Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI FEBRUARY 2013

Moshe—Monna wa Tumelo

Moshe—Monna wa Tumelo

TUMELO KE ENG?

Bjalo ka ge e dirišitšwe ka Beibeleng, “tumelo” e akaretša go dumela ka go tia selong se itšego mo go theilwego bohlatseng bjo bo tiilego. Motho yo a dumelago go Modimo o kgodišegile gore O tla phethagatša dikholofetšo tša Gagwe ka moka.

MOSHE O ILE A BONTŠHA TUMELO BJANG?

Moshe o be a theile bophelo bja gagwe dikholofetšong tša Modimo. (Genesi 22:15-18) O be a ena le sebaka sa go phela ka boiketlo gare ga matsaka a Egipita, eupša o ile a tlogela sebaka seo, “a kgetha go swarwa gampe le setšhaba sa Modimo go e na le go thabela boipshino bja nakwana bja sebe.” (Baheberu 11:25) Na phetho yeo e be e le ya go tšewa ke maikwelo, yeo a bego a tla itshola gore o e dirile ka morago? Aowa, ka gobane Beibele e re Moshe “o ile a tšwela pele a tiile go etša ge eka o bona Yo a sa bonagalego.” (Baheberu 11:27) Moshe ga se a ka a itshola ka baka la diphetho tšeo a di dirilego ka tumelo.

Moshe o be a ikemišeditše go matlafatša tumelo ya ba bangwe. Ka mohlala, ela hloko seo se ilego sa direga ge Baisiraele ba be ba bonagala ba kgakgetšwe gare ga madira a Farao le Lewatle le Lehwibidu. Ka ge Baisiraele ba be ba tšhošitšwe ke masetlapelo ao a bego a bonagala a le kgauswi le go direga, ba ile ba llela Jehofa le Moshe. Moshe o be a tla arabela bjang?

Moshe a ka no ba a be a sa tsebe gore Modimo o be a tlo aroganya Lewatle le Lehwibidu ka bogare, ke moka a bulela Baisiraele tsela ya go tšhaba. Lega go le bjalo, Moshe o be a kgodišegile gore Modimo o be a tla dira se sengwe go phološa batho ba Gagwe. Le gona Moshe o be a nyaka gore Baisiraelegotee le yena ba be le kgodišego e swanago. Re bala gore: “Moshe a re go setšhaba: ‘Le se ke la boifa. Emang le tiile gomme le bone phološo ya Jehofa yeo a tlago go le bontšha yona lehono.’” (Ekisodo 14:13) Na Moshe o ile a atlega go matlafatša tumelo ya Baisiraelegotee le yena? Ee, ka gobane Beibele e bolela mabapi le Moshe le Baisiraele ka moka gore: “Ka tumelo ba ile ba phatša Lewatle le Lehwibidu go etša eka ke nageng e omilego.” (Baheberu 11:29) Tumelo ya Moshe e ile ya hola yena gotee le yo mongwe le yo mongwe yoo a ilego a ithuta go yona.

RE ITHUTA ENG?

Re ka ekiša Moshe ka go thea maphelo a rena dikholofetšong tša Modimo. Ka mohlala, Modimo o holofetša gore o tla kgotsofatša dinyakwa tša rena tša dilo tše di bonagalago ge e ba re etiša borapedi bja gagwe pele maphelong a rena. (Mateo 6:33) Ke therešo gore re ka thatafalelwa ke go gana moya wa go rata dilo tše di bonagalago woo o atilego lehono. Eupša re ka kgodišega gore ge re dira sohle seo re ka se kgonago go boloka maphelo a rena a le bonolo e bile re swaregile kudu ka borapedi bja rena, Jehofa o tla kgotsofatša dinyakwa tša rena ka moka. O nea tiišetšo e rego: “Le ka mohla nka se ke ka go tlogela le ge e le go go lahla.”—Baheberu 13:5.

Gape re katanela go thuša ba bangwe gore ba gole tumelong. Ka mohlala, batswadi ba bohlale ba lemoga sebaka se sebotse seo ba nago le sona sa go aga tumelo baneng ba bona. Ge ba dutše ba gola, bana ba nyaka tsebo e bohlokwa ya gore Modimo o gona le ya gore o neile ditekanyetšo mabapi le se se nepagetšego le se se fošagetšego. Go oketša moo, ba swanetše go kgodišega gore go latela ditekanyetšo tša gagwe ruri ke tsela e kaonekaone ya bophelo. (Jesaya 48:17, 18) Batswadi ba nea bana ba bona mpho e bohlokwa ge ba ba thuša go ba le tumelo ya gore Modimo “o gona e le ka kgonthe le gore o putsa bao ba tlogago ba leka go mo hwetša.”—Baheberu 11:6, Holy Bible—Easy-to-Read Version.