le Jesu.” Petro o ile a gana gape. Ka morago ga nakwana, ba bangwe ba ile ba ya go Petro ba re: “Ruri le wena o yo mongwe wa bona.”

Petro o ile a tšhoga. Ka gona, o ile a bolela maaka ka lekga la boraro, a re: “Motho yo ga ke mo tsebe!” Mogogonope o ile wa lla. Jesu o ile a lebelela Petro, gomme Petro a gopola gore diiri tše sego kae pejana, Jesu o be a mmoditše gore: “Pele mogogonope o lla wena o tla ntatola gararo.” Petro o ile a lla gabohloko. O be a itshola kudu!

Na selo sa mohuta woo se ka go diragalela?— O ka re o le sekolong, wa kwa barutwana ba bolela ka Dihlatse tša Jehofa. Yo mongwe a ka re: “Ga di dumediše folaga.” Yo mongwe a ka oketša ka gore: “Ga di lwele naga ya tšona.” Yo mongwe gape a ka re: “Ge e le gabotse ga se Bakriste, ka gobane ga di keteke Keresemose.” Gomme yo mongwe a retologela go wena, a botšiša gore: “Na ga o yo mongwe wa Dihlatse tša Jehofa?” O be o tla re’ng?

 O swanetše go itokišeletša go nea karabo e kwagalago pele seo se ka direga. Petro o be a se a itokiša. Ge kgateletšo e tšwelela, o ile a bolela maaka! Lega go le bjalo, o ile a itshola kudu ka seo a se dirilego, gomme Modimo o ile a mo lebalela.

Ananiase, e lego yo mongwe wa barutiwa ba pele ba Jesu, le yena o ile a bolela maaka. Eupša Modimo ga se a ka a lebalela yena goba mosadi wa gagwe, Safira. Safira o ile a dumelelana le monna wa gagwe gore ba bolele maaka. Anke re bone gore ke ka baka la’ng Modimo a se a lebalela Ananiase le Safira.

Matšatši a 10 ka morago ga gore Jesu a boele go Modimo legodimong, batho ba 3 000 ba ile ba kolobetšwa Jerusalema. Ba bantši ba be ba etšwa dinageng tša kgole go tlo keteka Monyanya wa Pentekoste, gomme ka morago ga gore e be barutiwa ba Jesu, ba be ba nyaka go dula lebakanyana e le gore ba ithute ka tumelo ya bona e mpsha. Ba bangwe ba barutiwa ba Jesu ba ile ba diriša tšhelete ya bona gore ba ba hlokomele.

Ananiase le mosadi wa gagwe ba ile ba rekiša thoto e le gore ba hwetše tšhelete ya go hlokomela bao ba bego ba sa tšwa go kolobetšwa. Ge Ananiase a tliša tšhelete go baapostola, o ile a re e be e feletše. Eupša e be e se ya felela! O ile a ipolokela e nngwe ya tšhelete yeo! Modimo o ile a utollela Petro ka seo, ka gona Petro a botša Ananiase gore: “O forile Modimo, e sego batho.” Ka yona nako yeo, Ananiase o ile a wela fase a hwa! Mo e ka bago diiri tše tharo ka morago, mosadi wa gagwe o ile a fihla. A sa tsebe seo se diragaletšego monna wa gagwe, le yena o ile a bolela maaka gomme a wela fase a hwa.

Ruri ye ke thuto e bohlokwa kudu: Go bolela therešo go bohlokwa! Ee, ka moka re swanetše go ithuta yona! Le gona, ka moka re dira diphošo, kudukudu ge re sa le ba banyenyane. Na ga o thabišwe ke gore Jehofa o a go rata le gore o tla go lebalela go swana le Petro?— Eupša gopola, re swanetše go bolela therešo. Ka gona, ge e ba re ka dira phošo e kgolo ya gore re bolele maaka, re swanetše go kgopela Modimo gore a re lebalele. Se ke seo Petro a swanetšego go ba a ile a se dira, gomme o ile a lebalelwa. Ge e ba re leka ka thata gore re se sa bolela maaka le ka mohla, Modimo le rena o tla re lebalela!

^ ser. 3 Ge e ba o bala le ngwana, thaladi ke ya go go gopotša gore o khutše gomme o kgothaletše ngwana go ntšha sa mafahleng.