Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI DECEMBER 2012

 Batamela Kgauswi le Modimo

Na o ka ‘Pukung ya Modimo ya Kgopotšo’?

Na o ka ‘Pukung ya Modimo ya Kgopotšo’?

NA Jehofa o lemoga maiteko a barapedi ba gagwe a go mo kgahliša? Ee, o a a lemoga! Eupša o kgona go lemoga le go feta le ditiro tša bona tšeo di sepedišanago le thato ya Modimo le mantšu a bona a tumišo. Jehofa o bona le ge ba nagana ka yena ka tebogo. Go feta moo, Jehofa le ka mohla a ka se lebale batho ba gagwe le ditiro tša bona. Re ka kgodišega bjang ka seo? Karabo e hwetšwa mantšung ao a ngwadilwego ke moporofeta Maleaki.—Bala Maleaki 3:16.

Lekgolong la bohlano la nywaga B.C.E., ge Maleaki a be a porofeta, boemo bja boitshwaro le bja bodumedi kua Isiraele bo be bo šišimiša. Baperisita ba be ba hlokomologa mešomo ya bona, gomme batho ka kakaretšo ba dira dilo tše hlomphollago Modimo tše bjalo ka boloi, bohlotlolo le go hlalefetša. (Maleaki 2:8; 3:5) Lega go le bjalo, gare ga tshenyego yeo go be go na le sehlopha sa Baisiraele seo se ilego sa dula se botega. Ke eng seo se bego se se dira?

Maleaki o hlalosa gore: “Bao ba boifago Jehofa ba be ba boledišana seng sa bona.” Go boifa Modimo ke seka se sebotse. Maleaki mo o hlalosa Baisiraele bao ba bego ba hlompha Modimo ka tlhompho e tseneletšego e bile ba boifa go se mo kgahliše. Ela hloko gore batho ba boifago Modimo ba be ba “boledišana seng sa bona.” Go molaleng gore ba be ba bokana gore ba bolele gabotse ka Jehofa le go kgothatšana, e le gore ba se ke ba nolwa moko le go šilafatšwa ke tshenyo yeo e bego e ba dikologile.

Baisiraele bao ba botegago ba ile ba bontšha tlhompho go Jehofa ka tsela e bohlokwa: Ke “bao ba sa lebalego leina la gagwe.” Phetolelo e nngwe e re “go tšeela leina la Gagwe godimo.” Bao ba bego ba boifa Modimo ba be ba godiša Jehofa le ka menagano ya bona. Ka dipelong tša bona, ba be ba nagana ka tebogo, goba ba naganišiša, ka Jehofa le leina la gagwe le le phagamego. Na Jehofa o be a lemoga seo ba bego ba se dira?

Maleaki o re: “Jehofa yena a ba theetša le go ba kwa.” A le bodulong bja gagwe bjo bo phagamego bja legodimong, ge e le gabotse, Jehofa o ile a bula ditsebe tša gagwe a theetša gomme a kwa mantšu ka moka a tumišo ao bahlanka ba gagwe ba bego ba boledišana ka ona. O ile a ba a šetša dilo tša ka sephiring tšeo ba bego ba naganišiša ka tšona. (Psalme 94:11) Eupša o ile a dira se se fetago go fo ela hloko mantšu a bona a botse le menagano.

Maleaki o re: “Puku ya kgopotšo ya ngwalwa pele ga gagwe.” Puku yeo ke pego ya bohle bao ba ilego ba hlankela Jehofa ka potego. Ela hloko gore e bitšwa “puku ya kgopotšo.” * Se se re botša gore Jehofa le ka mohla a ka se lebale bahlanka ba gagwe bao ba botegago le tšohle tšeo ba di dirilego gore ba mo kgahliše—ditiro tšohle tše botse, mantšu le menagano. Eupša Modimo o na le lebaka la go ba gopola. O holofetša go putsa ka bophelo bjo bo sa felego bao maina a bona a ka se phumolwego ka pukung ya gagwe ya kgopotšo. *Psalme 37:29.

Ke mo go homotšago kudu go tseba gore Jehofa o tšeela godimo sohle seo re se dirago gore re mo hlankele ka tsela yeo a e amogelago! Mantšu a Maleaki 3:16 a swanetše go dira gore re naganišiše ka mo go tseneletšego ka tswalano ya rena le Jehofa. Re dira gabotse go ipotšiša gore, ‘Na leina la ka le ka gare ga “puku [ya Modimo] ya kgopotšo”?’ Le ka ba gona ge e ba letšatši le letšatši re dira sohle seo re ka se kgonago go phela, go bolela le go nagana ka tsela yeo Jehofa a ka nyakago go le gopola.

Mmalo wa Beibele o šišintšwego bakeng sa December:

Nahume 1-3Maleaki 1-4

^ ser. 8 Lentšu la Seheberu la “kgopotšo” le bolela se se fetago go fo gopola selo se itšego. Gape le ka šupa go tšea kgato e itšego ka seo se gopolwago.

^ ser. 8 Bakeng sa tsebišo e oketšegilego ka kholofetšo ya Modimo ya bophelo bjo bo sa felego, bona kgaolo 3 ya puku ya Ke Eng Seo ge e le Gabotse Beibele e se Rutago? e gatišitšwego ke Dihlatse tša Jehofa.