Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami  |  November 2012

 Batamela Kgauswi le Modimo

“Ke Eng Seo Jehofa a go Kgopelago Sona?”

“Ke Eng Seo Jehofa a go Kgopelago Sona?”

KE ENG seo Jehofa a se letetšego go bao ba nyakago go mo rapela ka tsela yeo e amogelegago? Na o letetše phethagalo, e lego seo se dirago gore rena batho ba sa phethagalago re se kgone go mo kgahliša? Goba na o letetše feela seo re ka kgonago go se dira? Dikarabo tša dipotšišo tše di bohlokwa ge e ba re nyaka go hlankela Modimo ka lethabo. Anke re hlahlobe kamoo moporofeta Mika a ilego a akaretša dilo tšeo Modimo a di nyakago go rena.—Bala Mika 6:8.

“O go boditše se sebotse.” Ga ra swanela go inaganela seo Modimo a se letetšego go rena. O re boditše dilo tšeo a di nyakago go rena ka go di lokeletša ka Beibeleng. Seo Modimo a re kgopelago sona ke “se sebotse.” Go be go ka se be ka tsela e nngwe. “Modimo ke lerato,” ka gona o re kganyogela tše kaonekaone. (1 Johane 4:8; 5:3) Go latela seo a se nyakago ga go thabiše yena feela eupša gape go hola le rena.—Doiteronomio 10:12, 13.

“Ke eng seo Jehofa a go kgopelago sona?” Na Modimo o na le tshwanelo ya go kgopela selo le ge e le sefe go rena? Ee, o na le yona! Re swanetše go mo kwa ka ge e le Mothopo le Mothekgi wa maphelo a rena. (Psalme 36:9) Ka gona, ke eng seo a se kgopelago go rena? Mika o ile a akaretša seo Modimo a se nyakago go rena ka mafokwana a mararo. A mabedi a mathomo a akaretša ditirišano tša rena le batho ba bangwe gomme la boraro le akaretša tswalano ya rena le Modimo.

“Bontšha toka.” Go ya ka puku e nngwe ya ditšhupetšo, lentšu la Seheberu la “toka” le “akaretša ditswalano tše nepagetšego le tše lokilego setšhabeng.” Modimo o kgopela gore re sware ba bangwe ka tsela e nepagetšego le e lokilego go ya ka ditekanyetšo tša gagwe. Re ka bontšha toka ka go se be le kgethollo, ka go loka le go botega ge re dirišana le ba bangwe. (Lefitiko 19:15; Jesaya 1:17; Baheberu 13:18) Ge re swara ba bangwe ka toka, le bona ba ka tutueletšega go re swara ka toka.—Mateo 7:12.

“Go rata botho.” Modimo ga a kgopele gore re bontšhe botho feela eupša o re kgopela le gore re bo rate. Lentšu la Seheberu leo le fetoletšwego e le “botho” (che′sedh) gape le ka fetolelwa e le “lerato.” Seithuti se sengwe sa Beibele se re: “Lerato, kgaugelo le botho ke diphetolelo tše sa lekanago tša [che′sedh]; ga se setee sa dika tše, eupša ke tšona ka moka di kopane.” Ge e ba re rata botho, re bo bontšha ka boithatelo; re thabela go thuša bao ba nyakago thušo. Ka gona, re hwetša lethabo leo le tlišwago ke go nea.—Ditiro 20:35.

“Go ba le boipoetšo ge o sepela le Modimo wa gago.” Ka Beibeleng, lentšu “sepela” le bolela “go latela tsela e itšego ya go phela.” Re sepela le Modimo ka go latela tsela ya bophelo yeo a bolelago ka yona ka Beibeleng. Re swanetše “go ba le boipoetšo” ge re latela tsela yeo. Bjang? Ge re ena le boipoetšo pele ga Modimo, re hlahloba boemo bja rena pele ga gagwe ka tsela e kwagalago le go lemoga mafokodi a rena. Ka gona, “go ba le boipoetšo ge [re] sepela le” go bolela go ba le pono e kwagalago ka seo a se nyakago le ka seo re ka kgonago go mo nea sona.

Re leboga gore Jehofa le ka mohla ga a nyake sa go feta seo re ka kgonago go mo nea sona. O thabišwa ke ge re iteka ka gohle go mo hlankela. (Bakolose 3:23) O kwešiša mafokodi a rena. (Psalme 103:14) Ge le rena ka boipoetšo re ithuta go a amogela, re ka thabela go sepela le yena. Ke ka baka la’ng o sa ithute gore o ka thoma go sepela le Modimo bjang? Tsela e bjalo e tliša ditšhegofatšo tše tšwago go yena.—Diema 10:22.

Mmalo wa Beibele o šišintšwego bakeng sa November:

Joele 1-3Mika 1-7