Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI OCTOBER 2012

 Batamela Kgauswi le Modimo

“Motala wa Mabaka a Dula Fase”

“Motala wa Mabaka a Dula Fase”

BEIBELE e re: “Ga go motho yo a kilego a bona Modimo ka nako le ge e le efe.” (Johane 1:18) Ponagalo ya Modimo ke yeo e tagafetšego kudu moo e lego gore ga go sebopiwa sa nama le madi seo se ka mmonago gomme sa phela. (Ekisodo 33:20) Lega go le bjalo, mabakeng a mangwe Jehofa o ile a kgetha banna ba itšego gore ba bone legodimo ponong. Yo mongwe wa banna bao e be e le moporofeta Daniele. Ga go pelaelo gore seo a se bonego se dirile gore a boife, gomme le rena re swanetše go ba le poifo e bjalo. Ela hloko kamoo Daniele a ilego a hlalosa seo a bilego le tokelo ya go se bona ponong. *Bala Daniele 7:9, 10.

“Motala wa Mabaka.” Sereto sa “Motala wa Mabaka,” seo se dirišwago ke Daniele a nnoši, se bolela gore “yo a godilego ka matšatši.” (Daniele 7:9, 13, 22) Jehofa ke yo mogolo gakaaka’ng go ya ka matšatši? Ka ge e le “Kgoši ya bosafelego,” go ba gona ga gagwe ga go na mathomo e bile ga go na mafelelo. (1 Timotheo 1:17; Juda 25) Go ba gona ga Modimo ka mo go sa felego go re kgonthišetša gore o na le bohlale bjo bo sa felego, ka ge Beibele e tswalanya bogolo le bohlale. (Jobo 12:12) Ka kgonthe, kgopolo ya go ba gona ka mo go sa felego e thata go kwešišwa ke dikgopolo tša rena tšeo di lekanyeditšwego. Eupša na ruri re letetše gore re kwešiše ka botlalo Modimo yo bohlale yo a sa bapišwego?—Baroma 11:33, 34.

Ela hloko gore Motala wa Mabaka o “dula fase.” Ka morero ofe? Ditemana tšeo di dikologilego taba di re hlabišetša seetša, ka go diriša mantšu “Kgoro” le “kahlolo.” (Daniele 7:10, 22, 26) Ka gona, ponong, Jehofa o be a dutše fase bjalo ka Moahlodi. O tlo ahlola bomang? Ditšhaba tša lefase, bjalo ka ge go bontšhitšwe pejana ponong ya Daniele e le dibata. * (Daniele 7:1-8) Jehofa ke Moahlodi wa mohuta mang?

“Diaparo tša gagwe e be e le tše tšhweu bjalo ka kapoko, moriri wa hlogo ya gagwe o le bjalo ka boya bjo bo hlwekilego bja nku.” Bošweu ke seka sa toko le tshekego. Gantši mmala wa boya bjo bo hlwekilego bja nku ke o mošweu. Ka gona, moriri wo o swanago le boya bjo bo hlwekilego bja nku e ka ba o mošweu. Na o ka akanya ka seo Daniele a se bonego? Na o bona Moahlodi wa moriri o mošweu mohlomongwe a apere seaparo sa bošweu bja kapoko? Seswantšhokgopolo se se re kgonthišetša gore dikahlolo tša Jehofa di lokile e bile ke tše bohlale. Ke mohuta wa Moahlodi yo re swanetšego go mo holofela le go mo hlompha kudu.

Ke mohuta wa Moahlodi yo re swanetšego go mmota le go mo hlompha

“Go na le ba milione (1 000 000) bao ba ilego ba tšwela pele ba mo hlankela, le ba dikete tše lesome (10 000) ga dikete tše lesome (10 000) bao ba ilego ba tšwela pele ba eme pele ga gagwe.” Bahlanka ba ba legodimong ke bomang? Beibele e hlaola barongwa e le “Badiredi ba gagwe [Modimo].” (Psalme 104:4) Barongwa ba Modimo, bao mohlomongwe e lego ba dimilione tše makgolo, ba swaregile ka go ‘phetha lentšu la gagwe’ le ka go ‘dira thato ya gagwe.’ (Psalme 103:20, 21) Na se ga se bohlatse bjo bo oketšegilego bja bohlale bja Modimo bjo bo se nago magomo? Ke mang ntle le Jehofa yo a ka bolokago madira a mantši a legodimong ka thulaganyo ka nako e telele gakaakaa?

Pono ya Daniele e re tutueletša gore re bote Jehofa, Motala wa Mabaka. Dikahlolo tša gagwe di lokile, bohlale bja gagwe bo a botega. Ke ka baka la’ng o sa ithute ka mo go oketšegilego gore o ka batamela bjang kgauswi le Modimo a nnoši yo bohlale?

Mmalo wa Beibele o šišintšwego bakeng sa October:

Daniele 4-12Hosea 1-14

^ ser. 3 Ge e le gabotse Daniel ga se a bona Modimo. Go e na le moo, Modimo o ile a tsenya diswantšho tšeo di bonagalago gabotse kgopolong ya gagwe. Daniele o ile a diriša dika tša polelo ge a hlalosa seo a se bonego, go akaretša le go hlalosa Modimo bjalo ka ge eka o na le ditho tša batho. Seswantšhokgopolo se, se re thuša gore re kwešiše Modimo e bile ga se ra swanela go se tšea e le sa kgonthe.

^ ser. 5 Bakeng sa tlhahlobo ya pono ya Daniele ya mabapi le dibata, bona kgaolo 9 ya puku ya Ela Hloko Boporofeta bja Daniele! e gatišitšwego ke Dihlatse tša Jehofa.