Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI OCTOBER 2012

  Beibele e Fetoša Maphelo

Beibele e Fetoša Maphelo

MONNA yo a godišitšwego gabohloko o kgonne bjang go ba monna yo a nyetšego le tate yo a thabilego le yo a atlegilego? Ke’ng seo se šušumeleditšego mosadi yo a nago le mekgwa e mentši e mebe gore a hlwekiše bophelo bja gagwe? Bala seo batho ba ba se bolelago.

Ke Ile ka “Ikwa ke se na Mohola.”—VÍCTOR HUGO HERRERA

  • NGWAGA WA MATSWALO: 1974
  • NAGA: CHILE
  • BOPHELO BJA PELE E EBA MOKRISTE: GO LEMALELA BJALA

BOPHELO BJA KA BJA NAKONG E FETILEGO:

Ke belegetšwe motseng wa Angol, karolong e botse ya ka borwa bja Chile. Ga se ka ka ka kopana le tate. Ge ke be ke ena le nywaga e meraro, mma o ile a hudugela motsengmošate, e lego Santiago, a ena le nna le moratho wa ka. Re ile ra feleletša re dula ka phaphošing e nyenyane kampeng ya madulo a motšwa-o-swere ya batho ba se nago magae. Re be re diriša ntlwana ya boithomelo ya batho bohle gomme re ega meetse pomping ya setimamollo.

Ka morago ga nywaga e ka bago e mebedi, mmušo o ile wa re fa ntlo e nyenyane. Ka manyami, moo re ilego ra thoma go dula gona go be go atile go dirišwa gampe ga dihlaretagi le bjala, bosenyi gotee le go gweba ka mmele.

Ka letšatši le lengwe mma o ile a kopana le monna yo mongwe, yoo a ilego a feleletša a nyalane le yena. Tate wa ka wa mogodiši o be a enwa bjala kudu. O be a fela a itia nna le mma. Ke be ke lla gantši ke sa bonwe ke motho, e bile ke duma ge nkabe ke ena le tate yoo a bego a tla ntšhireletša.

Gaešita le ge mma a be a šoma ka thata bakeng sa go re hlokomela, re be re diila kudu. Ge re be re swerwe ke tlala, ka dinako tše dingwe re be re fo ja maswi a lerole le swikiri. Bakeng sa boithabišo, nna le moratho wa ka re be re khukhuna re eya go bogela thelebišene re ukametše lefasetereng la moagišani. Eupša letšatšing le lengwe moagišani o ile a re bona, gomme ya ba gona ge re laetše go dira bjalo!

Ge tate wa ka wa mogodiši a be a hlaphogetšwe—e lego se se bego se sa direge gantši—o be a rekela nna le moratho wa ka dijo. Lebakeng le lengwe o ile a re rekela thelebišene e nyenyane. Leo ke le lengwe la makga a sego kae ao ka ona ke gopolago ke ikwa ke thabile.

Ge ke ena le nywaga e 12, ke ile ka ithuta go bala. Ngwaga ka morago ga moo, ke ile ka tlogela sekolo gomme ka thoma go šoma ka nako e tletšego. Ka morago ga nako ya mošomo ke be ke intšha le bašomigotee le nna ba bagolo re eya meletlong yeo go yona re bego re tagwa le go diriša dihlaretagi. Go se go ye kae ke ile ka di lemalela.

Ge ke be ke ena le nywaga e 20, ke ile ka kopana le Cati gomme mafelelong ra nyalana. Mathomong, dilo ka moka di ile tša re sepelela gabotse, eupša ka morago ke ile ka boela bophelong bjo ke bego ke bo phela nakong e fetilego. Boitshwaro bja ka bo ile  bja mpefala le go feta. Mafelelong ke ile ka lemoga gore tsela yeo ke bego ke e swere e be e nkiša kgolegong goba lehung. Se sebe le go feta ke gore ke ile ka tlaiša morwa wa ka Víctor ka tsela yeo ke bego ke tlaišwa ka yona ge ke be ke sa le yo monyenyane. Ke be ke ikwa ke nyamile, ke ipefeletše e bile ke ikwa ke se na mohola.

Mo e ka bago ka 2001, Dihlatse tša Jehofa tše pedi di ile tša etela legaeng la rena, gomme Cati o ile a thoma go ithuta Beibele le tšona. O ile a boledišana le nna ka seo a bego a ithuta sona. Ka go nyaka go tseba, le nna ke ile ka thoma go ithuta Beibele. Ka 2003, Cati o ile a kolobetšwa bjalo ka yo mongwe wa Dihlatse tša Jehofa.

KAMOO BEIBELE E FETOTŠEGO BOPHELO BJA KA:

Letšatšing le lengwe, ke ile ka bala Ruthe 2:12, yeo e bolela gore Jehofa o putsa bao ba dirago dilo ka tumelo le bao ba tšhabelago go yena. Ke ile ka lemoga gore ge ke be nka dira diphetogo ke be ke tla kgahla Modimo gomme a mputsa. Ke ile ka lemoga gore Beibele e be e ganetša botagwa gantši. Mantšu a 2 Bakorinthe 7:1 a ile a nkgoma. Temana yeo e re kgothaletša gore “re itlhwekišeng ditšhila tšohle.” Ka baka leo, ke ile ka thoma go tlogela mekgwa ya ka e mebe. Mathomong ke ile ka ba sefelapelwana, eupša Cati ga se a ka a kgaotša go nthekga.

Ke ile ka feleletša ka go tlogela mošomo wa ka ka gobane kgateletšo ya go kgoga le go nwa e be e le e matla. Gaešita le ge go se šome ka nako e itšego go be go bolela gore re be re swanetše go phela ka dilo tše dinyenyane, go ile gwa mpha nako e oketšegilego ya go ithuta Beibele. Yeo ke nako yeo ge e le gabotse ke ilego ka dira tšwelopele ya moya. Cati le ka mohla ga se a ka a nyaka dilo tše di bonagalago tšeo di lego ka kua ga matla a ka, e bile ga se a ka a nnyatša ka gobane re be re phela bophelo bjo bonolo. Ke tloga ke leboga thekgo ya gagwe e lerato.

Ganyenyane-ganyenyane ke ile ka thoma go ba le tswalano ya kgauswi kutšwanyana le Dihlatse. Di ile tša nthuša go lemoga gore Jehofa o be a tšeela godimo kganyogo ya ka ya go mo hlankela go sa šetšwe go hloka ga ka thuto ya lefase. Lerato le botee tšeo re di bonego ka phuthegong ya Bokriste di ile tša kgoma lapa la rena kudu. Re be re se ra ka ra hwetša khutšo e bjalo lefelong le ge e le lefe le lengwe. Ka December 2004, le nna ke ile ka kolobetšwa.

KAMOO KE ILEGO KA HOLEGA KA GONA:

Ke ile ka bona gore mantšu a Jehofa a begilwego go Jesaya 48:17 a a rereša ge a re: “Nna, Jehofa, ke Modimo wa lena, Yo a le rutago gore le holege.” Mma le moratho wa ka ba ile ba kgahlwa kudu ke diphetogo tša ka moo e lego gore ba ithuta Beibele gona bjale. Gaešita le baagišani ba ka ba thabela go bona kamoo ke fetogilego ka gona le kamoo lapa la rena le thabilego ka gona.

Ke na le mosadi yo a ratago Modimo le yo a mponago le ke molekane wa gagwe yo a botegago le mogwera. Gaešita le ge ke sa ka ka tseba tate, Beibele e nthutile kamoo nka godišago barwa ba ka ba bararo ka gona. Ba a ntlhompha. Se bohlokwa le go feta ke gore ba bona Jehofa e le Motho wa kgonthe, e bile ga bjale ba a mo rata.

“Gaešita le ge ke sa ka ka tseba tate, Beibele e nthutile kamoo nka godišago barwa ba ka ba bararo ka gona”

Ke tloga ke thabela gore go sa šetšwe bjana bja ka bjo bo sa thabišego, Jehofa o mphile sebaka sa go ba monna yo a thabilego.

 “Ke Ile ka ba Kgarebe Yeo e Befetšwego le e Bogale.”—NABIHA LAZAROVA

  • NGWAGA WA MATSWALO: 1974
  • NAGA: BULGARIA
  • BOPHELO BJA PELE E EBA MOKRISTE: MOGWEBA-KA-DIHLARETAGI

BOPHELO BJA KA BJA NAKONG E FETILEGO:

Ke belegetšwe Sofia, Bulgaria, lapeng la maemo a magareng. Tate o ile a tlogela lapa lešo ge ke be ke ena le nywaga e ka bago e tshela. Seo se ile sa direga se sa letelwa, e bile sa nkweša bohloko o šoro maikwelong. Ke ile ka ikwa ke lahlilwe e bile ke sa swanelwe ke go ratwa. Ge ke dutše ke gola, maikwelo a a ile a ntira gore ke be lerabele. Ke ile ka ba kgarebe yeo e befetšwego le e bogale.

Ge ke be ke ena le nywaga e 14, ke ile ka tšhaba gae la mathomo. Gantši ke be ke utswa tšhelete ya mma gotee le ya makgolo le rakgolo. Ke be ke dula ke tsena mathateng sekolong ka baka la go fela pelo ga ka, gomme seo se ile sa dira gore ke romelwe dikolong tše hlano ka nywaga e sego kae feela. Ke ile ka tlogela sekolo nywaga e meraro pele nka aloga sekolong. Ke be ke phela bophelo bjo bo gobogilego. Ke ile ka lemalela go kgoga disekerete le patše. Ke be ke enwa kudu, ke dula ke eya meletlong gomme ka thoma go gweba ka dihlaretagi. Ke be ke gateletšwa ke go phela lefaseng leo le se nago kholofelo leo go lona batho ba tlaišegago le go hwa. Ka baka leo, ke be ke phelela go ipshina letšatšing le lengwe le le lengwe.

Ka 1998, ge ke be ke ena le nywaga e 24, ke ile ka swarwa boemafofaneng bja São Paulo, Brazil, ke gweba ka dihlaretagi. Ke ile ka ahlolelwa nywaga e mene kgolegong.

KAMOO BEIBELE E FETOTŠEGO BOPHELO BJA KA:

Ka 2000, Dihlatse tša Jehofa di ile tša thoma go etela kgolego yeo ke bego ke le go yona gatee ka beke. Yo mongwe wa Dihlatse, e lego Marines, o ile a mpontšha botho kudu. O ile a ntira gore ke nyake go ithuta ka mo go oketšegilego ka Beibele. Ka ge ke be ke sa ka ka kwa ka Dihlatse tša Jehofa, ke ile ka botšiša bagolegwagotee le nna gore ba be ba tseba eng ka tšona. Seo se mmakaditšego ke gore ba bantši ba batho bao ke ba botšišitšego ba ile ba bolela gampe ka tšona. Mogolegwa yo mongwe o ile a mpotša gore nka tsena bodumeding bjo bongwe le bjo bongwe eupša e sego bja Dihlatse tša Jehofa. Mantšu a gagwe a ile a ntira gore ke nyake go tseba le go feta; ke be ke nyaka go tseba lebaka la gore batho ba ba hloiwe gakaakaa. Ke ile ka feleletša ke dumela gore lebaka e be e le gore bodumedi bja bona e be e le bja therešo. Go ba gona, Beibele e bolela gore motho yo mongwe le yo mongwe yoo a lekago go latela Jesu ka pelo ka moka o tla tlaišwa.—2 Timotheo 3:12.

Nakong yeo, ke be ke abetšwe go šoma moagong wa diofisi wa moo kgolegong. Letšatšing le lengwe ke ile ka hwetša lepokisi leo le tletšego dimakasine tša kgale tša Morokami le Phafoga! * ka phaphošing ya bobolokelo. Ke ile ka iša dimakasine tšeo ka seleng ya ka ya kgolego gomme ka thoma go di bala. Ge ke dutše ke di bala, ke be ke ikwa bjalo ka motho yoo a lego leganateng le le omilego yoo a sa tšwago go hwetša sediba sa meetse a lapološago. Ka ge ke be ke ena le nako e ntši, ke be ke fetša diiri tše dintši ke ithuta Beibele letšatši le lengwe le le lengwe.

Letšatšing le lengwe ke ile ka bitšwa ofising ya kgolego. Ke be ke letetše go lokollwa kgolegong, ka gona ke ile ka rwala diphahlo tša ka ka pela, ka laela bagolegwagotee le nna gomme ka ya moo ofising  ke kitima. Lega go le bjalo, ge ke be ke fihla, ke ile ka kwa gore ke be ke buletšwe molato o mongwe, wo o akaretšago go swara mangwalo a bofora. Ka baka leo, ke ile ka ahlolelwa nywaga e mengwe gape e mebedi kgolegong.

Mathomong ke ile ka nyama o šoro. Eupša ka morago ga matšatši a mmalwa, ke ile ka lemoga gore tiragalo ye yeo e sa kgahlišego ge e le gabotse e be e le tšhegofatšo. Gaešita le ge ke be ke ithutile dilo tše dintši go tšwa Beibeleng, ka pelong ya ka ke be ke sa nyaka go tšwela pele ka bophelo bja ka bja nakong e fetilego ge ke se na go lokollwa kgolegong. Ke be ke nyaka nako e oketšegilego gore ke fetoge.

Ka dinako tše dingwe ke be ke nagana gore ga go kgonege gore Modimo a nkamogele bjalo ka yo mongwe wa barapedi ba gagwe. Eupša ke ile ka naganišiša ka ditemana tše bjalo ka 1 Bakorinthe 6:9-11. Ditemana tšeo di utolla gore lekgolong la pele la nywaga C.E., Bakriste ba bangwe ba be ba kile ba ba mahodu, matagwa le bahlakodi pele ba hlankela Jehofa. Lega go le bjalo, ka thušo ya Jehofa, ba ile ba fetoga. Mohlala wa bona o ile wa nkgothatša kudu.

Go ile gwa ba bonolo go tlogela e mengwe ya mekgwa ya ka e mebe. Ka mohlala, ke ile ka kgaotša go diriša dihlaretagi gabonolo. Eupša go kgaotša go kgoga go be go le thata kudu. Ke ile ka lwantšha mokgwa woo ka thata lebaka la ka godimo ga ngwaga pele ke atlega go kgaotša go kgoga. Selo se sengwe seo se ilego sa nthuša e bile go ithuta mabapi le dilo tše mpe tšeo go kgoga go di dirago boemong bja motho bja tša maphelo. Godimo ga tšohle, go rapela Jehofa ke sa kgaotše go nkgontšhitše go kgaotša go kgoga.

“Ke be ke hweditše Tate yo kaonekaone—yoo a ka se tsogego a ntlogetše!”

Ge ke dutše ke batamela Jehofa kudu, ganyenyane-ganyenyane ke ile ka thoma go fenya maikwelo a go bona ke lahlilwe ao ke lwelego le ona ga e sa le ge tate a re tlogela. Mantšu a Psalme 27:10 a ile a nkgoma kudu. Temana yeo e re: “Le ge tate le mma ba ka ntlogela, Jehofa yena o tla nkamogela.” Ke ile ka lemoga gore ke be ke hweditše Tate yo kaonekaone—yoo a ka se tsogego a ntlogetše! Bjale bophelo bja ka bo be bo ena le morero. Ka April 2004, dikgwedi tše tshela ka morago ga go lokollwa kgolegong, ke ile ka kolobetšwa bjalo ka yo mongwe wa Dihlatse tša Jehofa.

KAMOO KE ILEGO KA HOLEGA KA GONA:

Ke motho yo a thabilego. Ka ge ke lokologile mekgweng e senyago, ke phetše gabotse kudu mmeleng le maikwelong go feta ge ke be ke sa le yo monyenyane. Ke thabile lenyalong e bile ke na le tswalano ya kgauswi le Tate wa ka wa legodimong, Jehofa. Gare ga barapedi ba gagwe, ke hweditše botate ba bantši, bomma, dikgaetšedi gotee le bomogolwake le baratho. (Mareka 10:29, 30) Ke leboga gore ba ile ba bona gore nka fetoga—gaešita le ge ke be ke sa bone nka fetoga.

Ka dinako tše dingwe, ke imelwa ke go ipona molato bakeng sa bophelo bja ka bja nakong e fetilego. Eupša ke homotšwa ke go tseba kholofetšo ya gore lefaseng le lefsa la Modimo, dilo tše mpe tša nakong e fetilego “di ka se sa gopolwa.” (Jesaya 65:17) Eupša ga bjale, maitemogelo a ka a nthuša gore ke kwele bohloko batho bao ba lebeletšanago le ditlhohlo tše swanago. Ka kgopolo yeo, bophelo bja ka bja nakong e fetilego bo na le mohola. Ka mohlala, ge ke tšea karolo bodireding bja Bokriste, ke nolofalelwa ka tekanyo e itšego ke go bolela le batho bao ba lemaletšego dihlaretagi, bjala, goba disenyi—ke sa ba kgetholle. Ke kgodišegile gore ge nna ke kgonne go dira diphetogo e le gore ke kgahle Jehofa, motho yo mongwe le yo mongwe a ka kgona!

^ ser. 29 Di gatišitšwe ke Dihlatse tša Jehofa.