Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI SEPTEMBER 2012

 Ithute Lentšung la Modimo

Na o ka Phela ka mo go sa Felego?

Na o ka Phela ka mo go sa Felego?

Sehlogo se se ahlaahla dipotšišo tšeo o ka bago o ile wa di botšiša le go go bontšha moo o ka balago dikarabo gona ka Beibeleng ya gago. Dihlatse tša Jehofa di tla thabela go ahlaahla dikarabo tše le wena.

1. Letšatši la Kahlolo ke eng?

Bjalo ka ge go bontšhitšwe seswantšhong se se lego ka letsogong le letona, batho ba bantši ba nagana gore Letšatšing la Kahlolo meoya e dimilione tše dikete e tla tlišwa pele ga sedulo sa bogoši sa Modimo go tlo ahlolwa go ya ka ditiro tša yona tša nakong e fetilego—e mengwe e tlo putswa ka bophelo bja legodimong, mola e mengwe e tlo tlaišwa diheleng. Lega go le bjalo, Beibele e bontšha gore morero wa Letšatši la Kahlolo ke go phološa batho ditirong tša go hloka toka. (Psalme 96:13) Modimo o kgethile Jesu gore e be Moahlodi yoo a tlago go tsošološa toka bathong.—Bala Jesaya 11:1-5; Ditiro 17:31.

2. Letšatši la Kahlolo le tla tsošološa toka bjang?

Ge motho wa pele, Adama, a be a rabela ka boomo kgahlanong le Modimo, o ile a dira gore ditlogolo tša gagwe ka moka di be le sebe, di tlaišege e bile di hwe. (Baroma 5:12) Bakeng sa go lokiša tiro yeo ya go hloka toka, Jesu o tla bušetša batho ba dimilione tše dikete bophelong, goba a ba tsoša bahung. Puku ya Kutollo e utolla gore se se tla direga pušong ya Jesu Kriste ya nywaga e sekete.—Bala Kutollo 20:4, 11, 12.

Bao ba tsošitšwego bahung ba ka se ahlolwe go ya ka seo ba se dirilego pele ba ehwa, eupša ba tla ahlolwa go ya ka seo ba tlago go se dira ge go utollwa dikagare tša “mangwalo a go phuthwa” ao go boletšwego ka ona go Kutollo kgaolo 20. (Baroma 6:7) Moapostola Paulo o re gare ga bao ba tlago go tsošwa le go ba le sebaka sa go ithuta ka Modimo e tla ba “ba lokilego gotee le ba sa lokago.”—Bala Ditiro 24:15.

 3. Letšatši la Kahlolo le tla fihlelela eng?

Bao ba hwilego ba sa ka ba tseba Jehofa Modimo le go mo hlankela ba tla ba le sebaka sa go fetoga le go dira botse. Ge e ba ba ka dira bjalo, tsogo ya bona e tla ba ya go “tsogela bophelong.” Lega go le bjalo, ba bangwe ba bao ba tsošitšwego ba ka se nyake go ithuta ditsela tša Jehofa. Tsogo ya bona e tla ba ya go “tsogela kahlolo.”—Bala Johane 5:28, 29; Jesaya 26:10; 65:20.

Mafelelong a Letšatši la Kahlolo la nywaga e sekete, Jehofa o tla be a bušeditše batho phethegong. (1 Bakorinthe 15:24-28) A tebelelo e kgahlišago gakaakaang bakeng sa bao ba kwago! Tekong ya mafelelo, Modimo o tla lokolla Sathane Diabolo, yoo a tla bego a ena le nywaga e sekete a tswaleletšwe. Sathane o tla leka go aroša batho go Jehofa gape, eupša bao ba tlago go ganetša Sathane ba tla phela ka mo go sa felego lefaseng.—Bala Jesaya 25:8; Kutollo 20:7-9.

4. Ke letšatši lefe le lengwe la kahlolo leo le tlago go hola batho?

Beibele gape e diriša polelwana e rego “letšatši la kahlolo” go šupa tiragalong yeo e tlago go fediša tshepedišo ya gona bjale ya dilo. Letšatši le la kahlolo le tla tla ka bjako go swana le Meetsefula a mehleng ya Noa, ao a ilego a gogola moloko o kgopo ka moka. Se se thabišago ke gore phedišo yeo e batamelago ka lebelo ya “batho ba sa boifego Modimo” e tla bula tsela bakeng sa lekoko le lefsa la lefase leo “toko e tla [agago]” go lona.—Bala 2 Petro 3:6, 7, 13.

 

Ithute ka mo go oketšegilego

Letšatši la Kahlolo—Ke Eng?

Ithute kamoo Letšatši la Kahlolo le tlago go tlišetša batho ba botegago ditšhegofatšo.