Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami  |  December 2012

 Ruta Bana ba Gago

Jothama o Ile a Dula a Botegela Jehofa go sa Šetšwe Mathata a ka Gae

Jothama o Ile a Dula a Botegela Jehofa go sa Šetšwe Mathata a ka Gae

GE MOTSWADI a kgetha go kgaotša go hlankela Modimo wa therešo, Jehofa, seo se ka thatafaletša ngwana bophelo. Anke re boleleng ka Jothama. Re tla kwa ka mathata ao a ilego a lebeletšana le ona ka gae ge a be a sa gola.

Tatago Jothama, e lego Usia, e be le ke kgoši ya Juda. E be e le monna yo matla kudu nageng. Usia o be a bile kgoši e botse ka nywaga e mentši, gaešita le pele Jothama a ka belegwa. Eupša ka morago, ge Jothama e be e sa le yo monyenyane, Usia o ile a thoma go ikgogomoša gomme a roba Molao wa Modimo. Ka gona Modimo o ile a mo otla ka lephera, bolwetši bjo bošoro. Na o a tseba gore Jothama o ile a dira’ng ka nako yeo? *

Jothama o ile a tšwela pele a hlankela Jehofa. Mohlomongwe mmagwe, e lego Jerusha, o ile a mo thuša. Lega go le bjalo, Jothama a ka no ba a ile a thatafalelwa ke go dula a botegela Jehofa ka morago ga ge tatagwe, Usia, a rakilwe ntlong ya Jehofa.

Go thwe’ng ge e ba tatago goba mmago a be a ka kgaotša go rapela Jehofa? Ga go pelaelo gore seo se be se tla go thatafalela.— Eupša ga se phošo go nagana gore o be o tla dira eng ge e ba tatago goba mmago a be a ka kgaotša go rapela Jehofa. Go hlahloba seo Dafida a se ngwadilego ka Beibeleng go re bontšha se.

Tatago Dafida, e lego Jese, e be e le monna yo a lokilego. O be a hlankela Jehofa, e bile re ka kgodišega gore Dafida o be a rata tatagwe. Eupša Dafida o ile a ithuta go rata Jehofa go  feta kamoo a bego a rata Jese ka gona. Anke re bone gore re tseba se bjang.

Hle anke o phetle ka Beibeleng ya gago go Psalme 27:10. Mo Dafida o ngwadile gore: “Le ge tate le mma ba ka ntlogela, Jehofa yena o tla nkamogela.” Nagana ka se: Seo Beibele e se bolelago ke gore ge e ba tatago Dafida, e lego Jese, goba mmagwe a be a ka kgaotša go hlankela Jehofa, Dafida yena o be a tla tšwela pele a Mo hlankela.

Go thwe’ng ka wena? Na o be o tla tšwela pele o hlankela Jehofa le ge e ba tatago goba mmago a sa mo hlankele?— Ye ke potšišo e botse yeo o ka ipotšišago yona. Lebaka la se le mabapi le taelo e bohlokwa kudu ka Beibeleng. Yona e re: “O rate Jehofa Modimo wa gago ka pelo ya gago ka moka, ka moya wa gago ka moka le ka monagano wa gago ka moka.”

Taelo ye e bolela gore re swanetše go botegela Jehofa gaešita le ge go le thata go dira bjalo. O nagana gore ke mang yo a nyakago gore re kgaotše go hlankela Jehofa?— Ke lenaba la Modimo e lego Sathane Diabolo. Jesu o mmiditše gore ke “mmuši wa lefase le.” Beibele gape e re ke “modimo wa lefase le.” Na re swanetše go boifa Sathane?

Aowa, ga se ra swanela go mmoifa. Go e na le moo, re swanetše go gopola gore Jehofa o feta Sathane ka matla. Jehofa o tla re šireletša ge e ba re mmota. Bala ka Beibeleng ya gago kamoo Jehofa a ilego a šireletša Dafida go Goliata yo a boifišago wa tšitširipa. Le wena Jehofa a ka go šireletša ge e ba o dula o mmotegela.

^ ser. 4 Ge e ba o bala le ngwana, thaladi ke ya go go gopotša gore o khutše gomme o kgothaletše ngwana go ntšha sa mafahleng.