Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI NOVEMBER 2012

Potšišo 3: Ke ka Baka la Eng Modimo a Dumelela ke Tlaišega?

Potšišo 3: Ke ka Baka la Eng Modimo a Dumelela ke Tlaišega?

TATAGO Ian o be a enwa kudu. Gaešita le ge Ian a gotše a hwetša dilo tše di bonagalago tšeo a bego a di nyaka, o be a sa hwetše thekgo ya maikwelo yeo a bego a kganyoga gore tatagwe a mo nee yona. Ian o re: “Ga se ka ka ka mo rata kudu, kudukudu ka baka la go nwa ga gagwe le tsela yeo a bego a swara mma ka yona.” Ge Ian a dutše a gola, o ile a thoma go belaela go ba gona ga Modimo. O re: “Ke be ke bea lebaka ka gore, ‘Ge e ba Modimo a le gona, ke ka baka la eng a dumelela gore batho ba tlaišege?’”

Ke ka baka la eng go botšišwa potšišo ye?

Gaešita le ge bophelo bja gago bo bonagala bo se na mathata, o ka ikwa o nyaka gore go bontšhwe toka ge o bona batho ba se nago molato ba tlaišega. Lega go le bjalo, potšišo ya mabapi le tlaišego e ka ba bohlokwa kudu ge e ba wena, go swana le Ian, o ena le mathata goba moratiwa wa gago a babja goba a ehwa.

Ba bangwe ba re karabo ke efe?

Ba bangwe ba dumela gore Modimo o dumelela tlaišego bakeng sa go re ruta go ba le boikokobetšo le kwelobohloko. Ba bangwe ba nagana gore batho ba tlaišega bophelong bjo bakeng sa dibe tšeo ba di dirilego bophelong bja bona bja nakong e fetilego.

Dikarabo tšeo di umaka eng?

Modimo ga a kgongwe ke tlaišego ya batho, e lego seo se dirago gore go be thata go mo rata. Modimo o sehlogo.

Ke eng seo Beibele e se rutago?

Beibele e bolela ka go lebanya gore Modimo ga a ikarabele ka tlaišego ya batho. “A go se be le yo a rego ge a lekwa a re, ke lekwa ke Modimo; ka gobane ga go kgonege gore Modimo a lekwe ke bobe, e bile yena ga a leke motho ka tsela yeo.” (Jakobo 1:13, The Bible in Basic English) Ge e le gabotse, kgopolo ya gore Modimo o ikarabela ka tlaišego ga e dumelelane le tsela yeo Beibele e hlalosago semelo sa Modimo ka yona. Bjang?

Se sengwe sa dika tše dikgolo tša Modimo ke lerato. (1 Johane 4:8) Go gatelela ntlha yeo, Beibele e bonagatša Modimo a ena le maikwelo a go swana le a mma yo a amušago. Modimo o botšiša ka gore: “Na mosadi a ka lebala ngwana wa gagwe yo a amušwago moo a bilego a ka se šokelego ngwana yo a tšwago mpeng ya gagwe? Gaešita le ge basadi ba ba ka lebala, fela nna nka se go lebale.”  (Jesaya 49:15) Na o ka akanya ka mma yo lerato a gobatša ngwana wa gagwe ka boomo? Ka mo go fapanego, motswadi yo a nago le tlhokomelo o tla leka go imolla ngwana wa gagwe tlaišegong. Ka mo go swanago, Modimo ga a bakele batho ba se nago molato tlaišego.—Genesi 18:25.

Lega go le bjalo, batho ba se nago molato ba a tlaišega. O ka ipotšiša gore, ‘Ge e ba Modimo a ena le taba le rena e bile a ena le matla ohle, ke ka baka la’ng a sa fediše dibaki tša tlaišego?’

Modimo o na le mabaka a kwagalago a go dumelela tlaišego e tšwela pele ga bjale. Ela hloko lebaka letee feela: Gantši ke batho bao ba tlaišago ba bangwe. Bomphenyašilo le bagateledi ba bantši bao ba kwešago ba bangwe bohloko ga ba nyake go fetoša ditsela tša bona. Ka gona gore Modimo a fediše sebaki se segolo sa tlaišego, o swanetše fediša batho ba bjalo.

Ge moapostola Petro a hlalosa lebaka leo ka lona Modimo a sego a hlwa a fediša badiri ba bobe o ngwadile gore: “Jehofa ga a diege mabapi le kholofetšo ya gagwe, go etša ge batho ba bangwe ba go tšea e le go diega, eupša ga a le felele pelo ka gobane ga a rate gore go fedišwe le ge e le mang, eupša o rata gore bohle ba fihlelele boitsholo.” (2 Petro 3:9) Go se fele pelo ga Jehofa Modimo ke pontšho ya gore o na le lerato gotee le kgaugelo.

Lega go le bjalo, go se go ye kae Jehofa Modimo o tla gata mogato. O tla “lefeletša ka tlaišego bao ba . . . tlaišago” ba se nago molato. Bao ba tlaišago ka go hloka toka ba tla “welwa ke kotlo ya kahlolo ya tshenyego ya ka mo go sa felego.”—2 Bathesalonika 1:6-9.

Ian, yo a tsopotšwego pejana, o ile a hwetša dikarabo tše di kgotsofatšago tša dipotšišo tša gagwe tša mabapi le tlaišego. Seo a ithutilego sona se ile sa fetoša pono ya gagwe ka bophelo. Bala pego ya gagwe go letlakala 13 la tokollo ye.

Ithute ka mo go oketšegilego

Ke ka Baka La’ng Modimo a Dumelela Tlaišego?

Batho ba bantši ba nagana gore Modimo ke yena a bakago tlaišego. Wena o nagana’ng? Ithute ka seo Modimo a rego se re bakela tlaišego