Eya go dikagare

Eya go menyu wa bobedi

Dihlatse tša Jehofa

Sepedi

Morokami  |  February 2012

 Ditsela tša go Hwetša Lethabo la Lapa

Ge Ngwana wa Gago yo a Lego Mahlalagading a Belaela Tumelo ya Gago

Ge Ngwana wa Gago yo a Lego Mahlalagading a Belaela Tumelo ya Gago

Ge ba dutše ba gola, bafsa ba bantši ga kgetha go amogela bodumedi bja batswadi ba bona. (2 Timotheo 3:14) Lega go le bjalo, ba bangwe ga ba dire bjalo. O ka dira’ng ge e ba ngwana wa gago yo a golago a thoma go belaela tumelo ya gago? Sehlogo se se tla ahlaahla kamoo Dihlatse tša Jehofa di swaraganago le tlhohlo e bjalo ka gona.

“Ga ke sa nyaka go latela bodumedi bja batswadi ba ka. Ke ikwa ke se sa nyaka.”—Cora, 18. *

O KGODIŠEGILE gore bodumedi bja gago bo ruta therešo ka Modimo. O dumela gore Beibele e bontšha tsela e kaonekaone ya bophelo. Ka gona, ke ga tlhago go leka go nweletša ditekanyetšo tša gago ngwaneng wa gago. (Doiteronomio 6:6, 7) Eupša go thwe’ng ge e ba ngwana wa gago a se sa kgahlegela dilo tša moya ge a dutše a gola? Go thwe’ng ge e ba a thoma go belaela tumelo yona yeo go bego go bonagala a e amogela ka phišego ge e be e sa le ngwana?—Bagalatia 5:7.

Ge e ba seo se direga, o se ke wa phetha ka gore o paletšwe bjalo ka motswadi wa Mokriste. Go na le dilo tše dingwe tšeo di ka bago di akaretšwa, bjalo ka ge re tla bona. Lega go le bjalo, tseba se: Tsela yeo o swaraganago le pelaelo ya ngwana wa gago yo a lego mahlalagading e ka laola taba ya ge e ba a tla kgetha go amogela tumelo ya gago goba go se e amogele. Ge e ba o lwantšha ngwana wa gago yo a lego mahlalagading mabapi le taba ye, o tlo lwa ntwa e thatathata—ntwa yeo go nago le kgonagalo e kgolo ya gore o se ke wa e fenya.—Bakolose 3:21.

Go kaone kudu gore o amogele temošo ya moapostola Paulo. O ngwadile gore: “Mohlanka wa Morena ga se a swanela go lwa eupša o swanetše go ba bonolo go bohle, a swanelegele go ruta, a itshware.” (2 Timotheo 2:24) Na o ka itlhatsela o ‘swanelegela go ruta’ ge e ba ngwana wa gago yo a lego mahlalagading a belaela tumelo ya gago?

Eba le Temogo

Sa pele, leka go lemoga dilo tšeo di ka bago di dira gore ngwana wa gago yo a lego mahlalagading a be le pono yeo. Ka mohlala:

  • Na o ikwa a lewa ke bodutu e bile a se na bagwera ka phuthegong ya Bokriste? “Ka ge ke be ke nyaka bagwera, ke ile ka tlwaelana le ba mmalwa bao ke bego ke tsena le bona sekolo, gomme seo se ile sa ntšhitiša go gola moyeng ka nywaga e mentši. Ke ile ka se sa kgahlegela dilo tša moya kudu ka baka la ditlwaelano tše mpe, gomme ga bjale ke itshola kudu.”—Lenore, 19.

  •   Na ga a ikholofele, e lego seo se dirago gore a thatafalelwe ke go bolela ka tumelo ya gagwe? “Ge ke be ke sa tsena sekolo, ke be ke dikadika go botša bao ke tsenago le bona ka klaseng ka ditumelo tša ka. Ke be ke tšhoga gore ba tla ntšea ke le motho wa go makatša goba ke le ‘moruti.’ Bana ka moka bao ba bego ba fapane ba be ba sa amogelwe, gomme ke be ke sa nyake seo se ntiragalela.”—Ramón, 23.

  • Na o ikwa a imelwa ke boikarabelo bja go phela ka ditekanyetšo tša Bokriste? “Ke be ke bona eka kholofetšo ya Beibele ya bophelo bjo bo sa felego e be e le godimodimo manamelong a matelele, gomme ke se ka tšwa ke thoma go a namela; ke le kgolekgole le ona. Letšhogo la go namela manamelo ao e be e le le legolo kudu moo ke ilego ka nagana gore ke tlogele tumelo ya ka.”—Renee, 16.

Boledišanang ka Taba Yeo

Ke bothata bofe bjo bogolo bjoo ngwana wa gago yo a lego mahlalagading a ka bago a lebeletšane le bjona? Tsela e kaonekaone ya go tseba seo ke gore o mmotšiše! Lega go le bjalo, hlokomela gore o se ke wa dumelela poledišano e fetoga ngangišano. Go e na le moo, latela keletšo e lego go Jakobo 1:19, e rego: ‘Akgofela go kwa, o diege go bolela o be o diege go galefa.’ O se mo felele pelo. Diriša “go se fele pelo ka moka le bokgoni bja go ruta,” go swana le ge o be o ka di diriša ge o bolela le motho yo e sego setho sa lapa la gago.—2 Timotheo 4:2.

Ka mohlala, ge e ba ngwana wa gago yo a lego mahlalagading a sa nyake go ya dibokeng tša Bokriste, leka go hwetša ge e ba go ena le seo se mo tshwenyago. Eupša o dire bjalo ka go se fele pelo. Ga go botse bjoo bo fihlelelwago ke motswadi boemong bjo bo latelago.

Morwa: Ke fo ba ke se sa rata go ya dibokeng.

Tate: [ka segalo se se bontšhago go ferekana] O ra gore’ng ge o re ga o rate go ya dibokeng?

Morwa: Di fo ba di nteša bodutu!

Tate: Na o ikwa bjalo ka Modimo? O go leša bodutu? Ke a go kwa, eupša o a iphora! Ge feela o dula ka mo ga rena, o tla ya le rena—o rata goba o sa rate!

Modimo o nyaka gore batswadi ba rute bana ba bona ka yena le gore bana ba kwe batswadi ba bona. (Baefeso 6:1) Lega go le bjalo, wena o nyaka gore ngwana wa gago a dire se se fetago go fo latela lenaneo la gago la dilo tša moya le go ya le wena dibokeng tša Bokriste a sa rate. Ge e ba go kgonega, o ka thabela gore a dire seo ka go rata e sego ka gobane a gapeletšwa.

Go na le kgonagalo e kgolo ya gore o fihlelele seo ge e ba o ka lemoga mathata a magolo ao a ka bago a dira gore a ikwe ka tsela yeo. O naganne ka seo, ela hloko kamoo poledišano yeo e lego ka mo godimo e bego e ka swarwa ka gona ka katlego.

Morwa: Ke fo ba ke se sa rata go ya dibokeng.

Tate: [a išitše maswafo fase] O re’ng o ikwa ka tsela yeo?

Morwa: Di fo ba di nteša bodutu!

Tate: Go dula iri e tee goba tše pedi go ka leša bodutu. Ke’ng seo o bonago e le tlhohlo e kgolo ka seo?

Morwa: Ga ke tsebe. Ke nagana gore nka fo ba ke rata go ba lefelong le lengwe.

Tate: Na bagwera ba gago ba ikwa ka tsela yeo?

Morwa: Go ba gona, bothata ke bjona bjoo! Ga ke na mogwera—ke ra gore ga ke sa na bagwera. Ge e sa le mogwera wa ka wa paale a huduga, ke bona go se sa na motho yoo nka bolelago le yena! Batho ba bangwe ka moka ba thabile. Ke ikwa ke lewa ke bodutu!

Ka go dira gore ngwana wa gagwe a bolele ka bolokologi, tate wa boemong bjo bja ka mo godimo ga a fo hwetša bothata bjo bogolo feela —bjoo boemong bjo, e lego go lewa ke bodutu—eupša o dira gore a mmote, ka go re’alo a dira gore ngwana wa gagwe a dule a ikwa a lokologile go ka boledišana le yena.—Bona lepokisi le le sepedišanago le sehlogo se le le rego  “Se Fele Pelo!”

Ge nako e dutše e eya, bafsa ba bantši ba lemoga gore ge ba fenya mathata ao a ba šitišago go gola moyeng, gantši ba tla ikwa ba thabile e bile ba kgotsofaletše tumelo ya bona. Ela hloko Ramón, mofsa yoo a tsopotšwego pejana yoo a bego a sa rate kgopolo ya go itsebiša gore ke Mokriste sekolong. Mafelelong, Ramón o ile a lemoga gore go bolela ka tumelo ya gagwe go be go sa tšhoše kamoo a bego a nagana ka gona—le ge go be go feleletša ka gore a kwerwe. O anega ka gore:

“Lebakeng le lengwe mošemane yo mongwe sekolong o be a nkwera ka baka la bodumedi bja ka. Ke ile ka tšhoga kudu, gomme ka lemoga gore klase ka moka e be e theeditše. Ke moka ka leka go fetoša poledišano gomme ka botšiša yena ka tumelo ya gagwe. Seo se mmakaditšego ke gore o ile a tšhoga go feta nna! Ke moka ka lemoga gore bafsa ba bantši ba na le ditumelo tša bodumedi, eupša ga ba di kwešiše. Se se kgahlišago ke gore nna ke kgona go hlalosa ditumelo tša ka. Ge e le gabotse, ge go tliwa tabeng ya go bolela ka tumelo, bao ke tsenago le bona ka klaseng ke bona ba swanetšego go tšhoga—e sego nna!”

LEKA MOKGWA WO: Dira gore ngwana wa gago yo a lego mahlalagading a tšholle sa mafahleng a gagwe ka go mmotšiša gore o ikwa bjang ka go ba Mokriste. Go ya ka pono ya gagwe, go na le mehola efe? Go na le ditlhohlo dife? Na mehola ke e mentši go feta ditlhohlo? Ge e ba go le bjalo, e di feta bjang? (Mareka 10:29, 30) Ngwana wa gago yo a lego mahlalagading a ka ngwala seo a se naganago letlakaleng a diriša dikarolo tše pedi—ya ka letsogong le letshadi e be ya ditlhohlo gomme ya ka letsogong le letona e be ya mehola. Go bona dikgopolo tša gagwe letlakaleng go ka thuša ngwana wa gago yo a lego mahlalagading go lemoga bothata bja gagwe le go hwetša tharollo.

‘Matla a Tlhaologanyo’ a Ngwana wa Gago yo a Lego Mahlalagading

Batswadi le ditsebi ba lemogile gore bana ba banyenyane le bafsa ga ba nagane go swana. (1 Bakorinthe 13:11) Gaešita le ge bana ba banyenyane ba nagana ka tsela e lebanyago, bafsa gantši ba bea mabaka ka tsela e sa lebanyego. Ka mohlala, ngwana yo monyenyane a ka rutwa gore Modimo o bopile dilo tšohle. (Genesi 1:1) Lega go le bjalo, mofsa a ka tshwenywa ke dipotšišo tše bjalo ka tše rego: ‘Ke tseba bjang gore Modimo o gona? Ke ka baka la’ng Modimo yo lerato a ka dumelela bobe? Go ka kgonega bjang gore Modimo o be a dutše a le gona?’—Psalme 90:2.

 O ka nagana gore dipotšišo tše bjalo di ra gore tumelo ya ngwana wa gago yo a lego mahlalagading e fokotšegile. Ge e le gabotse, e ka ba gore e oketšegile. Go ba gona, go botšiša dipotšišo e ka ba karolo e bohlokwa kudu kgolong ya moya ya Mokriste.—Ditiro 17:2, 3.

Go feta moo, ngwana wa gago yo a lego mahlalagading o ithuta go diriša ‘matla a gagwe a tlhaologanyo.’ (Baroma 12:1, 2) Ka baka leo, a ka kgona go kwešiša “bophara le botelele le bophagamo le go iša” ga tumelo ya Bokriste kudu go feta ge e be e sa le ngwana. (Baefeso 3:18) Go feta le ge e le neng pele, gona bjale ke nako ya go thuša ngwana wa gago yo a lego mahlalagading go bea mabaka ka ditumelo tša gagwe e le gore a ka ba le kgodišego e tiilego ka tumelo ya gagwe.—Diema 14:15; Ditiro 17:11.

LEKA MOKGWA WO: Boela dilong tša motheo le ngwana wa gago yo a lego mahlalagading, le boledišane ka ditaba tšeo wena le yena, le ka bago le be le di tšeela fase. Ka mohlala, dira gore a nagane ka dipotšišo tše bjalo ka tše: ‘Ke’ng seo se nkgodišago gore Modimo o gona? Ke bohlatse bofe bjo ke bo bonago bjo bo hlatselago gore Modimo o na le taba le nna? Ke ka baka la’ng ke bona gore go kwa melao ya Modimo ke selo seo se nkholago?’ Hlokomela gore o se ke wa gapeletša ngwana wa gago yo a lego mahlalagading go bona dilo ka tsela ya gago. Go e na le moo, mo thuše gore a ikhweletše mabaka ao a mo kgodišago. Ka tsela yeo go tla ba bonolo gore a kgodišege ka tumelo ya gagwe.

Go ‘Kgodišwa go Dumela’

Beibele e bolela ka lesogana le le bitšwago Timotheo leo le bego le tseba mangwalo a makgethwa “go tloga boseeng.” Lega go le bjalo, moapostola Paulo o ile a kgothatša Timotheo ka gore: “Tšwela pele dilong tše o ithutilego tšona gomme wa kgodišwa gore o di dumele.” (2 Timotheo 3:14, 15) Go swana le Timotheo, ngwana wa gago yo a lego mahlalagading a ka ba a ithutile ditekanyetšo tša Beibele go tloga ga e sa le a belegwa. Lega go le bjalo, ga bjale o swanetše go mo kgodiša e le gore a ka ba le mabaka ao a dirago gore a kgodišege.

Puku ya Dipotšišo tša Bafsa le Dikarabo tše Šomago, Bolumo 1, e re: “O na le tshwanelo ya go laela ngwana wa gago yo a lego mahlalagading gore a latele lenaneo la gago la borapedi, ge feela a sa dula le wena. Lega go le bjalo, mafelelong pakane ya gago ke go bjala lerato la go rata Modimo ka pelong ya ngwana wa gago, e sego gore a fo ithola kgwara.” Ge o ka dula o gopola pakane yeo, o ka thuša ngwana wa gago yo a lego mahlalagading gore a ‘tie tumelong’ e le gore e be tsela ya gagwe ya bophelo—e sego ya gago feela. *1 Petro 5:9.

^ ser. 4 Maina sehlogong se a fetotšwe.

^ ser. 40 Bakeng sa tsebišo e oketšegilego, bona Morokami wa May 1, 2009, matlakala 10-12, le Dipotšišo tša Bafsa le Dikarabo tše Šomago, Bolumo 1, matlakala 315-318.

IPOTŠIŠE GORE . . .

  • Ke arabela bjang ge ngwanaka a belaela ditumelo tša ka?

  • Nka diriša bjang ditaba tše di lego sehlogong se go kaonefatša tsela yeo ke arabelago ka yona?