Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI DECEMBER 2012

  Ithute Lentšung la Modimo

Ke ka Baka la Eng Modimo a Ile a Romela Jesu Lefaseng?

Ke ka Baka la Eng Modimo a Ile a Romela Jesu Lefaseng?

Sehlogo se se ahlaahla dipotšišo tšeo o ka bago o ile wa di botšiša le go go bontšha moo o ka balago dikarabo gona ka Beibeleng ya gago. Dihlatse tša Jehofa di tla thabela go ahlaahla dikarabo tše le wena.

 1. Jesu o be a le kae pele Modimo a mo romela lefaseng?

Jesu o phetše e le motho wa moya legodimong pele a ka belegwa Betlelehema. E be e le tlholo ya pele ya Modimo e bile e le yena feela yoo Modimo a mmopilego ka boyena. Ka baka leo, o bitšwa ka mo go swanetšego gore ke Morwa yo a tswetšwego a nnoši wa Modimo. Kua legodimong, gantši o be a bolela e le moemedi wa Modimo. Ke ka baka leo a bitšwago Lentšu. Le gona o ile a šoma e le mothuši wa Modimo a ba a tšea karolo go bopšeng ga dilo tše dingwe ka moka. (Johane 1:2, 3, 14) Jesu o be a phetše le Modimo legodimong ka nywaga e mentšintši pele batho ba ka bopša.—Bala Mika 5:2; Johane 17:5.

 2. Modimo o rometše Morwa wa gagwe lefaseng bjang?

Jehofa o ile a fetišetša bophelo bja Jesu ka popelong ya Maria go tšwa legodimong a diriša moya o mokgethwa. Ka baka leo, Jesu o ile a belegwa ntle le thušo ya tate wa motho. Barongwa ba ile ba tsebiša badiši ba motseng woo ka matswalo a Jesu, bao ba bego ba dula merakeng bošego ba dišitše mehlape ya bona. (Luka 2:8-12) Ka go re’alo, Jesu ga se a belegwa maregeng a tonyago kudu, eupša a ka ba a belegwe mathomong a October, ge boemo bja leratadima bo sa ruthetše. Nakong e itšego ka morago, Maria le monna wa gagwe, Josefa, ba ile ba tšea Jesu ba mo iša motseng wa gabo bona wa Natsaretha gomme ba mo godišetša moo. Josefa o ile a hlokomela Jesu bjalo ka morwa wa gagwe yo a mo thwetšego.—Bala Mateo 1:18-23.

Ge Jesu a be a ena le nywaga e 30, o ile a kolobetšwa gomme Modimo a tsebiša phatlalatša gore Jesu e be e le Morwa wa gagwe. Ke moka Jesu o ile a thoma modiro woo Modimo a bego a mo rometše go o dira.—Bala Mateo 3:16, 17.

 3. Ke ka baka la eng Modimo a ile a romela Jesu lefaseng?

Modimo o be a rometše Jesu gore a rute batho therešo. Jesu o ile a ruta ka Mmušo wa Modimo, e lego pušo ya legodimong yeo e tla tlišago khutšo lefaseng ka bophara. O ile a nea kholofelo ya bophelo bjo bo sa felego. (Johane 4:14; 18:36, 37) Jesu gape o ile a ruta batho dilo tše dintši mabapi le go hwetša lethabo la kgonthe. (Mateo 5:3; 6:19-21) O ile a ruta ka mohlala wa gagwe. Ka mohlala, o ile a bontšha kamoo thato ya Modimo e ka dirwago ka gona gaešita le maemong a thata. Ge a be a swarwa gampe, ga se a ka a itefeletša.—Bala 1 Petro 2:21-24.

Jesu o ile a ruta balatedi ba gagwe lerato la boikgafo. O be a ile a ba le maemo a kgethegilego legodimong a ena le Tatagwe, lega go le bjalo o ile a kwa Tatagwe ka boikokobetšo gomme a tla lefaseng go tlo phela le batho. Ga go na motho yoo a bego a ka bea mohlala o mobotse kudu wa lerato go feta Jesu.—Bala Johane 15:12, 13; Bafilipi 2:5-8.

 4. Ke eng seo Jesu a se fihleletšego ka go hwa ga gagwe?

Modimo gape o ile a romela Jesu gore a tlo hwela dibe tša rena. (Johane 3:16) Re badiradibe ka moka ga rena, e lego seo se rago gore ga se ra phethagala e bile re na le sebe. Ke ka baka leo re babjago le go hwa. Go fapana le moo, monna wa pele, Adama, o be a phethagetše. O be a se na sebe e bile o be a ka se tsoge a hwile goba go babja. Eupša o ile a lahlegelwa ke go phethagala ga gagwe ge a be a sa kwe Modimo. Re abetše sebe go tšwa go Adama gotee le ditlamorago tša sona, e lego lehu.—Bala Baroma 5:12; 6:23.

Jesu, yoo e bego e le motho yo a phethagetšego, ga se a ka a hwela dibe tša gagwe. O hwetše dibe tša rena. Lehu la Jesu le dira gore re kgone go hwetša bophelo bjo bo sa felego le go šegofatšwa ke Modimo.—Bala 1 Petro 3:18.

Ithute ka mo go oketšegilego

Jesu Kriste ke Mang?

Ithute lebaka leo Jesu e bego e le Mesia yo a holofeditšwego, moo a tšwago gona le lebaka leo e lego Morwa a nnoši wa Modimo.

Topollo—Mpho e Kgolo Kudu ya Modimo

Topollo ke eng? E bolela’ng go wena?