Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

MOROKAMI OCTOBER 2012

Ke ka Baka la Eng Bomenetša bo Tšwela Pele?

Ke ka Baka la Eng Bomenetša bo Tšwela Pele?

“Motho [o bušitše] yo mongwe gore a mo gobatše.”—MMOLEDI 8:9.

MANTŠU ao a hlalosa gabotse histori ya pušo ya batho. E bakile tekanyo e kgolo kudu ya tlaišego le manyami. Go theoša le nywaga, batho bao ba nago le maikemišetšo a mabotse bao ba lekilego go hloma lekoko leo le nago le toka ba paledišitšwe ke megabaru le bomenetša. Ke ka baka la’ng go le bjalo? Ke ka baka la’ng bomenetša bo tšwela pele? Ge e le gabotse, ke ka baka la ditutuetšo tše tharo tše mpe tše di latelago.

1. Tutuetšo ya sebe.

Beibele e bolela ka go lebanya gore re ka “tlase ga sebe ka moka” ga rena. (Baroma 3:9) Bjalo ka bolwetši bja leabela bjo bo sa alafegego, sebe se ‘dula’ ka go rena. Sebe se na le nywaga e dikete se ‘buša’ batho e le kgoši. “Molao” wa sona o dula o šoma ka go rena. Ditshekamelo tša sebe di dira gore batho ba bantši ba etiše dikgahlego tša bona pele goba gore ba thee maphelo a bona go hwetšeng dilo tše di bonagalago goba maemo a bolaodi ka go ikhola ka ba bangwe.—Baroma 5:21; 7:17, 20, 23, 25.

 2. Tutuetšo ya lefase le kgopo leo re dulago go lona.

Lefase la rena le tletše megabaru le boithati. Maemong a bjalo, batho ba bangwe ba thatafalelwa ke go ba ba fapanego. Ka ge ba laolwa ke go rata maemo ka tsela ya boithati, e ba bao ba nyoretšwego matla a bolaodi. Le gona ba ba le kganyogo e matla ya go ba le tšhelete e ntši le dilo tše di bonagalago tše oketšegilego—go feta tšeo ge e le gabotse ba di nyakago. Ka manyami, ba ikemišeditše go fihlelela dipakane tšeo ba diriša boradia. Go e na le go ganetša ditutuetšo tše mpe, batho ba bjalo ba “latela lešaba ge le yo phetha merero e mebe.”—Ekisodo 23:2.

3. Tutuetšo ya Sathane Diabolo.

Sathane, sebopiwa sa lerabele sa moya, o “[timetša] lefase ka moka.” (Kutollo 12:9) O thabela go hlalefetša batho. Ka boradia a ka diriša kganyogo ya motho ya tlhago ya go ba le dilo tše di bonagalago le go ema gabotse ka tša ditšhelete go fihla bokgoleng bja gore motho a dire dilo ka boradia.

Na seo se bolela gore re fo ba didirišwa tša Sathane—gore re gapeletšega go mo kwa ge a nyaka re dira selo se itšego? Re tla kwa karabo sehlogong se se latelago.