Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

MOROKAMI FEBRUARY 2013

Moshe—Monna yo a Nago le Lerato

Moshe—Monna yo a Nago le Lerato

LERATO KE ENG?

Lerato le akaretša maikwelo a tseneletšego a bontšhwago batho ba bangwe. Motho yo nago le lerato o bontšha ka mantšu le ditiro tša gagwe gore o ikwa bjang ka bao a ba ratago, gaešita le ge go dira bjalo go nyaka boikgafo.

MOSHE O ILE A BONTŠHA LERATO BJANG?

Moshe o ile a bontšha Modimo lerato. Ka tsela efe? Go ba gona, gopola mantšu a begilwego go 1 Johane 5:3, a rego: “Se ke seo lerato la Modimo le se bolelago, gore re boloke ditaelo tša gagwe.” Moshe o dirišitše molao woo wa motheo bophelong bja gagwe. Dilong tšohle tšeo Modimo a ilego a mo kgopela gore a di dire—go tloga kabelong e tšhošago e bjalo ka ya go tšwelela pele ga Farao yo matla go fihla modirong wo o bonagalago o le bonolo wa go otlollela lepara la gagwe Lewatleng le Lehwibidu—Moshe o ile a di dira. Moshe o ile a kwa go sa šetšwe gore taelo e be e le bonolo goba e le thata. O ile a “dira ka wona mokgwa woo.”—Ekisodo 40:16.

Moshe o ile a bontšha Baisiraelegotee le yena lerato. Ba be ba kwešiša gore Jehofa o be a diriša Moshe go hlahla batho ba gagwe, ka gona ba be ba eya go Moshe ba mmotša mathata a bona a fapafapanego. Re bala gore: “[Setšhaba] sona sa hlwa se eme pele ga gagwe go tloga mesong go fihlela mantšiboa.” (Ekisodo 18:13-16) Akanya kamoo Moshe a ka bago a be a lapile ka gona ka morago ga go theetša Baisiraele letšatši ka moka ba mmotša mathata a bona! Lega go le bjalo, Moshe o be a thabela go thuša batho bao a bego a ba rata.

Ntle le go ba theetša, Moshe gape o ile a rapelela bao a bego a ba rata. O ile a ba a rapelela le bao ba bego ba mo fošeditše! Ka mohlala, ge kgaetšedi’a Moshe, e lego Miriamo, a be a ngongoregela Moshe, Jehofa o ile a mo otla ka lephera. Go e na le go thabela gore o otlilwe, Moshe o ile a mo rapelela gateetee, a re: “Ao hle Modimo! Mo fodiše hle!” (Numeri 12:13) Lerato ke lona feela leo le bego le ka dira gore Moshe a rapele thapelo e bjalo ya go hloka boithati!

RE ITHUTA ENG?

Re ka ekiša Moshe ka go hlagolela go rata Modimo ka lerato le le tseneletšego. Lerato le bjalo le re šušumeletša go kwa ditaelo tša gagwe “go tšwa pelong.” (Baroma 6:17) Ge re ekwa Jehofa go tšwa pelong, re mo thabiša pelo. (Diema 27:11) E bile re a ikhola. Godimo ga moo, ge re hlankela Modimo ka gobane re mo rata e le ka kgonthe, re ka se fo dira dilo tše di nepagetšego eupša re tla thabela go di dira!—Psalme 100:2.

Tsela e nngwe yeo re ka ekišago Moshe ka yona ke ka go hlagolela go rata ba bangwe ka lerato la boikgafo. Ge bagwera goba ba lapa ba re botša mathata a bona, lerato le re šušumeletša (1) go ba theetša ka kelohloko; (2) go ba kwela bohloko, goba go kwa seo ba se kwago; le (3) go ba tsebiša gore re na le taba le bona.

Go swana le Moshe, re ka rapelela bao re ba ratago. Ka dinako tše dingwe re ka ikwa re hloka mohola ge ba re botša mathata a bona. Re ka ba ra lla ka gore, “Ke maswabi gore seo nka se dirago e fo ba go go rapelela.” Eupša gopola gore: “Ge moloki a rapela, thapelo yeo e ba le matla a magolo.” (Jakobo 5:16, The Kingdom New Testament) Dithapelo tša rena ge e le gabotse di ka šušumeletša Jehofa go direla motho yoo selo seo go bego go ka direga gore a se mo direle sona. Ka gona, ke’ng seo ruri re bego re ka se direla bao re ba ratago seo se phalago go ba rapelela? *

Na ga o dumele gore re ka ithuta mo gontši go Moshe? Gaešita le ge e be e le motho yo a tlwaelegilego, o beile mohlala o mobotse kudu wa tumelo, boikokobetšo le lerato. Ge re ekiša mohlala wa gagwe kudu ka mo re ka kgonago, re tla holega le go feta gotee le go hola ba bangwe.—Baroma 15:4.

^ ser. 8 Re swanetše go katanela go dira seo Modimo a se nyakago go rena e le gore a theetše dithapelo tša rena. Bakeng sa tsebišo e oketšegilego, bona kgaolo 17 ya puku ya Ke Eng Seo ge e le Gabotse Beibele e se Rutago? yeo e gatišitšwego ke Dihlatse tša Jehofa.