Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI DECEMBER 2012

Go Gopola Jesu Kriste

Go Gopola Jesu Kriste

“Dulang le dira se e le go nkgopola.”—LUKA 22:19.

Lebaka la ba bangwe la go keteka Keresemose.

Ge ba bangwe ba bolela mabapi le Keresemose ba re Jesu ke “lebaka la sehla seo.” Ba keteka Keresemose bakeng sa go gopola matswalo a Jesu.

Ke ka baka la eng e le tlhohlo?

Mmino o tumilego wa Keresemose le metlwae e mentši ya Keresemose ga di bolele gakaalo ka Jesu Kriste. Ba dimilione bao ba ketekago Keresemose ga ba dumele go yena; ba bangwe e bile ga ba dumele gore o kile a phela. Lefaseng la kgwebo, Keresemose e fetogile nako ya go bapatša dithoto go e na le go ba nako ya go gopola Jesu.

Ke melao efe ya motheo ya Beibele yeo e ka thušago?

“Morwa wa motho o tletše . . . go nea moya wa gagwe e le topollo bakeng sa ba bantši.” (Mareka 10:45) Go molaleng gore Jesu o boletše mantšu ao a tsopotšwego matsenong a sehlogo se bošegong bja pele a ehwa, e sego letšatšing la gagwe la matswalo. Mantšiboeng ao, o ile a hloma moletlwana wa go gopola lehu la gagwe. Lega go le bjalo, ke ka baka la’ng Jesu a ile a nyaka gore balatedi ba gagwe ba gopole lehu la gagwe e sego matswalo a gagwe? Ke ka gobane sehlabelo sa Jesu sa topollo se nea batho ba kwago sebaka sa go hwetša bophelo bjo bo sa felego. Beibele e re: “Moputso woo sebe se o lefago ke lehu, eupša mpho yeo Modimo a e neago ke bophelo bjo bo sa felego ka Kriste Jesu Morena wa rena.” (Baroma 6:23) Ka gona, ngwaga le ngwaga, letšatšing leo Jesu a hwilego ka lona, balatedi ba gagwe ga ba gopole Jesu Kriste e le lesea leo le sa kgonego go itirela selo, eupša ba mo gopola e le “mophološi wa lefase.”—Johane 4:42.

“Kriste o ile a tlaišega bakeng sa lena, a le tlogelela mohlala gore le latele dikgato tša gagwe kgauswi.” (1 Petro 2:21) Bakeng sa go hlompha Jesu le go mo gopola, o swanetše go ithuta mohlala wa gagwe bjalo ka motho yo a phethagetšego le yo bohlale. Le gona o naganišiše ka tsela yeo Jesu a bontšhitšego kwelobohloko, go se fele pelo le sebete sa go dira se se nepagetšego gomme o tsome dibaka tša go mo ekiša bophelong bja gago.

“Mmušo wa lefase o fetogile mmušo wa Morena wa rena le wa Kriste wa gagwe, o tla buša e le kgoši go iša mehleng ya neng le neng.” (Kutollo 11:15) Ge o gopola Jesu Kriste, ela hloko seo a se dirago gona bjale. Jesu o buša e le Kgoši ya legodimong. Lentšu la Modimo le porofetile ka Jesu gore: “O tla ahlola babotlana ka toko, a kgalema batho ba boleta ba lefase ka go loka.” (Jesaya 11:4) Dika tšeo tše di gogelago ga se tša leseana le le sa tšwago go belegwa, eupša ke tša Mmuši yo matla.