Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI NOVEMBER 2012

  Babadi ba Rena ba a Botšiša . . .

Na Tumelo ya Bodumedi ke Seikokotlelo?

Na Tumelo ya Bodumedi ke Seikokotlelo?

Seikokotlelo sa maikwelo ke tsela ya go iphora yeo e dirago gore motho a hlokomologe dilo tša kgonthe le go mo thibela go bea mabaka ka tsela e kwagalago. Ka mohlala, batho ba bangwe ba diriša bjala bjalo ka seikokotlelo. Mathomong, bjala bo ka ba dira gore ba ikwe ba ikholofela kudu e bile ba kgona go lebeletšana le mathata a bophelo. Eupša ge nako e dutše e eya, bao ba ikokotlelago ka bjala ba a ikgobatša. Na go ka bolelwa seo se swanago ka tumelo ya bodumedi?

Ba bangwe ba swantšha tumelo le go dumela tšohle. Ba bolela gore batho bao ba nago le tumelo ga ba nyake go inaganela goba go dumelela bohlatse bjo bo tiilego bo tutuetša ditumelo tša bona. Baswayadiphošo ba bjalo ba bontšha gore bao ba nago le tumelo e tiilego ya bodumedi ba hlokomologa seo e lego therešo.

Beibele e na le mo gontši mo e go bolelago ka tumelo. Lega go le bjalo, ga go na moo e re kgothaletšago go dumela tšohle goba go se šetše. E bile ga e kgothaletše go tšwafa go nagana. Ka mo go fapanego, e bitša batho bao ba dumelago mantšu ohle ao ba a kwago e le bao ba se nago temogo, gaešita le mašilo. (Diema 14:15, 18) Ruri e be e tla ba bošilo go amogela gore kgopolo e itšego ke therešo ka ntle le go nyakišiša dintlha ka botlalo! Seo se ka swana le go ikhupetša mahlo gomme ra leka go tshela tsela ya semphete-ke-go-fete feela ka gobane motho yo mongwe a re botša gore re dire bjalo.

Go e na le gore Beibele e kgothaletše go dumela tšohle, e re kgothaletša go dula re butše mahlo a rena a seswantšhetšo gore re se forwe. (Mateo 16:6) Re dula re butše mahlo a rena ka go diriša “matla a [rena] a tlhaologanyo.” (Baroma 12:1) Beibele e re tlwaetša go sekaseka bohlatse le go dira diphetho tše kwagalago tšeo di theilwego ditherešong. Ela hloko mehlala e itšego e hwetšwago mangwalong a moapostola Paulo.

Ge Paulo a be a ngwalela bao ba bego ba le phuthegong ya Roma, o be a sa nyake gore ba dumele go Modimo ka gobane a ba boditše gore ba dire bjalo. Go e na le moo, o ile a ba kgothaletša gore ba hlahlobe bohlatse bja gore Modimo ke motho wa kgonthe. O ngwadile gore: “Dika tša gagwe [Modimo] tše di sa bonagalego di bonwa gabotse go tloga tlholong ya lefase go ya pele, gobane di hlathwa ka dilo tšeo di dirilwego, ke gore matla a gagwe a neng le neng le Bomodimo bja gagwe, moo ba [bao ba ganago bolaodi bja Modimo] hlokago boitshwarelelo.” (Baroma 1:20) Paulo o dirišitše tsela e swanago ya go nea mabaka ge a be a ngwalela Baheberu lengwalo. O itše: “Ke therešo gore ntlo e nngwe le e nngwe e agwa ke motho, eupša yo a agilego dilo ka moka ke Modimo.” (Baheberu 3:4) Lengwalong leo a bego a le ngwaletše Bakriste ba dulago motseng wa Thesalonika, Paulo o ba kgothaleditše gore ba kgethe seo ba se dumelago. O be a nyaka gore ba “[kgonthišetše] dilo tšohle.”—1 Bathesalonika 5:21.

Tumelo e ka ba kotse ya go re šireletša

Tumelo ya bodumedi yeo e sa thewago bohlatseng bjo bo kgwagalago e ka fetoga seikokotlelo, seo se dirago gore motho a forwe gomme a tlaišege kudu. Paulo o ngwadile mabapi le batho ba bangwe ba bodumedi ba mehleng ya gagwe gore: “Ke ba hlatsela gore ba fišegela Modimo; eupša e sego go ya ka tsebo e nepagetšego.” (Baroma 10:2) Ka gona, go bohlokwa kudu gore re latele keletšo ya Paulo yeo a e neilego phuthego ya Roma! O ngwadile gore: “Fetogang ka go fetola menagano ya lena, e le gore le itlhatselele thato e botse le e amogelegago le e phethegilego ya Modimo.” (Baroma 12:2) Tumelo e theilwego tsebong e nepagetšego ka Modimo ga e fetoge seikokotlelo, eupša e ba “kotse e kgolo” yeo e re šireletšago gore re se gobale maikwelong le moyeng.—Baefeso 6:16.