Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

MOROKAMI OCTOBER 2012

 Babadi ba Rena ba a Botšiša . . .

Na Lethabo le Ithekgile ka Lenyalo?

Na Lethabo le Ithekgile ka Lenyalo?

Na Beibele e ruta gore motho o swanetše go ba lenyalong gore a ikwe a kgotsofetše le go thaba? Ge o bala Lentšu la Modimo la mathomo, go ka bonagala eka le thekga kgopolo e bjalo. Bjang?

Go ya ka pego ya Genesi, Modimo o ile a bona ‘go se botse’ gore monna wa pele Adama a tšwele pele a dula a nnoši. Ka gona, Modimo o ile a bopa Efa gore e be “molekane” wa Adama. (Genesi 2:18) Lentšu “molekane” le bolela go lekanetša selo se itšego. Go tšwa temaneng ye, re ka no phetha ka gore motho ga a felela ge e ba a se lenyalong. Go oketša moo, dipego tše dintši tša Beibele di bontšha lenyalo e le mothopo wa ditšhegofatšo le lethabo. Pego ya Ruthe ke mohlala wa seo.

Lega go le bjalo, na ruri dipego tše bjalo di reretšwe go re ruta gore Bakriste lehono ba ka se thabe, ba kgotsofala goba ya ba ba feletšego ka ntle le gore ba be lenyalong gomme ba be le bana? Ga go bjalo le gatee. Motho yo a phethagetšego e bile a kgotsofetše yo a kilego a phela e be e le Jesu Kriste. Lega go le bjalo, o ile a dula a se a nyala go fihla lehung. Jesu, motho yo bohlale kudu yo a kilego a phela, le yena o ile a bonagatša gabotse seo “Modimo yo a thabilego,” Jehofa, a lego sona. (1 Timotheo 1:11; Johane 14:9) Jesu o re utolletše seo se ka re thabišago lefaseng le. (Mateo 5:1-12) Ga se a akaretša lenyalo lelokelelong leo.

Ka gona, na Beibele e a ikganetša tabeng ye? Le gatee. Re swanetše go lebelela lenyalo go ya ka morero wa Jehofa. Gaešita le ge a hlamile lenyalo gore e be mothopo wa lethabo, tswalano ya kgauswi le khomotšo, lenyalo ka dinako tše dingwe le ile la kgatha tema e bohlokwa go phethagatšeng dikarolo tše itšego tša thato ya gagwe. Ka mohlala, morero wa Modimo ka Adama le Efa e be e le gore “ba tswale ba ate ba tlale lefase.” (Genesi 1:28) Go Adama le Efa, go be go se yo a ka kgonago go phethagatša morero wa Modimo wo o boletšwego a nnoši. Go e na le moo, ba be ba hlokana, e bile ba be ba tlatšana ka kgopolo ka tsela e kgethegilego.

Ka mo go swanago, Jehofa o be a na le morero o kgethegilego wo o akaretšago lenyalo le bophelo bja lapa ge a be a dirišana le setšhaba sa Isiraele sa lefaseng. O be a nyaka gore setšhaba sa gagwe se ate e le gore se se ke sa fenywa ke manaba a sona. E bile o be a rerile gore leloko la Juda le tšweletše Mesia, yo a bego a tla phološa moloko wo o botegago wa batho go ditlamorago tša sebe le lehu. (Genesi 49:10) Ka gona, basadi ba ba botegago ba Isiraele ba be ba lebelela lenyalo le bana e le tokelo e kgethegilego, e bile ba be ba bona e le mo go lešago dihlong le mo go nyamišago ge ba be ba sa kgone go dira bjalo.

Ka gona go thwe’ng ka lehono? Na molao wa Modimo wa bogologolo wa go ‘tlatša lefase’ o sa dutše o tlama Bakriste bao ba phelago polaneteng ye ya leemaema gore ba tsene lenyalong le go ba le bana? Aowa. (Mateo 19:10-12) Le gona Modimo lehono ga a sa nyaka go šireletša le go kgonthišetša lešika la Mesia goba go šireletša setšhaba seo Mophološi a tlago go belegelwa go sona. Ka gona Bakriste ba swanetše go lebelela bjang lenyalo le go se be lenyalong?

Ke therešo gore maemo ao ka bobedi a ka lebelelwa e le dimpho tše di tšwago go Modimo. Bjale ka ge o tseba, mpho yeo e lego e botse go yo mongwe e ka no se be botse go yo mongwe. Lenyalo ke thulaganyo e kgethwa yeo e tlišago lerato, bogwera le metheo e tsepamego ya lapa. Ka dinako tše dingwe Beibele e bolela gabotse gore bao ba tsenago lenyalong lefaseng le le sa phethagalago ba tla lebeletšana le mathata goba “tlaišego nameng.” Jehofa ga a lebelele go se be lenyalong e le sebaki sa dihlong goba manyami. Go e na le moo, Lentšu la gagwe le bolela gore go se be lenyalong go na le mehola e itšego go phala go ba lenyalong.—1 Bakorinthe 7:28, 32-35.

Ka gona, Beibele e nea pono e lekalekanego ka lenyalo le go se be lenyalong. Jehofa, yena Mohlami wa lenyalo le lapa, o nyaka gore bahlanka ba gagwe ka moka ba thabe le go kgotsofala, go sa šetšwe gore ba lenyalong goba go se bjalo.