Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Morokami  |  October 2012

Na go a Kgonega go Botega Lefaseng Leo le Tletšego Bomenetša?

Na go a Kgonega go Botega Lefaseng Leo le Tletšego Bomenetša?

“Re rata go itshwara ka go botega dilong tšohle.”—BAHEBERU 13:18.

GAEŠITA le ge re ka tutuetšwa ke tshekamelo ya rena ya sebe, lefase leo re dulago go lona gotee le Diabolo, re ka kgona go ganetša tutuetšo yeo! Bjang? Ka go batamela kgauswi le Modimo le ka go diriša melao ya motheo yeo e kgonthišeditšwego ya Lentšu la gagwe, Beibele. Ela hloko mehlala e mebedi.

MOLAO WA MOTHEO WA BEIBELE: “Le se ke la bopa boitshwaro bja lena go ya ka lefase leo le phelago go lona.”—Baroma 12:2, New Jerusalem Bible.

“Beibele e nthušitše go lemoga mehola ya go botega.”—GUILHERME

Seo se diregilego e le ka kgonthe: Guilherme ke rakgwebo yo a atlegilego wa Brazil. O dumela gore go botega ga go bonolo. O re: “Rakgwebo a ka thoma gabonolo go amogela mekgwa ya go se botege, mohlomongwe ka baka la kgateletšo ya go fihlelela dipakane tša khamphani goba go nyaka go atlega lefaseng la phadišano. Batho ba bantši ba tšea go nea le go amogela letsogo-le-kobong e le ga tlhago. Ge o le rakgwebo yo mofsa yo a nago le  boikarabelo bjo bogolo bja tša ditšhelete, go botega ke tlhohlo.”

Lega go le bjalo, Guilherme o ile a kgona go fenya kgateletšo ya go se botege. O re: “Go botega go a kgonega gaešita le tikologong e dumelelago dilo ya tša kgwebo. O swanetše go ba le ditekanyetšo tše tiilego tša boitshwaro. Beibele e nthušitše go lemoga mehola ya go botega. Motho yo a botegago o na le letswalo le le hlwekilego, khutšo ya ka gare gotee le boitlhompho. A ka ba tutuetšo e botse go bao ba mo dikologilego.”

MOLAO WA MOTHEO WA BEIBELE: “Batho bao ba nyakago go huma ba wela mehuteng ka moka ya diteko le melaba. Ba tanywa ke dikganyogo tša bošilo le tše di gobatšago tšeo di ba wetšago fase le go ba senya. Lerato la tšhelete le baka mehuta ka moka ya mathata.”—1 Timotheo 6:9, 10, Contemporary English Version.

“Ke leboga gore go diriša melao ya motheo e phagamego ya boitshwaro ya Beibele go dirile gore ke be le botumo bjo bobotse.”—ANDRÉ

Seo se diregilego e le ka kgonthe: André ke mong wa khamphani ya go tsenya didirišwa tša ditshepedišo tša tša tšhireletšo (security systems). Gare ga bao a ba tsenyetšago didirišwa tše ke beng ba lepatlelo le legolo la kgwele ya maoto. Lebakeng le lengwe, ka morago ga papadi e kgolo, André o ile a ya diofising tša tša taolo gomme a iša rasiti ya didirišwa tšeo a di tsentšego. Lefapha la tša ditšhelete le be le sa swaregile ka go bala tšhelete yeo le bego le sa tšwa go e hwetša go tšwa diofising tša dithekethe. Ka ge nako e be e šetše e ile, molaodi o ile a lefa ka lebelo batho bao ba ba thušago, go akaretša le André.

André o anega ka gore: “Ge ke lebile gae, ke ile ka lemoga gore molaodi yoo o be a mphile tšhelete e ntši kudu. Ke be ke tseba gore o be a ka se tsoge a tsebile gore o be a file mang tšhelete e ntši. Eupša ke be ke tseba le gore monna yoo wa batho o be a tla swanelwa ke go lefa tšhelete yeo ka tšhelete ya gagwe! Ke ile ka phetha ka go boela morago. Ke ile ka kgona go phatša lešaba la bathekgi gomme ka bušetša tšhelete yeo. Molaodi yoo o ile a makala o šoro. Ga go motho yoo a bego a kile a bušetša tšhelete le ge e le efe go yena.”

André o tšwela pele ka gore: “Tiro yeo ya potego e ile ya dira gore molaodi yoo a ntlhomphe. Go šetše go fetile nywaga e mentši, eupša go batho ka moka bao ba bego ba thuša lefelong leo, ke nna feela yoo a sa nago le konteraka le beng ba lepatlelo. Ke leboga gore go diriša melao ya motheo e phagamego ya boitshwaro ya Beibele go dirile gore ke be le botumo bjo bobotse.”

Ke mo go kgothatšago go tseba gore ka thušo ya Modimo re ka kgona go fenya ditutuetšo tšeo di senyago. Lega go le bjalo, maiteko a batho a ka se tsoge a fedišeditše bomenetša sa ruri. Dibaki tša bomenetša ke tše tseneletšego—di tseneletše kudu moo batho ba sa phethagalago ba ka se kgonego go di fediša ka bobona. Ka gona, na se se ra gore bomenetša bo ka se tsoge bo fedile? Sehlogo sa mafelelo lelokelelong le la dihlogo se nea karabo e kgothatšago e tšwago Beibeleng.