Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI DECEMBER 2012

Ba Hweditše Selo se Sekaone

Ba Hweditše Selo se Sekaone

BAKRISTE ba dimilione ba kgetha go se keteke Keresemose. Ba ikwa bjang ka phetho ya bona? Na ba bona eka go na le seo se ba lahlegelago? Na bana ba bona ba bona eka ba tingwa selo se itšego? Ela hloko seo Dihlatse tša Jehofa go dikologa lefase di se bolelago ka taba ye.

Eve

Go gopola Jesu Kriste: “Pele ke eba yo mongwe wa Dihlatse tša Jehofa, ke be ke eya kerekeng ka sewelo. Ge ke be ke eya, ke be ke eya feela ka Keresemose goba ka Easter. Lega go le bjalo, le nakong yona yeo ke be ke sa nape ke nagana ka Jesu Kriste. Ga ke sa keteka Keresemose, eupša ke ya dibokeng tša Bokriste gabedi ka beke e bile ke ruta ba bangwe seo Beibele e se bolelago ka Jesu!”—EVE, AUSTRALIA.

Reuben

Lethabo la go nea: “Ke thaba kudu ge batho ba mpha mpho ke sa e letela. Ke rata dilo tše sa letelwago! Le gona ke rata go direla batho ba bangwe dikarata le go ba thalela diswantšho ka gobane seo se ba thabiša kudu, e bile le nna se a nthabiša.”—REUBEN, LEBOA LA IRELAND.

Emily

Go thuša bahloki: “Re thabela go apeela balwetši dijo. Ka dinako tše dingwe re ba išetša matšoba, khekhe, goba mpho e nyenyane ya go ba thabiša. Re thabela se ka gobane re kgona go etela batho ba ka nako le ge e le efe mo ngwageng.”—EMILY, AUSTRALIA.

Wendy

Go ba gotee ga lapa: “Ge re kopana le ba leloko, bana ba rena ba tsebana le bomalome le borangwane, bommane le bommamogolo le borakgadi, bomakgolo le borakgolo, gotee le bomotswala go iketlilwe. Ka ge re sa gapeletšege go dira se ka matšatši a itšego a maikhutšo, ga re ikwe re gateletšegile, e bile ba leloko ba tseba gore re ba etela ka gobane re ba rata.”—WENDY, DIHLAKAHLAKENG TŠA CAYMAN.

Sandra

Khutšo: “Nakong ya Keresemose, go bonagala go ena le dilo tše dintši tšeo di dirwago moo e lego gore ke batho ba sego kae feela bao ba naganago ka khutšo. Ka ge ga bjale ke ithutile seo Beibele e se holofetšago batho, ke ikwa ke lokologile. Ga bjale ke kwešiša gore bana ba ka ba tla ba le bokamoso bjo bo thabišago.”—SANDRA, SEPANIA.