Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI SEPTEMBER 2012

Mathata ao a Welago Basadi

Mathata ao a Welago Basadi

“Ge ke bona kamoo basadi ba swerwego ka gona, ruri ke ikwa ke sa nyake go ba mosadi.”—ZAHRA, WA NYWAGA E 15, yo a tsopotšwego ka kgatišong ya Sefora ya makasine wa GEO.

MANTŠU a ngwanenyana yo, ao a lego ka go le letona, a utolla therešo e nyamišago—lefaseng ka bophara, banenyana le basadi ba kgongwa ke bošoro le go kgethollwa ga basadi bophelong bja bona ka moka. Ela hloko ditherešo tše.

  • Kgethollo ya bong. Kua Asia, batswadi ba bantši ba rata go ba le bana ba bašemane go e na le ba banenyana. Pego ya UN ya 2011 e šišinya gore karolong yeo ya lefase, basadi bao e nyakilego go ba ba dimilione tše 134 ga ba gona setšhabeng ka baka la go ntšhwa ga dimpa, polao ya masea le go hlokomologwa.
  • Thuto. Lefaseng ka bophara, basadi le banenyana ba bopa karolo ya peditharong ya batho bao ba tsenego sekolo lebaka la ka tlase ga nywaga e mene.
  • Go tlaišwa ka tša thobalano. Basadi ba ka godimo ga dimilione tše dikete tše 2,6 ba dula dinageng tšeo go katwa ke banna ba bona go sa dutšego go sa tšewe e le bosenyi.
  • Boemo bjo bobotse bja tša maphelo. Dinageng tšeo di hlabologago, mo e nyakilego go ba metsotsong e mengwe le e mengwe e mebedi, mosadi o bolawa ke mathata a boimana goba a nakong ya ge a belega ka baka la go se hwetše tlhokomelo ya motheo ya tša kalafo.
  • Ditshwanelo tša go ba le dithoto. Gaešita le ge basadi ba lema tekanyo ya ka godimo ga seripa sa dimela tša lefase, dinageng tše dintši ga ba na tshwanelo ya molao ya go ka ba le dithoto goba go abelwa mašemo.

Ke ka baka la’ng basadi ba tingwa ditshwanelo tšeo tša motheo? Ditšo tše dingwe di latela ditumelo tša bodumedi le mekgwa yeo e kgothaletšago goba gaešita le go lokafatša go swarwa gampe ga basadi le go ba tlaiša. Kuranta ya letšatši le letšatši ya Fora e tsopotše ramolao wa Moindia Chandra Rami Chopra, yo a itšego: “Melao ka moka ya bodumedi e na selo seo e swanago ka sona: E thekga go kgethollwa ga basadi.”

Na le wena o na le pono yeo? Na o nagana gore Beibele e tšeela basadi fase, go etša ge dipuku tše dingwe tše dintši tša bodumedi di ba tšeela fase? Go ba bangwe, ditemana tše dingwe tša Beibele di bonagala di dira gore batho ba nagane bjalo. Eupša Modimo yo go bolelwago ka yena ka Beibeleng ge e le gabotse o na le pono efe ka basadi? Gaešita le ge taba ye e ka tsoša maikwelo a sa swanego, go hlahloba ka kelohloko le ka potego seo Beibele e se bolelago go tla re thuša go hwetša karabo.