Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami  |  December 2012

 Babadi ba Rena ba a Botšiša . . .

Ke ka Baka la Eng Batho ba Bangwe ba sa Keteke Keresemose?

Ke ka Baka la Eng Batho ba Bangwe ba sa Keteke Keresemose?

Lefaseng ka bophara, batho ba e nyakilego go ba ba dimilione tše dikete tše pedi ba keteka Keresemose ngwaga le ngwaga ka December 25, mola bonyenyane ba bangwe ba dimilione tše 200 ba keteka matswalo a Jesu Kriste ka January 7. Lega go le bjalo, go na le ba bangwe ba dimilione bao ba kgethago go se keteke Keresemose ka mo go feletšego. Ka baka la’ng?

Lebaka le lengwe ke ka gobane e ka ba e le ba bodumedi bjoo e sego karolo ya Bojakane. Ka mohlala, e ka ba e le Bajuda, Mahindu, goba ba tumelo ya Boshinto. Ba bangwe ba bjalo ka bailamodimo, ma-agnostic, bao ba inaganelago ka bolokologi, goba bao ba lwelago tsošološo ya setho, ba lebelela taba ya Keresemose e le nonwane.

Lega go le bjalo, se se makatšago ke gore batho ba bantši bao ba dumelago go Jesu ba gana metlwae ya nakong ya Keresemose. Ka baka la’ng? Ba nea mabaka a mane.

La pele, ga ba dumele gore Jesu o be a belegwe ka December goba ka January. Beibele ga e nee letšatšikgwedi le le lebanyago. E fo bolela gore: “Tikologong yona yeo go be go bile go na le badiši bao ba bego ba dula merakeng ba dišitše mehlape ya bona bošego. Gateetee morongwa wa Jehofa a ema kgauswi le bona, . . . gomme . . . morongwa a re go bona: ‘ . . . Lehono le belegetšwe Mophološi, yo e lego Kriste Morena.’”—Luka 2:8-11.

Ditherešo di bontšha gore Jesu o belegwe mo e ka bago mathomong a kgwedi ya October ge badiši le mehlape ya bona ba tla ba ba sa dula merakeng bošego. Metse yeo e dikologilego Betlelehema e tonya wa go šiiša dikgweding tša December le January. Ka baka leo, mehlape e šireletšwa ka go tswalelelwa e le gore e ruthele bošego.

Lebaka la bobedi: Tiragalo e nnoši yeo Jesu a laetšego barutiwa ba gagwe ka go lebanya gore ba e gopole ke lehu la gagwe, e sego matswalo a gagwe, le gona se se be se swanetše go dirwa ka sejo se bonolo sa mohlakanelwa. (Luka 22:19, 20) Ela hloko gape gore Diebangedi tša Mareka le Johane ga di bolele selo ka matswalo a Jesu.

Tiragalo e nnoši yeo Jesu a laetšego balatedi ba gagwe ka go lebanya gore ba e gopole ke lehu la gagwe, e sego matswalo a gagwe

Lebaka la boraro: Ga go na bohlatse bja histori bjo bo bontšhago gore Bakriste ba pele ba ile ba keteka matswalo a Kriste. Eupša ba ile ba gopola lehu la gagwe. (1 Bakorinthe 11:23-26) Ke feela ka morago ga nywaga ya ka godimo ga e 300 Jesu a belegwe moo Bojakane bo ilego bja thoma go keteka Keresemose semmušo ka December 25. Seo se tanyago kgahlego ke gore bogareng bja lekgolo la bo-17 la nywaga, palamente e ile ya ntšha taelo ya go thibela go ketekwa ga Keresemose kua Engelane. Kua United States, Kgoro ya Tsheko ya Kakaretšo ya Massachusetts e ile ya dira se se swanago. Ka baka la’ng? Puku ya The Battle for Christmas, e re: “Ga go na lebaka la Beibele goba la histori la go bea letšatši la Jesu la matswalo ka December 25.” E oketša ka gore go ma-Puritan, “Keresemose e be e fo ba monyanya wa boheitene woo o apešitšwego Bokriste.”

Seo se re tliša lebakeng la bone: Mathomo a sa kgahlišego a go ketekwa moo. Keresemose e thomile morago kua motseng wa boheitene wa Roma le motswakong wa menyanya ya wona ya go hlompha modimo wa temo Saturn le modimo wa letšatši Sol Invictus, goba Mithra. Diithuti tša setlogo sa batho Christian Rätsch le Claudia Müller-Ebeling, bao bobedi e lego bangwadi ba puku ya Pagan Christmas, ba ngwala gore: “Go swana le metlwae le ditumelo tše dintši tša mehleng ya pele ga Bokriste, monyanya wa kgale wa ngwaga le ngwaga wa go gopola go boa ga letšatši ga bjale o be o dirišetšwa go keteka matswalo a Kriste.”

Go ya ka seo se boletšwego ka mo godimo, na o kgona go bona lebaka la Bakriste ba therešo la go se keteke Keresemose?