Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI DECEMBER 2011

Dikotsi di ka se sa hlwa di Eba Gona!

Dikotsi di ka se sa hlwa di Eba Gona!

GE MOTHO a ka go botša gore: “Kgauswinyane dikotsi di ka se sa hlwa di eba gona,” o be o tla arabela bjang? Mohlomongwe o be o ka re: “O swanetše go ba o lora. Dikotsi e fo ba karolo ya bophelo.” Goba mohlomongwe o ka fo ipotšiša gore: ‘Motho yo o nagana gore o fora mang?’

Gaešita le ge dikotsi tša tlhago di bonagala eka di ka se fele, go na le motheo wa kgonthe wa kholofelo ya gore se se tla fetoga. Lega go le bjalo, phetogo e ka se tle ka maiteko a motho. Batho ga ba kgone go kwešiša ka botlalo gore dilo tša tlhago di direga bjang le gona ka baka la’ng, re se sa bolela ka taba ya go di laola goba go di fetoša. Kgoši Solomone wa Isiraele ya bogologolo yo a bego a tsebja ka bohlale bja gagwe le temogo, o ngwadile gore: “Batho ba [palelwa] ke go hlatha modiro wo o dirwago ka tlase ga letšatši; le ge batho ba itapiša kudu go e tsoma, eupša ba ka se e hlathe. Gaešita le ge ba ka re ba hlalefile kudu gore ba ka e tseba, fela ba ka se e hlathe.”—Mmoledi 8:17.

Ge e ba batho ba sa kgone go laola dikotsi tša tlhago, gona ke mang yo a ka di laolago? Beibele e re Mmopi wa rena ke yena yo a tlago go dira phetogo ye. Ke Yena a dirilego gore go be le ditshepedišo tša lefase tša tswalano ya diphedi le tikologo ya tšona, tše bjalo ka modikologo wa meetse. (Mmoledi 1:7) Le gona go fapana le batho, Modimo o na le matla a sa lekanyetšwego. A hlatsela ntlha ye, moporofeta Jeremia o itše: “Wena Mmuši Morena Jehofa, ke wena yo a dirilego magodimo le lefase ka matla a gago a magolo le ka letsogo la gago le le otlolotšwego. Taba ye ka moka ga se yeo e ka go palelago.” (Jeremia 32:17) Ka ge Modimo a bopile lefase le dilo ka moka tšeo di lego go lona, go a kwagala gore o tseba go laola dilo e le gore batho ba ka dula go lona ka khutšo e bile ba šireletšegile.—Psalme 37:11; 115:16.

Ka gona, Modimo o tla tliša diphetogo tšeo di nyakegago bjang? O tla gopola gore sehlogo sa bobedi lelokelelong le la dihlogo se boletše gore dilo tše dintši tšeo di diregago lefaseng lehono di šupa go “pontšho” yeo e bolelago “bofelo bja tshepedišo ya dilo.” Jesu o itše: “Ge le bona dilo tše di direga, le tsebe gore Mmušo wa Modimo o batametše.” (Mateo 24:3; Luka 21:31) Mmušo wa Modimo, e lego pušo ya Modimo ya legodimong, o tla tliša diphetogo tše dikgolo lefaseng, gaešita le go laola matla a tlhago. Gaešita le ge Jehofa Modimo a ena le matla a go dira se ka boyena, o kgethile go nea Morwa wa gagwe modiro wo. Ge a bolela ka yena, moporofeta Daniele o itše: “A newa pušo, seriti le mmušo, gore batho ba merafo, ditšhaba le maleme ka moka ba mo hlankele.”—Daniele 7:14.

 Morwa wa Modimo, Jesu Kriste, o neilwe matla a nyakegago bakeng sa go tliša diphetogo ka moka tšeo di nyakegago go dira lefase lefelo leo le rategago. Nywageng e dikete tše pedi e fetilego, ge Jesu a be a le mo lefaseng, o ile a bontšha ka tekanyo e nyenyane bokgoni bja gagwe bja go laola dilo tša tlhago. Lebakeng le lengwe ge barutiwa ba gagwe ba le ka sekepeng Lewatleng la Galilea, go ile “gwa tsoga ledimo le legolo le lešoro, maphoto a tšwela pele a kgaphetšegela ka sekepeng, moo sekepe se bego se le kgauswi le go tlala meetse.” Barutiwa ba gagwe ba ile ba tšhoga. Ka ge ba be ba tšhogetše maphelo a bona, ba ile ba ya go Jesu. Jesu o ile a dira’ng? O ile a fo “kgalema phefo gomme a re go lewatle: ‘Homola o re tuu!’ Phefo ya okobala, gwa homola gwa re tuu.” Barutiwa ba gagwe ba be ba maketše ke moka ba botšiša gore: “Gabotsebotse yo ke mang? Gaešita le phefo le lewatle di a mo kwa.”—Mareka 4:37-41.

Ga e sa le go tloga ka nako yeo, Jesu o rotošeditšwe lefelong la moya e bile o neilwe matla a magolo kudu le bolaodi. Bjalo ka Kgoši ya Mmušo wa Modimo, o na le boikarabelo gotee le bokgoni bja go tliša diphetogo ka moka tše di nyakegago e le gore a nee batho bophelo bja khutšo le bjo bo šireletšegilego mo lefaseng.

Lega go le bjalo, ka ge re bone, mathata a mantši le dikotsi di bakilwe ke batho goba di gakaditšwe ke ditiro tša bona tša boithati le tša megabaru. Mmušo o tla dira’ng ka bao ba phegelelago ditseleng tše bjalo gomme ba gana go fetoga? Beibele e bolela ka Morena Jesu a etla “go tšwa legodimong a na le barongwa ba gagwe ba matla, a le mollong o laumago, nakong ya ge a tlo lefetša bao ba sa tsebego Modimo le bao ba sa kwego ditaba tše dibotse tša mabapi le Morena wa rena Jesu.” Ee, o tla “senya bao ba senyago lefase.”—2 Bathesalonika 1:7, 8; Kutollo 11:18.

Ka morago ga moo, “Kgoši ya dikgoši” Jesu Kriste, o tla laola matla a lefase a tlhago ka mo go feletšego. (Kutollo 19:16) O tla kgonthišetša gore balata ba Mmušo ba ka se sa hlaselwa ke dikotsi le ge e le dife. O tla diriša matla a gagwe go laola dilo tša leratadima e le gore boemo bja leratadima le medikologo ya dihla di šome ka tsela yeo di tlago go hola batho. Se se tla feleletša ka gore go phethagale seo Jehofa Modimo a se holofeditšego batho ba gagwe mehleng ya bogologolo ge a be a re: “Ke tla le nešetša dipula ka nako e swanetšego gomme naga ya tšweletša dienywa tša yona, le sehlare sa naga sa enywa dienywa tša sona.” (Lefitiko 26:4) Batho ba tla kgona go ikagela dintlo ba sa boife gore di tla ba lahlegela kotsing e itšego ka gobane Modimo o itše: “Ba tla aga dintlo ba dula go tšona; ba tla bjala dirapa tša merara ba ja dienywa tša tšona.”—Jesaya 65:21.

O Swanetše go Dira Eng?

Ga go pelaelo gore go swana le ba bangwe ba bantši le wena o gogelwa ke kgopolo ya go phela lefaseng leo le se sa nago dikotsi tše di senyago. Lega go le bjalo, o swanetše go dira’ng gore o be moo? Ka ge “bao ba sa tsebego Modimo” le “bao ba sa kwego ditaba tše dibotse” ba sa swanelegele go phela lefaseng leo le se nago dikotsi leo le tlago, go molaleng gore motho o swanetše gore ga bjale a ithute ka Modimo le go thekga thulaganyo ya gagwe ya go buša lefase. Modimo o nyaka gore re mo tsebe le go kwa ditaba tše dibotse tša Mmušo woo a o hlomilego ka Morwa wa gagwe.

Tsela e kaone kudu ya go kgona go dira se ke ka go ithuta Beibele ka šedi. E hupere ditaelo tšeo di dirago gore motho a swanelegele go phela tikologong e šireletšegilego yeo e tlago go ba gona ka tlase ga pušo ya Mmušo. Ke ka baka la’ng o sa kgopele Dihlatse tša Jehofa gore di go thuše go ithuta seo Beibele e se rutago? Di boemong bjo bobotse bja go go thuša bakeng sa morero wo. Therešo ke gore ge o dira maiteko a go tseba Modimo le go kwa ditaba tše dibotse, gona mantšu a Diema 1:33 a tla phethagala go wena ge a re: “Ge e le yo a ntheetšago, o tla dula a bolokegile a sa tšhoge go welwa ke masetlapelo.”

Ithute ka mo go oketšegilego

Ditaba tše Dibotse ke Eng?

Ithute seo se bolelwago ke ditaba tše dibotse, ke ka baka la eng di akgofile, le gona ke eng seo o swanetšego go se dira.

Mmušo wa Modimo ke Eng?

Kgoši ya Mmušo wa Modimo ke mang, gomme ke eng seo Mmušo woo o tlago go se fihlelela?

Kgopela Thuto ya Beibele

Hwetša thuto ya mahala ya Beibele ka nako yeo e go swanetšego le lefelong leo le go swanetšego.