Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

MOROKAMI SEPTEMBER 2012

Tlhompho le Seriti ka Tlase ga Tlhokomelo ya Modimo

Tlhompho le Seriti ka Tlase ga Tlhokomelo ya Modimo

GE Jesu a be a le mo lefaseng, o ile a bonagatša semelo sa Tatagwe wa legodimong ka mo go phethagetšego gotee le tsela ya gagwe ya go dira dilo. O itše: “Ga ke dire selo ka la ka; eupša ke bolela dilo tše go etša ge Tate a nthutile. . . . Ka mehla ke dira dilo tše di mo kgahlago.” (Johane 8:28, 29; Bakolose 1:15) Ka gona, ka go ela hloko tsela yeo ka yona Jesu a bego a dirišana le basadi le tsela yeo a bego a ba lebelela ka yona, re kgona go bona le go kwešiša pono ya Modimo ka basadi gotee le seo a se letetšego go bona.

Diithuti tše dintši di amogetše tsela yeo Jesu a bego a lebelela basadi ka yona e le e fapanego kudu go ya ka seo se ngwadilwego dipegong tša Diebangedi. E fapane ka tsela efe? Sa bohlokwa kudu ke gore na dithuto tša gagwe di sa dutše di nea basadi tokologo e oketšegilego lehono?

Kamoo Jesu a Bego a Swara Basadi ka Gona

Jesu o be a sa ba tšee e fo ba bao ba ka dirišetšwago thobalano. Go ya ka baetapele ba bangwe ba bodumedi bja Sejuda, go kopana le batho ba bong bjo bo fapanego go ka fo lebiša kganyogong e feteletšego ya thobalano. Ka ge basadi ba be ba  boifša gore ba ka goketša motho, ba be ba sa dumelelwe gore ba boledišane le banna mafelong a batho bohle goba gore ba sepele ba sa ikhupetša ka lešira. Ka lehlakoreng le lengwe, Jesu o ile a eletša banna gore ba laole dikganyogo tša bona tša nama gomme ba sware basadi ka seriti go e na le go ba bea lekatana ditswalanong tša batho.—Mateo 5:28.

Jesu gape o itše: “Mang le mang yo a hlalago mosadi wa gagwe a nyala yo mongwe, o a hlotlola gomme o a mo senyetša.” (Mareka 10:11, 12) Ka go re’alo o ile a ganetša thuto yeo e bego e atile ya borabi yeo e bego e dumelela banna go hlala basadi ba bona “ka lebaka le lengwe le le lengwe.” (Mateo 19:3, 9) Bajuda ba bantši ba be ba sa tsebe kgopolo ya gore ge monna a hlotlola o senyetša mosadi wa gagwe. Borabi ba bona ba be ba ruta gore monna le ka mohla o be a ka se ke a hlotlola gomme a senyetša mosadi wa gagwe—mosadi ke yena feela yo a bego a ka itshwara ka go se botege! Go etša ge puku e nngwe ya go hlalosa Beibele e bea taba ye, “ka go rweša monna boikarabelo bjo bo swanago le bja mosadi bja boitshwaro, Jesu o ile a phagamiša maemo le seriti sa basadi.”

Mafelelo a thuto ya gagwe lehono: Phuthegong ya Bokriste ya Dihlatse tša Jehofa, basadi ba kopana le banna ka bolokologi dibokeng. Lega go le bjalo, ga go nyakege gore ba boife gore ba tla lebelelwa ka tsela e sa hlomphegego goba go tlwaelwa ka mo go feteletšego, ka gobane banna ba Bakriste ba ela hloko gore ba swara “basadi ba bagolo bjalo ka bomma, basadi ba bafsa bjalo ka dikgaetšedi ka tshekego yohle.”—1 Timotheo 5:2.

Jesu o be a ipha nako ya go ruta basadi. Ka go se swane le pono yeo e bego apareditše ya borabi yeo e bego e dira gore basadi ba dule ba sa tsebe selo, Jesu o be a ba ruta le go ba kgothaletša gore ba itlhalose. Jesu ka go gana go tima Maria lethabo la go ithuta, o ile a bontšha gore mosadi ga se wa go fo šoma mešomo ya ka gae. (Luka 10:38-42) Mogolo’a Maria e lego Mareta, le yena o ile a holwa ke dithuto tša Jesu, bjalo ka ge go bontšhwa ke tsela e bohlale yeo a ilego a araba Jesu ka yona ka morago ga lehu la Latsaro.—Johane 11:21-27.

Jesu o be a kgahlegela seo basadi ba se naganago. Ka nako yeo, basadi ba bantši kudu ba Bajuda ba be ba dumela gore tsela ya go hwetša lethabo e be e le go ba le morwa yo a hlomphegago, ge e ba go kgonega e be moporofeta. Ge yo mongwe wa basadi a be a goeletša ka gore, “Go thaba popelo yeo e ilego ya go rwala!” Jesu o ile a diriša sebaka seo gore a mmotše selo se sengwe se sekaone. (Luka 11:27, 28) Ka go bontšha gore go kwa Modimo e be e le gona go lego bohlokwa, Jesu o ile a mo hlalosetša selo seo se lego bohlokwa go feta tema yeo e kgathwago ke basadi setšong.—Johane 8:32.

Mafelelo a thuto ya gagwe lehono: Barutiši ka phuthegong ya Bokriste ba amogela ditlhaloso tšeo di newago ke basadi dibokeng tša Bokriste. Ba hlompha basadi bao ba gotšego tsebong ka go ba ga bona “bao ba rutago se sebotse,” ba sa  bonwe gotee le ka mohlala. (Tito 2:3) Gape ba ithekgile ka bona gore ba bolele ditaba tše dibotse tša Mmušo wa Modimo phatlalatša.—Psalme 68:11; bona lepokisi le le rego  “Na Moapostola Paulo o be a Thibela Basadi go Bolela?” go letlakala 9.

Jesu o be a na le taba le basadi. Mehleng ya Beibele, barwedi ba be ba sa tšeelwe godimo kudu go swana le barwa. Talmud e bonagatša pono ye, ge e re: “Go thaba motho yo bana ba gagwe e lego bašemane, gomme go madimabe yoo bana ba gagwe e lego banenyana.” Batswadi ba bangwe ba be ba tšea ngwanenyana e le morwalo o mogolo—ba be ba tla swanelwa ke go mo hweletša molekane ke moka ba mo ntšhetše magadi, gomme ba be ba ka se ithekge ka yena gore a ba hlokomele ge ba tšofetše.

Jesu o ile a bontšha gore bophelo bja ngwanenyana bo bohlokwa go swana le bja mošemane—o ile a tsoša morwedi wa Jairo, go etša ge a ile a tsoša morwa wa mohlologadi kua Naini. (Mareka 5:35, 41, 42; Luka 7:11-15) Ka morago ga gore a fodiše mosadi yo a bego a tshwenywa ke “moya o mobe wo o mo fokodišitšego ka nywaga e lesomeseswai,” Jesu o ile a mmitša “morwedi wa Aborahama,” e lego polelwana yeo e bego e nyakile e sa tsebje dingwalweng tša Sejuda. (Luka 13:10-16) Ka go diriša polelwana ye ya go hlompha le yeo e bontšhago botho, o be a sa fo mo lebelela e le setho seo se feletšego sa setšhaba eupša gape o be a lemoga tumelo ya gagwe.—Luka 19:9; Bagalatia 3:7.

Mafelelo a thuto ya gagwe lehono: Polelwana ya kua Asia e re: “Go godiša morwedi go swana le go nošeletša moagišani serapa.” Go e na le gore ba tutuetšwe ke kgopolo yeo, botate ba Bakriste ba nago le lerato ba na le taba le bana ba bona ka moka, e lego barwa le barwedi ba bona. Batswadi ba Bakriste ba kgonthišetša gore bana ba bona ka moka ba hwetša thuto e swanetšego gotee le tlhokomelo ya tša maphelo.

Jesu o ile a godiša Maria Magdalena ka go dira gore a begele baapostola ba gagwe ka tsogo ya gagwe

Jesu o be a bota basadi. Dikgorong tša tsheko tša Bajuda, bohlatse bjo bo newago ke mosadi bo be bo lekanywa le bja lekgoba. Josephus, radihistori wa lekgolong la pele la nywaga, o eleditše ka gore: “Anke go se ke gwa amogelwa bohlatse bjo bo tšwago go basadi, ka baka la go se tsepame ga bona le go nyatšega ga bong bja bona.”

Ka mo go fapanego, Jesu o ile a kgetha gore tsogo ya gagwe e hlatselwe ke basadi. (Mateo 28:1, 8-10) Gaešita le ge basadi ba bao ba botegago e bile dihlatse tšeo di bonego ka mahlo ge Morena wa bona a bolawa le go bolokwa, baapostola ba be ba thatafalelwa ke go dumela mantšu a basadi bao. (Mateo 27:55, 56, 61; Luka 24:10, 11) Lega go le bjalo, ka go itšweletša go basadi pele, Kriste o ile a ba bona ba swanelwa ke gore ba nee bohlatse go etša ge barutiwa ba bangwe ba gagwe ba be ba dira.—Ditiro 1:8, 14.

 Mafelelo a thuto ya gagwe lehono: Diphuthegong tša Dihlatse tša Jehofa, banna bao ba nago le boikarabelo ba tšeela basadi godimo ka go amogela seo ba se bolelago. Banna ba Bakriste bona ‘ba godiša’ basadi ba bona ka go ba theetša ka kelohloko.—1 Petro 3:7; Genesi 21:12.

Melao ya Motheo ya Beibele e Dira Gore Basadi ba Thabe

Bao ba latelago melao ya motheo ya Beibele ba hlompha basadi le go ba nea seriti

Ge banna ba ekiša Kriste, basadi ba newa tlhompho le tokologo tšeo Modimo a bego a ba reretše tšona mathomong. (Genesi 1:27, 28) Go e na le go thekga boikgogomošo bja banna, banna ba Bakriste ba itumelela gore ba hlahlwe ke melao ya motheo ya Beibele, e lego seo se dirago gore balekane ba bona ba thabe.—Baefeso 5:28, 29.

Ge Yelena a be a thoma go ithuta Beibele, o be a tlaišwa ke monna wa gagwe a ikhomoletše. O be a godišeditšwe tikologong ya bošoro, moo mekgwa ya go thopša ga basadi le go swarwa gampe e bego e atile. Yelena o re: “Ke be ke matlafatšwa ke seo ke bego ke ithuta sona Beibeleng. Ke be ke tseba gore go be go na le motho yo a nthatago kudu, a ntšeela godimo e bile a ena le taba le nna. Gape ke be ke kwešiša gore ge monna wa ka a be a ka ithuta Beibele, o be a tla fetoša tsela yeo a ntebelelago ka yona.” Toro ya gagwe e ile ya phethagala ge mafelelong monna wa gagwe a dumela go ithuta Beibele gomme ka morago a kolobetšwa e le yo mongwe wa Dihlatse tša Jehofa. Yelena o re: “O ile a bea mohlala tabeng ya go itshwara. Re ile ra ithuta go lebalelana ka bolokologi.” O phetha ka gore’ng? O re: “Melao ya motheo ya Beibele e tloga e nthušitše gore ke ikwe ke nyakega e bile ke šireletšegile lenyalong la rena.”—Bakolose 3:13, 18, 19.

Boitemogelo bja Yelena ga se bja moswananoši. Basadi ba dimilione ba Bakriste ba thabile ka gobane bona gotee le banna ba bona ba katanela go diriša melao ya motheo ya Beibele manyalong a bona. Ba hwetša tlhompho, boiketlo le tokologo ge ba kopane le Bakristegotee le bona.—Johane 13:34, 35.

Banna le basadi ba Bakriste ba lemoga gore ka ge e le batho ba nago le sebe le ba sa phethagalago, ke karolo ya tlholo ya Modimo yeo “e [ilego] ya dirwa gore e ikokobeletše lefeela.” Lega gole bjalo, ka go batamela kgauswi le Modimo le Tatago bona yo lerato, Jehofa, ba na le kholofelo ya gore ba “lokollwe bokgobeng bja tshenyego” le go thabela “tokologo ya letago ya bana ba Modimo.” Banna le basadi bao ba hlokometšwego ke Modimo ba na le tebelelo e botse gakaakang!—Baroma 8:20, 21.