Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI OCTOBER 2012

 Ithute Lentšung la Modimo

Na o ka Phela ka mo go sa Felego?

Na o ka Phela ka mo go sa Felego?

Sehlogo se se ahlaahla dipotšišo tšeo o ka bago o ile wa di botšiša le go go bontšha moo o ka balago dikarabo gona Beibeleng ya gago. Dihlatse tša Jehofa di tla thabela go ahlaahla dikarabo tša dipotšišo tše le wena.

1. Ke ka baka la eng bophelo bja rena bo bonala e le bjo bokopana?

Dikhudu tše dingwe di phela nywaga e 150, gomme dihlare tše dingwe di phela nywaga e 3 000. Bophelo bja batho ke bjo bokopana kudu ge bo bapetšwa le bja tšona. Lega go le bjalo, bophelo bja rena e ka ba bjo bo nago le morero kudu ge bo bapetšwa le bja khudu goba sehlare. Jehofa Modimo o bopile batho ba na le bokgoni bja go thabela mmino, dipapadi, go ja, go ithuta, go ya maeto le go kopana le batho ba bangwe. Modimo o tsentše ka dipelong tša rena kganyogo ya go phela ka mo go sa felego.—Bala Mmoledi 3:11.

2. Na ruri re ka phela ka mo go sa felego?

Jehofa o phela ka mo go sa felego. Ga a hwe. Ke Mothopo wa bophelo, ka gona a ka fa ba bangwe bophelo bjo bo sa felego. (Psalme 36:9; Habakuku 1:12) Go feta moo, o holofeditše go nea bao ba mo kwago bophelo bjo sa felego. O tla fediša botšofadi.—Bala Jobo 33:24, 25; Jesaya 25:8; 33:24.

Jesu o bontšhitše ka ditiro tša gagwe tše matla gore re ka bota kholofetšo ya Modimo ya bophelo bjo sa felego re phetše gabotse mmeleng. Jesu o fodišitše malwetši a mehutahuta le go tsoša batho bao ba bego ba hwile.—Bala Luka 7:11-15, 18, 19, 22.

 3. Bophelo bjo bo sa felego bo tla tla neng?

Modimo o nyaka re phela ka mo go sa felego lefaseng la paradeise, e sego lefaseng leo le tletšego kgatelelo le bošoro. O nyaka gore re ikwe re šireletšegile. (Psalme 37:9, 29; Jesaya 65:21, 22) Ge lefase le bušetšwa gore e be Paradeise, batho ba dimilione bao ba hwilego ba tla boela bophelong. Batho bao ba tsošitšwego bao ba kgethago go rapela Modimo le go mo kwa ba tla phela ka mo go sa felego.—Bala Luka 23:42, 43; Johane 5:28, 29.

4. Re ka hwetša bjang bophelo bjo bo sa felego?

Go tseba Modimo go swanelwa ke go dira maiteko

Bophelo bjo bo sa felego re ka bo hwetša feela go Modimo. Ka gona, re dira gabotse ka go mmatamela ka go hwetša tsebo ka yena. Beibele e swantšha go tseba Modimo le go ja. (Mateo 4:4) Go ja go bose, eupša go hwetša le go lokišetša dijo tša rena go nyaka maiteko. Ka mo go swanago, go ja dijo tša moya go nyaka maiteko. Eupša ke’ng seo se ka holago go phala go batamela kgauswi le Modimo le go hwetša bophelo bjo bo sa felego?—Bala Luka 13:23, 24; Johane 6:27; 17:3.

Ithute ka mo go oketšegilego

Morero wa Modimo ka Lefase ke Ofe?

Na morero wa Modimo ka lefase o tla ka wa phethagala? Ge e ba go le bjalo o tla phethagala neng?