Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami  |  February 2013

 BEIBELE E FETOŠA MAPHELO

“Ba be ba Nyaka Gore ke Itlhatselele Therešo”

“Ba be ba Nyaka Gore ke Itlhatselele Therešo”
  • NGWAGA WA MATSWALO: 1982
  • NAGA: DOMINICAN REPUBLIC
  • BOPHELO BJA PELE E EBA MOKRISTE: O GODIŠITŠWE E LE MOMORMON

BOPHELO BJA KA BJA NAKONG E FETILEGO:

Ke belegetšwe Santo Domingo, Dominican Republic, ke le wa mafelelo baneng ba bane. Batswadi ba ka ba be ba rutegile gomme ba nyaka go godišetša bana ba bona bathong ba mekgwa e mebotse. Batswadi ba ka ba ile ba kopana le baromiwa ba Mamormon nywageng e mene pele ke belegwa. Ka ge ba be ba kgahlilwe ke go bona kamoo ba bego ba apara gabotse le go itokiša ka gona, go se go ye kae batswadi ba ka ba ile ba dira phetho ya gore lapa lešo le be le tla ba gare ga malapa a pele a sehlakahlakeng a go ba ditho tša Kereke ya Jesu Kriste ya Bakgethwa ba Matšatši a Morago, goba Kereke ya Mormon.

Ge ke be ke dutše ke gola, ke be ke thabela bogwera kerekeng gomme ke hlompha tsela yeo ka yona Mamormon a bego a lebiša tlhokomelo bophelong bja lapa le ditekanyetšong tša boitshwaro. Ke be ke ikgantšha ka go ba Momormon ka ba ka ipeela pakane ya go ba moromiwa wa gona.

Ge ke be ke ena le nywaga e 18, lapa lešo le ile la hudugela United States ka morero wa gore ke yo tšwetša pele dithuto tša ka kholetšheng. Mo e ka bago ka morago ga ngwaga, malome le mogatšamalome, bao e lego Dihlatse tša Jehofa, ba ile ba re etela kua Florida. Ba ile ba re laletša gore re ye le bona kopanong yeo go bolelwago ka Beibele. Ke be ke kgahlilwe ke gore batho ka moka bao ba bego ba ntikologile ba be ba bula le go bala mangwalo e bile ba ngwala dintlha. Ka gona ke ile ka kgopela pene le pampiri gomme le nna ka thoma go dira bjalo.

Ka morago ga kopano mogatšamalome le malome ba ile ba mpotša gore ka ge ke be ke kgahlegela go ba moromiwa, ba be ba ka nthuša go ithuta se sengwe ka Beibele. Ke ile ka tšea seo e le kgopolo e botse ka gobane ka nako yeo, ke be ke tseba kudu ka Puku ya Mamormon go e na le go tseba ka Beibele.

KAMOO BEIBELE E FETOTŠEGO BOPHELO BJA KA:

Nakong ya ge re be re boledišana ka Beibele mogaleng, mogatšamalome le malome ba be ba dula ba nkgothaletša gore ke bapiše ditumelo tša ka le dithuto tša Beibele. Ba be ba nyaka gore ke itlhatselele therešo.

 Go be go na le dilo tše dintši mabapi le tumelo ya Mamormon tšeo ke bego ke di amogetše, eupša ke be ke tloga ke sa kgodišege gore Mangwalo a be a sepedišana bjang le dikgopolo tšeo. Mogatšamalome o ile a nthomela tokollo ya November 8, 1995, ya makasine wa Phafoga! (ya Seisemane), yeo e gatišišwego ke Dihlatse tša Jehofa, yeo e bego e na le dihlogo tše itšego tša mabapi le tumelo ya Mamormon. Ke be ke makaditšwe ke gore ke be ke sa tsebe tše dintši tša dithuto tša Mamormon. Seo se ile sa ntutueletša gore ke dire nyakišišo Wepesaeteng ya Mamormon ya semmušo bakeng sa go kgonthišetša gore seo se bego se bolelwa ka go Phafoga! e be e le therešo. E be e le therešo, gomme ditherešo tšeo di ile tša tiišetšwa le ke ge ke be ke etela mebusiamo ya Mamormon kua Utah.

Ke be ke dutše ke dumela gore Puku ya Mamormon le Beibele di be di dumelelana. Eupša ge ke thoma go bala Beibele ka kelohloko, ke ile ka lemoga go thulana ga dithuto tša Mamormon le dithuto le mantšu ao a lego ka Beibeleng. Ka mohlala, go Hesekiele 18:4, Beibele e bolela gore moya o a hwa. Lega go le bjalo, Puku ya Mamormon, go Alma 42:9, e re: “Moya o ka se hwe le ka mohla.”

Go oketša tabeng ya go thulana ga dithuto, ke be ke tshwenywa ke dikgopolo tša botšhaba tšeo di rutwago ke Mamormon. Ka mohlala, Mamormon a rutwa gore serapa sa Edene se be se le Seleteng sa Jackson, Missouri, U.S.A. Le gona, baporofeta ba dikereke ba re ge “Mmušo wa Modimo o tla be o thoma go buša, folaga ya United States e tla dula e phaphasela ka boikgantšho e le koteng ya folaga ya tokologo le ditshwanelo tše di lekanago.”

Ke be ke ipotšiša gore naga yeo ke belegetšwego go yona—goba naga le ge e le efe e nngwe—e be e tla diragalelwa ke eng. Ke ile ka botšiša ka taba ye poledišanong mantšiboeng a mangwe ge ke be ke leleditšwe ke mofsa wa Momormon yo a bego a tlwaeletšwa go ba moromiwa. Ke ile ka mmotšiša ka go lebanya ge e ba a be a ikemišeditše go ka lwa le Mamormon a mangwe ge dinaga tša gabo bona di be di ka lwa. Ke ile ka makala ge a be a araba ka gore ee! Ke ile ka fatišiša dithutong tša tumelo ya ka gomme ka ba ka ya go baetapele ba nago le boikarabelo ba Mamormon. Ke ile ka botšwa gore dikarabo tša dipotšišo tša ka e be e le diphiri tšeo di bego di tla utologa ka letšatši le lengwe ge seetša se dutše se phadima ganyenyane-ganyenyane.

Ka ge ke be ke nyamišitšwe ke tlhaloso ya bona, ke ile ka itekola le go lekola lebaka la ka la go nyaka go ba moromiwa wa Momormon. Ke ile ka lemoga gore ke be ke kgahlwa ke kgopolo ya go ba moromiwa go fo swana le ge ke be nka kgahlwa ke go thuša batho ka tsela le ge e le efe. Ke ile ka kgahlwa le ke go ba le maemo setšhabeng mo go bego go tla tlišwa ke go ba moromiwa. Eupša ke be ke tloga ke sa tsebe gakaalo ka Modimo. Gaešita le ge ke be ke ile ka phetla Beibele gantši nakong e fetilego, ke be ke sa nape ke e tšeela godimo gakaalo. Ke be ke sa tsebe morero wa Modimo ka lefase goba batho.

KAMOO KE ILEGO KA HOLEGA KA GONA:

Ka go ithuta ga ka Beibele le Dihlatse tša Jehofa, gare ga dilo tše dingwe tšeo ke ithutilego tšona ke ithutile leina la Modimo, seo se diregago lehung le tema yeo Jesu a e kgathago go phethagatšeng morero wa Modimo. Ke ile ka feleletša ke tlwaelana le puku ye e botse, gomme ke be ke thabela go boledišana le ba bangwe ka ditherešo tšeo ke bego ke ithuta tšona. Ke be ke dutše ke tseba gore Modimo o gona, eupša ga bjale ke be ke kgona go bolela le yena ka thapelo e le Mogwera wa ka wa paale. Ke ile ka kolobetšwa ka ba yo mongwe wa Dihlatse tša Jehofa ka July 12, 2004, gomme ka morago ga dikgwedi tše tshela ka thoma go šoma ka nako e tletšego bodireding bja Bokriste.

Ke tšere nywaga e mehlano ke šoma ntlongkgolo ya lefase ya Dihlatse tša Jehofa kua Brooklyn, New York. Ke ile ka thabela ka botlalo go kgona go thuša tšweletšong ya Dibeibele le dikgatišo tše di theilwego Beibeleng tšeo di thušago ba dimilione lefaseng ka moka, e bile ke tšwela pele ke thabela go thuša ba bangwe go ithuta ka Modimo.