Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI JANUARY 2013

 BATAMELA KGAUSWI LE MODIMO

“Wa di Utollela Bana”

“Wa di Utollela Bana”

Na o nyaka go tseba therešo ka Modimo—gore ke mang le seo a lego sona gotee le seo thato ya gagwe e lego sona? Ka Lentšung la gagwe, Beibele, Jehofa Modimo o utolla therešo e feletšego ka yena. Eupša ga e fo ba mang le mang yo a ka balago Beibele gomme a kwešiša therešo yeo ka botlalo. Ka baka la’ng? Ka gobane go kwešiša therešo e bjalo ya moya ke tokelo, ga se mang le mang yo a e hwetšago. Anke re eleng hloko seo Jesu a se boletšego mabapi le taba ye.—Bala Mateo 11:25.

Temana yeo e thoma ka mantšu a rego: “Ka nako yeo Jesu a re.” Ka gona, seo Jesu a bego a tla tloga a se bolela mohlomongwe se be se le mabapi le seo se bego se sa tšwa go direga. O be a fetša go kgalemela batho bao ba sa arabelego ba metse e meraro ya Galilea moo a bego a dirile mediro e matla. (Mateo 11:20-24) Mo gongwe o ka ipotšiša gore: ‘Ke bjang motho a ka bonago mehlolo yeo Jesu a e dirilego gomme a se arabele ditherešong tšeo Jesu a bego a di ruta?’ Go se arabele ga batho go be go bakwa ke go ngangabala ga dipelo tša bona.—Mateo 13:10-15.

Jesu o be a tseba gore go kwešiša ditherešo tšeo di lego ka Beibeleng go be go nyaka dilo tše pedi: Thušo ya Modimo le boemo bjo bo swanetšego bja pelo. Jesu o hlalosa gore: “Ke go tumiša phatlalatša wena Tate, Morena wa legodimo le lefase, gobane o utetše ba bohlale le ba tlhaologanyo dilo tše gomme wa di utollela bana.” Na o bona lebaka leo ka lona go kwešiša therešo ya dilo tša moya e hwetšwago ka Beibeleng go ka tšewago e le tokelo? Jehofa o na le tshwanelo ya go dira phetho ya gore ke mang yo a ka mo utollelago therešo, ka gobane ke “Morena wa legodimo le lefase.” Eupša Modimo ga a na kgethollo ge go tliwa tabeng ya gore o utollela mang. Ke motheong ofe moo a utollelago bangwe ditherešo tša Beibele gomme ba bangwe a sa ba utollele tšona?

Jehofa o rata batho bao ba ikokobeditšego, e sego bao ba ikgogomošago. (Jakobo 4:6) O utela “ba bohlale le ba tlhaologanyo” therešo—ba bohlale ka tsela ya lefase le ba rutegilego bao ka go ikgantšha le go ipota ga bona ba sa bonego ba nyaka thušo. (1 Bakorinthe 1:19-21) Eupša o utollela “bana” therešo—bao ba tlago go yena ka dipelo tše botegago, ba bontšha boikokobetšo bjalo ka bana. (Mateo 18:1-4; 1 Bakorinthe 1:26-28) Morwa wa Modimo, Jesu, o be a tseba batho ba mohuta woo. Baetapele ba bantši ba bodumedi bao ba ikgantšhago le ba rutegilego kudu ba be ba sa kwišiše seo molaetša wa Jesu o bego o se bolela, eupša barei ba dihlapi bao ba ikokobeditšego ba ile ba o kwešiša. (Mateo 18:1-4; 1 Bakorinthe 1:26-28) Ka nako e swanago, ba bangwe bao ba bego ba humile e bile ba rutegile bao ba ilego ba bontšha boikokobetšo bja kgonthe ba ile ba ba balatedi ba Jesu.—Luka 19:1, 2, 8; Ditiro 22:1-3.

Re boela potšišong yeo e rotošitšwego mathomong e rego: Na o nyaka go tseba therešo ka Modimo? Ge e ba go le bjalo, o ka homotšwa ke go tseba gore Modimo ga a kgahlwe ke bao ba itšeago ba le bohlale ka tsela ya lefase. Ka mo go fapanego, o rata bao ba tšeelwago fase ke bao ba ipotšago gore ba bohlale go ya ka tsela ya lefase. Ge e ba o ithuta Lentšu la Modimo o ena le boemo bjo bo nepagetšego bja pelo le bja monagano, o ka ba gare ga bao Jehofa a ba neago mpho e bohlokwa kudu—e lego go kwešiša therešo ka yena. Go kwešiša therešo yeo go tla dira gore bophelo bja gago bo be le morero gomme go ka lebiša “bophelong bja kgonthe”—bophelo bjo bo sa felego lefaseng le lefsa la go loka leo Modimo a le holofeditšego leo le lego kgauswi le go tla. *1 Timotheo 6:12, 19; 2 Petro 3:13.

Mmalo wa Beibele o šišintšwego bakeng sa January

Mateo 1-21

^ ser. 7 Dihlatse tša Jehofa di tla thabela go go thuša go ithuta therešo ka Modimo le merero ya gagwe. Di ithaopela go swarela batho dithuto tše di sa lefelelwego tša magae tša Beibele, di diriša puku ya Ke Eng Seo ge e le Gabotse Beibele e se Rutago?