Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI OCTOBER 2012

 Poledišano le Moagišani

Na Modimo o Otla Batho Mollong wa Dihele?

Na Modimo o Otla Batho Mollong wa Dihele?

DIHLATSE TŠA JEHOFA di thabela go ahlaahla Beibele le baagišani ba tšona. Na o na le potšišo e itšego ya Beibele yeo e lego kgale o ipotšiša yona? Na o ipotšiša dipotšišo mabapi le ditumelo goba ditiro le ge e le dife tša bodumedi tša Dihlatse tša Jehofa? Ge e ba go le bjalo, o se ke wa dikadika go bolela ka taba yeo nakong e tlago ge o kopana le Hlatse. E tla thabela go boledišana le wena ka ditaba tše bjalo.

Se se latelago ke mohuta wa poledišano yeo Dihlatse tša Jehofa di ka bago le yona le moagišani. A re tšeeng gore Hlatse yeo e bitšwago Malose e etetše legaeng la monna yo a bitšwago Matome.

Na Modimo o tla Otla Batho ba Kgopo?

Malose: Ke thabela go go bona gape, Matome.

Matome: Le nna ke thabela go go bona.

Malose: Ke be ke dutše ke nagana ka selo se itšego seo o ilego wa se bolela ge ke be ke le mo nakong e fetilego.

Matome: Ke itše’ng?

Malose: O boletše gore o ile wa makala ge o be o ekwa gore Dihlatse tša Jehofa ga di dumele thuto ya mollo wa dihele.

Matome: Ee, seo se ile sa mmakatša. E bile go bolela therešo, ke thatafalelwa ke go amogela gore ga le e dumele.

Malose: Ke leboga ge o mpoditše seo. Ka mehla ke kgahlwa ke go kwa dipono tša batho ba bangwe. Ka ge batho ba ena le dipono tše dintši ka thuto ya mollo wa dihele, na nka go kgopela gore o hlalose gore o dumela eng ka yona?

Matome: Go ba gona, ke kgale ke dumela gore batho ba babe kudu ba ya diheleng ge ba ehwa le gore ba tlaišwa ka mo go sa felego.

Malose: Yeo ke pono e tlwaelegilego. E re ke botšiše gore na o kile wa diragalelwa ke dilo tše mpe bophelong bja gago?

Matome: Ee. Kgaetšedi’aka o ile a bolawa nywageng e mehlano e fetilego.

Malose: Ke manyami kudu go kwa seo. O swanetše go ba o mo gopola e le ruri.

Matome: Ke a mo gopola. Ke nagana ka yena letšatši le letšatši.

Malose: Ke lemogile gore batho ba bangwe ba tloga ba rata taba ya mollo wa dihele ka gobane ba ile ba kwešwa bohloko ke ditiro tša batho ba kgopo. Go ba gona, batho ba se nago molato ba rata go bona batho ba babe ba otlelwa ditiro tša bona.

Matome: Go fo ba bjalo! Ke nyaka gore monna yo a bolailego kgaetšedi’aka a otlelwe seo a se dirilego lapa lešo.

Malose: Ruri go ikwa bjalo ke ga tlhago. Beibele e ruta gore Modimo le yena o galefa kudu ge batho ba se nago molato ba hlaselwa—gomme o holofetša gore o tla otla ba kgopo. Ela hloko seo se bolelwago go Jesaya 3:11, e rego: “Joo, motho yo kgopo! O kotsing, ka gobane o  tla lefetšwa tšeo a di dirilego ka diatla tša gagwe.” Ka gona re ka kgodišega gore Modimo o tla otla batho ba kgopo.

Matome: Eupša seo se tla direga bjang ge e ba go se na mollo wa dihele, bjalo ka ge o bolela?

Malose: Yeo ke potšišo e botse. Ka boripana, karabo ke gore Modimo o otla ba kgopo ka phedišo ya ka mo go sa felego. Ela hloko seo se bolelwago ke Beibele mo go 2 Bathesalonika 1:9. Ke kgopela gore o bale temana yeo.

Matome: Go lokile. E re: “Bona ba ba tla welwa ke kotlo ya kahlolo ya tshenyego ya ka mo go sa felego yeo e tšwago pele ga Morena.”

Malose: Ka gona Matome, o a bona gore ga go na kholofelo ka batho ba kgopo ka gobane Modimo o ba otla ka lehu la ka mo go sa felego. Ga ba na kholofelo ya go phela nakong e tlago.

Matome: Ke bona seo se bolelwago ke temana ye, eupša seo ga se bonagale se lokile. Batho ka moka ba a hwa. Na batho ba kgopo kudu ga ba swanelwe ke kotlo e šoro?

Go Nyakega Eng Gore go Dirwe Toka?

Malose: Ke a bona gore o motho yo a tshwenyegilego ka toka.

Matome: Ke tloga ke tshwenyegile ka yona kudu.

Malose: Seo se a kgahliša. Therešo ke gore batho ba na le maikwelo a go lemoga se se nepagetšego le se se fošagetšego ka gobane Modimo o re bopile re ena le ona. Le yena o tshwenyegile kudu ka toka. Eupša ge baetapele ba bodumedi ba ruta gore Modimo o otla batho mollong wa dihele, ge e le gabotse ba dira gore Modimo a bonagale a se na toka e le ruri.

Matome: O ra gore’ng?

Malose: Anke ke go bontšhe mohlala. Na o tlwaetše pego ya Beibele ya Adama le Efa?

Matome: Ee. Modimo o be a ba boditše gore ba se ke ba ja seenywa sa sehlare se itšego, eupša ba ile ba se kwe.

Malose: O nepile. Anke re lebelele pego yeo ya Beibele gotee. E hwetšwa go Genesi 2:16, 17. Ditemana tšeo di re: “Jehofa Modimo a laela motho a re: ‘O ka ja wa ba wa kgotsofala ka se se tšwago sehlareng se sengwe le se sengwe sa mo serapeng. Eupša ge e le sehlare sa go tseba botse le bobe o se ke wa ja tša sona, gobane mohlang o ka jago tša sona o tla hwa lehu.’” Ka gona, Modimo o ile a re go be go tla direga’ng ge Adama a be a ka ja seenywa seo se ileditšwego?

Matome: O ile a re Adama o be a tla hwa.

Malose: O nepile. Nagana feela: Adama ka sebe sa gagwe o dirile gore batho ka moka ba belegwe e le badiradibe. * Le gona, gaešita le tabeng ye, na go na le seo Modimo a ilego a se bolela mabapi le go otlwa diheleng?

Matome: Aowa.

Malose: Eupša ge e ba Adama le Efa ba be ba le kotsing ya go tlaišwa ka mo go sa felego, na Modimo o be a ka se ba lemoše e sa le pele? Na go dira bjalo e be e ka se be go bontšha toka le lerato?

Matome: Nka re’alo.

Malose: Le gona, ela hloko seo Modimo a ilego a se botša Adama le Efa ka morago ga ge ba dirile sebe. Ke kgopela gore o bale Genesi 3:19.

Matome: Go lokile. E re: “O tla ja dijo ka kudumela ya sefahlego sa gago go fihlela o boela mmung, gobane o ntšhitšwe go wona. Gobane o lerole gomme o tla boela leroleng.”

Malose: Ke a leboga. Go ya ka mantšu a Modimo, Adama o be a tla ya kae ge a hwile?

Matome: O ile a re Adama o be a tla boela mmung.

Malose: O opile kgomo lenaka. Bjale, na o be o ka se dumele gore motho a ka boela feela lefelong leo a ilego a ba go lona?

Matome: Go bjalo.

Malose: Adama o be a le kae pele Modimo a mmopa?

Matome: O be a se gona.

Malose: O nepile. Le gona, o tla lemoga gore ga go na moo go bolelwago ka mollo wa dihele kahlolong ya Modimo. Na go be go tla ba go lokile gore Modimo a botše Adama gore o be a tla boela mmung woo a bego a tšwile go wona mola ge e le gabotse a be a eya mollong wa dihele?

Matome: Aowa, go tla ba go sa loka.

 Na Diabolo o Phetha Thato ya Modimo?

Malose: Go na le selo se sengwe gape seo re ka se elago hloko ka thuto ya mollo wa dihele.

Matome: Ke’ng seo?

Malose: Go ba gona, ke mang yoo gantši batho ba rego ke yena a ikarabelago ka mollo wa dihele? Ke mang yo go thwego o otla batho bao ba lego diheleng?

Matome: Ke Diabolo.

Malose: Eupša Diabolo ke lenaba le legolo kudu la Modimo. Ge e ba Modimo a romela batho mollong wa dihele gore ba yo tlaišwa ke Diabolo, na seo se be se ka se bontšhe gore go na le tirišano magareng ga Modimo le Diabolo?

Matome: Hmm. Ga se ka ka ka e nagana ka tsela yeo.

Malose: Go dira mohlala ka taba ye—a ke re o tate?

Matome: Ee, ke na le morwa. O sa tšwa go fetša nywaga e 15.

Malose: Akanya morwa wa gago a rabela o šoro. O dira dilo tše dintši tšeo di go nyamišago. O be o tla dira’ng?

Matome: Ke be ke tla leka go mo phošolla.

Malose: Ga go pelaelo gore o be o tla leka gantši go mo thuša go boela tseleng.

Matome: Go fo ba bjalo.

Malose: A re re go sa šetšwe maiteko ka moka ao o a dirago, o gana go kwa seo o mmotšago sona. Mafelelong, o ka bona go se na seo o ka se dirago ge e se gore o mo otle ka tsela e itšego.

Matome: Ee.

Malose: Eupša go thwe’ng ge o be o ka hwetša gore monna yo kgopo o be a dutše a tutuetša morwa wa gago, a mo ruta go dira dilo tšeo tše mpe ka moka?

Matome: Ke be ke tla galefela monna yoo.

Malose: Bjale, ke tla thabela go kwa tlhaloso ya gago mo. Ge o tseba gore monna yoo yo kgopo wa boitshwaro bjo bo gobogilego o be a tutuetša morwa wa gago gore a se go kwe, na o be o ka kgopela monna yoo gore a go otlele ngwana wa gago?

Matome: Le gatee. Seo se be se ka se be le tlhaologanyo.

Malose: Ka gona, na ruri go a kwagala gore Modimo o be a ka kgopela Sathane Diabolo—yena yo a tutuetšago batho ba kgopo—gore a otle bona batho bao?

Matome: Aowa, ga ke nagane bjalo.

Malose: Ka baka lona leo, ge e ba Modimo a be a nyaka gore ba kgopo ba otlwe, Diabolo—lenaba le legolo kudu la Modimo—o be a ka dumelelana bjang le seo Modimo a se nyakago gomme a ba tlaiša?

Matome: Ga se ka ka ka e nagana ka tsela yeo!

Jehofa o tla Fediša Bokgopo ka Moka

Malose: Lega go le bjalo, kgonthišega gore Modimo o tla otla batho ba kgopo bao ba ganago go fetoga. Mohlomongwe re ka bala lengwalo la mafelelo leo le bontšhago ntlha ye gabotse. Lengwalo leo ke la Psalme 37:9. Ke kgopela gore o bale temana yeo.

Matome: Go lokile. E re: “Gobane badirabobe bona ba tla fedišwa, eupša bao ba holofetšego Jehofa ke bona bao e tlago go ba beng ba lefase.”

Malose: Ke a leboga. Na o bone gore Jehofa Modimo o tlo dira’ng ka ba babe?

Matome: Temana yeo e re Modimo o tlo ba fediša.

Malose: O nepile. Ka mantšu a mangwe, o tlo ba fedišetša sa ruri. Eupša batho ba lokilego—“bao ba holofetšego Jehofa”—ba tla thabela bophelo mo lefaseng ka mo go sa felego. Ke therešo gore se se ka dira gore o nagane ka dipotšišo tše itšego. Ka mohlala, ke ka baka la’ng Modimo a sa fo thibela batho go dira dilo tše mpe? Le gona ge e ba a rerile go otla batho ba kgopo, ke ka baka la’ng a se a hlwa a dira seo?

Matome: Tšeo ke dipotšišo tše di kgahlišago.

Malose: Mohlomongwe nka go bontšha dikarabo tše di tšwago ka Beibeleng ge re tlo boledišana nakong e tlago. *

Matome: Ke tla thabela seo.

^ ser. 79 Bakeng sa tsebišo e oketšegilego, bona kgaolo 11 ya puku ya Ke Eng Seo ge e le Gabotse Beibele e se Rutago? yeo e gatišitšwego ke Dihlatse tša Jehofa.

Ithute ka mo go oketšegilego

Ke ka Baka La’ng Modimo a Dumelela Tlaišego?

Batho ba bantši ba nagana gore Modimo ke yena a bakago tlaišego. Wena o nagana’ng? Ithute ka seo Modimo a rego se re bakela tlaišego