Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI NOVEMBER 2012

Potšišo 2: Go tla Direga Eng ge ke Ehwa?

Potšišo 2: Go tla Direga Eng ge ke Ehwa?

ROMAN e be e sa le mošemanyana ge mogwera wa gagwe wa paale a be a ehwa kotsing ya koloi. O re: “Go hlokofala ga mogwera wa ka go ile gwa nkhudua maikwelong o šoro. Ke tšere nywaga e mentši ka morago ga kotsi yeo ke ipotšiša gore go direga eng go rena ge re ehwa.”

Ke ka baka la eng go botšišwa potšišo ye?

Go hwa ga batho go bonagala go sa tlwaelege. Go sa šetšwe nywaga ya rena, ka tlwaelo ga re nyake go hwa. Ba bantši ba boifa seo se tlago go direga ka morago ga lehu.

Ba bangwe ba re karabo ke efe?

Batho ba bantši ba dumela gore ge motho a ehwa karolo e itšego ya gagwe e tšwela pele e phela. Ba dumela gore batho ba lokilego ba tla putswa legodimong, mola bao e bego e le ba babe ba tla otlwa ka mo go sa felego bakeng sa dibe tša bona. Ba bangwe ba nagana gore ge motho a ehwa o kgaotša go ba gona e bile o feleletša a lebetšwe ka mo go feletšego.

Karabo yeo e umaka eng?

Karabo ya pele e umaka gore ge motho a ehwa ga a hwe e le ka kgonthe. Ya bobedi e umaka gore bophelo ga bo na morero. Bao ba dumelago kgopolo ye ya mafelelo ba ka ba le kgopolo ye yeo e bolayago: “A re jeng gomme re nweng, gobane gosasa re tla hwa.”—1 Bakorinthe 15:32.

Ke eng seo Beibele e se rutago?

Beibele ga e rute gore ge motho a ehwa karolo e itšego ya gagwe e tšwela pele e phela. Modimo o buduletše Kgoši Solomone gore a ngwale gore: “Bao ba phelago ba a tseba gore ba tlo hwa; eupša ge e le bahu ga ba tsebe selo le gatee.” (Mmoledi 9:5) Bao ba sa ‘tsebego selo’ ba tloga ba sa lemoge dilo tšeo di ba dikologilego. Ga ba kgone go kwa goba go dira selo le ge e le sefe. Ka baka leo, bahu ba ka se thuše goba go gobatša bao ba phelago.

Go fapana le seo ba bantši ba se dumelago, Modimo o be a se a bopela batho gore ba hwe. O bopile motho wa mathomo, Adama, a ena le tebelelo ya go phela ka mo go sa felego mo lefaseng. Nako feela yeo ka yona Modimo a ilego a bolela ka lehu ke ge a be a botša Adama ka kotlo  ya go se kwe. O ile a iletša Adama go ja dienywa tša sehlare se itšego gomme a mo lemoša gore ge a be a ka di ja, o be a tla “hwa lehu.” (Genesi 2:17) Ge nkabe Adama le Efa ba ile ba dula ba ekwa, bona gotee le ditlogolo tša bona ka moka tšeo di bego di botegela Modimo ba be ba tla phela ka mo go sa felego mo lefaseng.

Adama o ile a kgetha go hlokomologa temošo ya Modimo. O ile a dira sebe ge a be a sa kwe Modimo, ka gona o ile a hwa. (Baroma 6:23) Ga go na karolo ya Adama yeo e phologilego lehu. Go e na le moo, ge Adama a be a ehwa o ile a kgaotša go ba gona. Modimo o boditše Adama gore: “O tla ja dijo ka kudumela ya sefahlego sa gago go fihlela o boela mmung, gobane o ntšhitšwe go wona. Gobane o lerole gomme o tla boela leroleng.” (Genesi 3:19) Ka ge batho ka moka ba etšwa go Adama, re abetše sebe le lehu go yena.—Baroma 5:12.

Go sa šetšwe kgetho e mpe ya Adama, Modimo o tla phethagatša morero wa Gagwe wa go tlatša lefase ka ditlogolo tša Adama. (Genesi 1:28; Jesaya 55:11) Go se go ye kae, Jehofa o tla tsoša bontši bja batho bao ba hwilego. Ge moapostola Paulo a bolela ka nako yeo o itše: “Go tla ba le tsogo ya ba lokilego gotee le ba sa lokago.”—Ditiro 24:15.

Roman, yo a tsopotšwego pejana, o ile a ithuta Beibele le seo e se rutago ka lehu le ka Jehofa Modimo. Seo a ithutilego sona se ile sa mo kgoma kudu. Bala pego ya gagwe go letlakala 11 la makasine wo.

Ithute ka mo go oketšegilego

Bahu ba Kae?

Ithute seo Beibele e se bolelago ka gore bahu ba kae le gore ke ka baka la’ng batho ba ehwa.

Na go na le Kholofelo ka Bahu?

Ke ka baka la eng Modimo a ka bušetša batho bao ba sa lokago bophelong?