Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI SEPTEMBER 2012

 Babadi ba Rena ba a Botšiša . . .

Na Dihlatse tša Jehofa di na le Badiredi ba Basadi?

Na Dihlatse tša Jehofa di na le Badiredi ba Basadi?

Ee, Dihlatse tša Jehofa lefaseng ka bophara di na le badiredi ba basadi ba dimilione tše mmalwa. Ke lešaba le legolo la baboledi ba ditaba tše dibotse tša Mmušo wa Modimo. Ge Psalme 68:11 e bolela ka tsela ya boporofeta ka badiredi bao, e re: “Jehofa yena o ntšha lentšu; basadi bao ba bolelago ditaba tše dibotse ke lekoko le legolo.”

Lega go le bjalo, o se ke wa gakantšha bodiredi bja basadi bao e lego Dihlatse tša Jehofa le bodiredi bjoo bo dirwago ke baruti ba basadi ba madumedi a mangwe. Go na le phapano e kgolo magareng ga bona. Ba fapana ka ditsela dife?

Bodiredi bja bona ba bo phetha bathong ba sa swanego. Baruti ba basadi, kudukudu ba Bojakane, ba etelela pele ka diphuthegong tša bona, gomme ba ruta kudu ditho tša mehlape ya bona. Badiredi ba basadi ba Dihlatse tša Jehofa bona ba ruta kudu ka ntle ga phuthego, e lego batho ka kakaretšo, bao ba kopanago le bona bodireding bja bona bja go ya ka ntlo le ntlo le mafelong a mangwe.

Tsela e nngwe yeo ka yona badiredi ba basadi ba Dihlatse tša Jehofa ba sa swanego le ba madumedi a mangwe ke ka modiro wa bona ka phuthegong. Baruti ba basadi ba Bojakane le ba dikereke tše dingwe ba okamela le go ruta ditho tša diphuthego tša bona thuto ya bodumedi bja bona. Lega go le bjalo, badiredi ba basadi ba Dihlatse tša Jehofa ga ba rute ka phuthegong ge banna bao ba kolobeditšwego ba le gona. Go ruta feela banna bao ba kgethetšwego go ba barutiši.—1 Timotheo 3:2; Jakobo 3:1.

Beibele e hlalosa banna e le bona feela bao ba filwego boikarabelo bja go okamela phuthego. Ela hloko mohlala wo o beilwego ke moapostola Paulo ge a be a ngwalela molebeledigotee le yena, Tito, a re: “Ke go tlogetše Kereta gore o . . . bee bagolo motseng o mongwe le o mongwe.” Paulo o ile a oketša ka gore monna yo mongwe le yo mongwe yo a bego a kgethilwe go ba mogolo o be a swanetše go “se latofatšwe ka selo, e be monna wa mosadi o tee.” (Tito 1:5, 6) Paulo o ile a nea Timotheo ditaelo tše swanago lengwalong la gagwe la bodiši, ge a re: “Ge e ba motho le ge e le ofe a katanela go fihlelela bolebeledi, o kganyoga modiro o mobotse. Ka gona molebeledi o swanetše go hloka bosodi, e be monna wa mosadi o tee, . . . yo a swanelegelago go ruta.”—1 Timotheo 3:1, 2.

Ke ka baka la’ng boikarabelo bja bolebeledi bo newa banna feela ka phuthegong? Paulo o re: “Ga ke dumelele mosadi go ruta goba go laola monna, eupša gore a ikhomolele. Gobane Adama o bopilwe pele ke moka gwa bopša Efa.” (1 Timotheo 2:12, 13) Ka gona, tsela yeo tlholo e rulagantšwego ka yona e bontšha lebaka leo ka lona Modimo a neilego banna boikarabelo bja go ruta le bja bolebeledi.

Badiredi ba Dihlatse tša Jehofa ba latela mohlala wa Moetapele wa bona, Jesu Kriste. Morutiwa Luka o ngwadile ka bodiredi bja Jesu, a re: “A tloga motseng o mongwe a ya go o mongwe le go tloga motsaneng o mongwe go ya go o mongwe a bolela le go tsebatša ditaba tše dibotse tša Mmušo wa Modimo.” Ka morago, Jesu o ile a roma balatedi ba gagwe gore ba yo dira mošomo o swanago: “Ba phatša selete seo go tloga motsaneng go ya motsaneng, ba bolela ditaba tše dibotse.”—Luka 8:1; 9:2-6.

Lehono, badiredi ba Jehofa—banna le basadi—ba tšea karolo ka mafolofolo go phethagatšeng seo Jesu a se boletšego e sa le pele, ge a be a re: “Ditaba tše tše dibotse tša Mmušo di tla bolelwa lefaseng ka moka gore e be bohlatse go ditšhaba tšohle, ke moka bofelo bo tla tla.”—Mateo 24:14.