Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI AUGUST 2011

 Beibele e Fetoša Maphelo

Beibele e Fetoša Maphelo

KE KA baka la’ng monna yo a bego a nyetše basadi ba bantši le moganetši wa Dihlatse tša Jehofa a ile a phetha ka go ba Hlatse? Ke’ng seo se tutueditšego moruti wa Kereke ya Pentekoste gore a fetoše ditumelo tša gagwe? Ke’ng seo se thušitšego mosadi yo a godišitšwego gabohloko gore a fenye maikwelo a go itlhoya gomme a batamele kgauswi le Modimo? Ke ka baka la’ng motho yo a bego a fišegela mmino wa morethetho o matla a ile a fetoga modiredi wa bodumedi? Bala dipego tše bakeng sa go hwetša dikarabo.

“Ke Fetogile Monna yo Mokaone.”—RIGOBERT HOUETO

  • NGWAGA WA MATSWALO: 1941

  • NAGA: BENIN

  • BOPHELO BJA PELE E EBA MOKRISTE: MONNA YO A NYETŠEGO BASADI BA BANTŠI LE MOGANETŠI WA DIHLATSE TŠA JEHOFA

BOPHELO BJA KA BJA NAKONG E FETILEGO:

Ke belegetšwe Cotonou, e lego motse o mogolo wa Benin. Ke godišitšwe ke le Mokatholika eupša ke be ke sa ye kerekeng ka mehla. Makatholika a mantši a moo ke bego ke dula gona a be a ena le basadi ba bantši, ka ge go nyala basadi ba bantši go be go dumelelwa ke molao nakong yeo. Mafelelong ke ile ka nyala basadi ba bane.

Ge borabele bo be bo thoma ka bo-1970, ke be ke nagana gore bo be bo tla hola naga ya gešo. Ke ile ka thekga borabele bjoo ka mo go feletšego gomme ka tsenela dipolitiki. Marabele a be a sa rate Dihlatse tša Jehofa ka gobane Dihlatse di be di sa tšee lehlakore dipolitiking. Ke be ke le yo mongwe wa bao ba bego ba tlaiša Dihlatse. Ge baromiwa ba Dihlatse ba be ba rakwa nageng ka 1976, ke be ke kgodišegile gore ba be ba ka se tsoge ba boile.

KAMOO BEIBELE E FETOTŠEGO BOPHELO BJA KA:

Borabele bo fedile ka 1990. Seo se ilego sa mmakatša ke gore kapejana baromiwa ba Dihlatse ba ile ba tšwelela gape. Ke ile ka thoma go nagana gore mohlomongwe Modimo o be a ena le batho ba. Mo e ka bago ka nako yeo, ke ile ka yo šoma lefelong le lengwe. Yo mongwe wa bašomigotee le nna e be e Hlatse gomme go se go ye kae ke ge a thoma go mpotša ditumelo tša gagwe. O ile a mpontšha ditemana tša Beibele tšeo di hlalosago Jehofa e le Modimo yo a nago le lerato le toka. (Doiteronomio 32:4; 1 Johane 4:8) Dika tšeo di ile tša nkgahla. Ke be ke nyaka go ithuta ka mo go oketšegilego ka Jehofa, ka gona ke ile ka amogela thuto ya Beibele.

Kapejana ke ile ka thoma go ya dibokeng tša Dihlatse tša Jehofa. Ke ile ka kgahlwa ke lerato la kgonthe leo ke le bonego—go be go sa kgethollwe batho go ya ka merafo goba go ya ka maemo a bona setšhabeng. Ge ke dutše ke kopanela le Dihlatse, go be go eba molaleng kudu gore e be e le balatedi ba Jesu ba therešo.—Johane 13:35.

Ke ile ka phetha ka gore ge e ba ke nyaka go hlankela Jehofa, ke be ke tla swanelwa ke go tlogela Kereke ya Katholika. Go be go se bonolo go tšea kgato yeo, ka ge ke be ke tšhoga gore ba bangwe ba tla nagana’ng. Ka morago ga nako e telele le ka thušo ya Jehofa, ke ile ka rapa sebete gomme ka tlogela kereke.

 Go be go sa dutše go ena le phetogo e nngwe e kgolo yeo ke bego ke swanetše go e dira. Thuto ya ka ya Beibele e mpontšhitše gore Modimo ga a amogele taba ya go nyala basadi ba bantši. (Genesi 2:18-24; Mateo 19:4-6) Lenyalo la ka la mathomo ke lona feela leo a bego a le amogela. Ka gona ke ile ka ngwadiša lenyalo le ka molao gomme ka kgaogana le basadi ba bangwe le go rulaganya gore go kgotsofatšwe dinyakwa tša bona tša nama. Ge nako e dutše e eya, basadi ba ka ba babedi ba nakong e fetilego ba ile ba fetoga Dihlatse tša Jehofa.

KAMOO KE ILEGO KA HOLEGA KA GONA:

Gaešita le ge mosadi wa ka e sa dutše e le Mokatholika, o hlompha phetho ya ka ya go hlankela Jehofa. Bobedi bja rena re dumela gore ke fetogile monna yo mokaone.

Ke be ke dutše ke nagana gore nka kaonefatša maemo a setšhaba sa gešo ka dipolitiki, eupša maiteko ao e bile a lefeela. Ga bjale ke lemoga gore Mmušo wa Modimo ke tharollo e nnoši ya mathata a batho. (Mateo 6:9, 10) Ke leboga Jehofa ka go mpontšha kamoo nka phelago bophelo bjo bo thabišago e le ka kgonthe.

“Go be go se Bonolo go Dira Diphetogo tše di Nyakegago.”—ALEX LEMOS SILVA

  • NGWAGA WA MATSWALO: 1977

  • NAGA: BRAZIL

  • BOPHELO BJA PELE E EBA MOKRISTE: MORUTI WA PENTEKOSTE

BOPHELO BJA KA BJA NAKONG E FETILEGO:

Ke goletše motseng woo o lego ka ntlenyana ga toropo ya Itu, kua Motseng wa São Paulo. Karolo ye ya toropo e be e tumile ka bosenyi bjo bogolo.

Ke be ke le šoro ka mo go feteletšego e bile ke se na boitshwaro. Go oketša moo, ke be ke gweba ka dihlaretagi. Ge nako e dutše e eya, ke ile ka lemoga gore bophelo bjoo bo be tla nkiša kgolegong goba lebitleng; ka gona ke ile ka bo tlogela. Ke moka ke ile ka tsena Kereke ya Pentekoste gomme mafelelong ka ba moruti.

Ke be ke nagana gore nka thuša batho kudu ka bodiredi bja ka bja kereke. Ke ile ka ba ka gaša lenaneo la bodumedi radiong ya setšhaba gomme ka go re’alo ka tsebja kudu motseng. Lega go le bjalo, ganyenyane-ganyenyane ke ile ka lemoga gore kereke ka moka e be e sa tshwenyege ka boiketlo bja ditho tša yona—e bile e be e sa tshwenyege le ganyenyane ka go godiša Modimo. Ke ile ka lemoga gore morero o nnoši wa kereke e be e le go kgoboketša tšhelete. Ke ile ka phetha ka go tlogela kereke.

KAMOO BEIBELE E FETOTŠEGO BOPHELO BJA KA:

Ge ke be ke thoma go ithuta Beibele le Dihlatse tša Jehofa, ke ile ka bona di sa tloga fase gore di be di fapane le madumedi a mangwe. Ke ile ka kgahlwa kudu ke dilo tše pedi. Sa pele, Dihlatse tša Jehofa ga di fo bolela ka go rata Modimo le moagišani; di a go bontšha. Sa bobedi, ga di tsenele dipolitiki goba dintwa. (Jesaya 2:4) Dintlha tšeo tše pedi di nkgodišitše gore ke be ke hweditše bodumedi bja therešo—tsela e pitlaganego yeo e išago bophelong bjo bo sa felego.—Mateo 7:13, 14.

Ke ile ka lemoga gore ge e ba ke nyaka go kgahla Modimo, ke be ke swanetše go dira diphetogo tše itšego tše dikgolo. Go be go nyakega gore ke lebiše tlhokomelo lapeng la ka. Gape go be go nyakega gore ke ikokobetše kutšwanyana. Go be go se bonolo go dira diphetogo tše di nyakegago, eupša   ka thušo ya Jehofa ke ile ka atlega. Mosadi wa ka o ile a kgahlwa ke diphetogo tše. O be a thomile go ithuta Beibele pele ga ka, eupša ga bjale o be a tšwela pele kudu dithutong tša gagwe. Go se go ye kae bobedi bja rena ke ge re tseba gore re nyaka go ba Dihlatse tša Jehofa. Re ile ra kolobetšwa ka letšatši le tee.

KAMOO KE ILEGO KA HOLEGA KA GONA:

Nna le mosadi wa ka re thabela go thuša bana ba rena ba bararo gore ba be le segwera sa kgauswi le Jehofa. Re lapa leo le thabilego. Ke leboga Jehofa ge a ile a nkgogela therešong yeo e hwetšwago ka Lentšung la gagwe, e lego Beibele. Ruri e fetoša maphelo a batho! Bophelo bja ka bo hlatsela seo.

“Ke Ikwa ke Hlwekile, ke Phela e Bile ke Kgotsofetše.”—VICTORIA TONG

  • NGWAGA WA MATSWALO: 1957

  • NAGA: AUSTRALIA

  • BOPHELO BJA PELE E EBA MOKRISTE: GO GODIŠWA GABOHLOKO

BOPHELO BJA KA BJA NAKONG E FETILEGO:

Ke goletše Newcastle, kua New South Wales. Ke nna yo mogolo go bana ba šupago bao ba godišitšwego ke tate yo šoro le yo a lemaletšego bjala gotee le mma yo šoro. Mma o be a ntlaiša mmeleng le ka mantšu. O be a mpotša gantši gore ke yo mobe le gore ke tlo tlaišwa mollong wa dihele. Ditšhošetšo tšeo di be di ntšhoša.

Dikgobalo tša mmeleng tšeo ke bego ke di bakelwa ke mma gantši di be di dira gore ke se ye sekolong. Ge ke ena le nywaga e 11, ke ile ka tšewa go batswadi ba ka gomme ka išwa lefelong la tlhokomelo la mmušo ke moka ka morago ka išwa lefelong la baitlami ba basadi. Ge ke eba le nywaga e 14, ke ile ka tšhaba lefelong leo la baitlami ba basadi. Ke be ke sa nyake go boela gae, ka gona ke ile ka dula ditarateng tša Kings Cross, e lego motsana o lego ka ntle ga toropo ya Sydney.

Ge ke be ke dula ditarateng, ke be ke diriša dihlaretagi, dinotagi, diswantšho tšeo di kgothaletšago bootswa le go gweba ka mmele. Go na le selo seo se ilego sa ntiragalela seo se ilego sa ntšhoša e le ka kgonthe. Ke be ke dula foleteng ya mong wa nightclub. Mantšiboeng a mangwe, banna ba babedi ba ile ba mo etela. O ile a nthomela ka phaphošing ya go robala, eupša ke be ke kgona go kwa poledišano ya bona. Mong wa nightclub o be a rulaganya go nthekišetša banna bao. Ba be ba tla nkuta ka sekepeng sa go rwala dithoto gomme ba nkiše Japane gore ke yo šoma pareng. Ke ile ka tšhoga, ka taboga mathuding gomme ka tšhaba gore ke yo nyaka thušo.

Ke ile ka gahlana le monna yo a bego a etetše Sydney gomme ka mo hlalosetša boemo bja ka, ke holofetše gore o tla mpha tšhelete. Go e na le moo, o ile a ntaletša lefelong leo a bego a dula go lona e le gore ke hlape le go ja se sengwe. Ge di phuthologa, ga se ka ka ka sepela. Ka morago ga ngwaga, re ile ra nyalana.

KAMOO BEIBELE E FETOTŠEGO BOPHELO BJA KA:

Ge ke thoma go ithuta Beibele le Dihlatse tša Jehofa, ke ile ka lebeletšana le maikwelo a mantši. Ke ile ka befelwa ge ke ithuta gore Sathane ke yena yo a bakago bobe; ke be ke rutilwe gantši gore Modimo ke yena yo a re tlaišago. Ke ile ka imologa kudu ge ke ekwa gore ga a tlaiše batho mollong wa dihele, e lego thuto yeo e bego e ntlaišitše nako e telele.

 Ke kgahlilwe ke tsela yeo Dihlatse di dumelelago Beibele gore e kgome diphetho ka moka tša tšona. Di phelela tumelo ya tšona. Ke be ke le motho yo go lego thata go dirišana le yena, eupša go sa šetšwe seo ke bego ke se bolela goba go se dira, Dihlatse di be di ntshwara ka lerato le ka tlhompho.

Tlhohlo ya ka e kgolo e be e le go lwantšhana le maikwelo a go ikwa ke se na mohola. Ke be ke itlhoile e le ka kgonthe, gomme maikwelo a a ile a tšwela pele a sa kgaotše le ka morago ga gore ke kolobetšwe bjalo ka yo mongwe wa Dihlatse tša Jehofa. Ke be ke tseba gore ke rata Jehofa, eupša ke be ke kgodišegile gore a ka se tsoge a ratile motho wa go swana le nna.

Phetogo e kgolo e diregile mo e ka bago ka morago ga nywaga e 15 ke kolobeditšwe. Ge go be go newa polelo Holong ya Mmušo ya Dihlatse tša Jehofa, seboledi se ile sa bolela ka Jakobo 1:23, 24. Ditemana tšeo di swantšha Lentšu la Modimo le seipone seo re ka kgonago go ipona go sona go swana le kamoo Jehofa a re bonago ka gona. Ke ile ka thoma go ipotšiša ge e ba seo ke bego ke se bona go nna se be se fapane le seo Jehofa a bego a se bona. Mathomong, ke be ke ganana le kgopolo ye e mpsha. Ke be ke sa dutše ke nagana gore Jehofa a ka se tsoge a nthatile.

Matšatši a sego kae ka morago, ke ile ka bala lengwalo leo le ilego la fetoša bophelo bja ka. Temana yeo e be e le ya Jesaya 1:18, yeo go yona Jehofa a tsopotšwego a re: “Etlang re lokišeng ditaba. . . . Le ge dibe tša lena di ka hwibila go etša madi, di tla šweufala go etša kapoko.” Ke be ke ekwa eka Jehofa o re go nna: “Tlaa go nna Vicky, gomme re lokiše ditaba. Ke a go tseba, ke tseba dibe tša gago, ke tseba le pelo ya gago—e bile ke a go rata.”

Ke paletšwe ke go robala bošegong bjoo. Ke be ke sa dutše ke belaela gore Jehofa a ka nthata, eupša ke ile ka thoma go nagana ka sehlabelo sa Jesu sa topollo. Gateetee, ke ile ka lemoga gore nako ye ka moka Jehofa o be a sa mphelele pelo, a mpontšha ka ditsela tše dintši gore o a nthata. Lega go le bjalo, go be go swana le ge ke re go yena: “Lerato la gago ga se le legolo ka mo go lekanego go ka mphihlelela. Sehlabelo sa Morwa wa gago ga se ntekane.” Go be go swana le ge ke be ke bušetša sehlabelo sa topollo go Jehofa ka go mo fošetša sona. Eupša ga bjale, mafelelong ge ke naganišiša ka mpho ya topollo, ke ile ka thoma go ikwa ke ratwa ke Jehofa.

KAMOO KE ILEGO KA HOLEGA KA GONA:

Ke ikwa ke hlwekile, ke phela e bile ke kgotsofetše. Lenyalo la ka le kaonafetše gomme ke thabela gore nka diriša phihlelo ya ka go thuša ba bangwe. Ke thoma go ikwa ke batamela kgauswi kudu le Jehofa.

“Se e be e le Karabo ya Thapelo ya ka.”—SERGEY BOTANKIN

  • NGWAGA WA MATSWALO: 1974

  • NAGA: RUSSIA

  • BOPHELO BJA PELE E EBA MOKRISTE: MOTHO YO A FIŠEGELAGO MMINO WA MORETHETHO O MATLA

BOPHELO BJA KA BJA NAKONG E FETILEGO:

Ke belegetšwe Votkinsk, e lego moo mohlami yo a tumilego wa mmino Pyotr Ilich Tchaikovsky a belegetšwego gona. Lapa lešo le be le diila. Tate o be a ena le dika tše dintši tše dibotse, eupša o be a lemaletše bjala, ka gona go be go dula go se bose ka gae.

Ke be ke se morutwana yo a kgonago kudu, gomme ge nywaga e dutše e eya, ke ile ka thoma go ikwa ke inyatša. Ke ile ka thoma go ipea lekatana gomme ka se sa bota batho ba bangwe. Ke be ke thatafalelwa ke go ya sekolong. Ka  mohlala, ge ke be ke swanetše go nea pego, gantši ke be ke palelwa ke go hlalosa gaešita le dikgopolo tša motheo tšeo ka dinako tše dingwe ke bego ke kgona go di hlalosa. Ge ke be ke aloga mphatong wa seswai, dipoelong tša ka go be go ngwadilwe gore: “O na le tlotlontšu e lekanyeditšwego e bile o palelwa ke go itlhalosa.” Mantšu ao a ile a nnyamiša o šoro gomme a ntlogela ke ikwa ke se na mohola le go feta. Ke ile ka thoma go ipotšiša gore ke phelela’ng.

Nywageng ya ka ya mahlalagadi, ke ile ka thoma go nwa dinotagi. Mathomong ke be ke thabela go nwa. Letswalo la ka le be le ntshwenya ge ke be ke nwele kudu. Bophelo bja ka bo be bo bonala bo se na morero. Ke ile ka thoma go ikwa ke gateletšegile kudu, gomme ka dinako tše dingwe ke sa tšwe ka ngwakong. Ke ile ka thoma go nagana ka go ipolaya.

Ge ke be ke ena le nywaga e 20, ke ile ka hwetša selo seo se ilego sa nkimolla ka nakwana. Ke ile ka hwetša mmino wa morethetho o matla. Mmino wo o be o ntira gore ke be le matšato gomme ka thoma go nyaka ba bangwe bao ba bego ba o theetša. Ke ile ka godiša moriri wa ka ya ba o motelele, ka phula ditsebe le go apara go swana le diopedi tšeo ke bego ke di rata. Ganyenyane-ganyenyane, ke ile ka thoma go se sa ba le taba le go ba bogale e bile ke dula ke ngangišana le ba lapa lešo.

Ke be ke nagana gore go theetša mmino wa morethetho o matla go be go tla ntira gore ke thabe, eupša go ile gwa direga se se fapanego. Ke be ke fetoga motho yo fapanego! Ke ile ka ikwa ke radiilwe ka morago ga go tseba ka dilo tše mpe tšeo di bego di dirwa ke dinaletšana tša mmino tšeo ke bego ke di rata.

Ke ile ka thoma go nagana gape ka go ipolaya—nakong ye ke naganišiša e le ruri. Selo se tee seo se bego se nthibela go ipolaya e be e le go nagana kamoo mma a bego a tla kgomega ka gona. O be a nthata kudu e bile a ntiretše dilo tše dintši. Boemo bjo bo be bo nkweša bohloko kudu. Ke be ke se sa nyaka go phela, eupša ke be ke sa kgone go ipolaya.

E le gore ke tloše monagano wa ka moo, ke ile ka thoma go bala dipuku tša Russia tša bogologolo. Kanegelo e nngwe e be e le ya mogale yoo a bego a hlankela ka kerekeng. Gateetee ke ile ka ikwa ke ena le kganyogo e matla ya go direla Modimo le batho selo se itšego. Ke ile ka tšhollela Modimo sa mafahleng a ka ka thapelo, e lego selo seo ke bego ke sa ka ka se dira pele. Ke ile ka botšiša Modimo gore nka phela bophelo bjo bo nago le morero bjang. Ge ke be ke rapela, ke ile ka ikwa ke imologa ka tsela e makatšago. Lega go le bjalo, seo se mmakaditšego le go feta ke seo se ilego sa direga ka morago. Ka morago ga diiri tše pedi feela, yo mongwe wa Dihlatse tša Jehofa o ile a kokota mojakong gomme a kgopela go ithuta Beibele le nna. Ke dumela gore se e be e le karabo ya thapelo ya ka. Leo e bile letšatši la mathomo la bophelo bja ka bjo bofsa le bjo bo thabišago.

KAMOO BEIBELE E FETOTŠEGO BOPHELO BJA KA:

Ke ile ka lahla selo le ge e le sefe seo ke bego ke ena le sona seo se bego se tswalana le mmino wa morethetho o matla gaešita le ge go dira bjalo go be go le thata kudu. Lega go le bjalo, mmino woo o ile wa dula ka monaganong wa ka nako e telele. Ke be ke gopola bophelo bja ka bja nakong e fetilego le semeetseng nako le nako ge ke be ke feta lefelong leo go bego go bapalwa mmino woo. Ke be ke sa nyake go tswakanya dikgopolo tšeo tše sa thabišego le dilo ka moka tše dibotse tšeo ga bjale di bego di thoma go tsema medu monaganong le pelong ya ka. Ka gona ke ile ka phema mafelo a bjalo ka boomo. Ke be ke rapela go tšwa pelong nako le nako ge ke lekega gore ke nagane ka bophelo bja ka bja nakong e fetilego. Go dira bjalo go nthušitše gore ke be le “khutšo ya Modimo yeo e fetago kwešišo yohle ya batho.”—Bafilipi 4:7.

Ge ke dutše ke ithuta Beibele, ke ile ka lemoga gore Bakriste ba na le boikarabelo bja go botša ba bangwe ka tumelo ya bona. (Mateo 28:19, 20) Ke be ke tloga ke dumela gore nka se tsoge ke kgonne go dira seo. Ka nako e swanago, dilo tše difsa tšeo ke bego ke ithuta tšona di be di ntlišetša lethabo le legolo le khutšo ya ka gare. Ke be ke tseba gore le ba bangwe ba be ba swanetše go ithuta ditherešo tše. Go sa šetšwe poifo ya ka, ke ile ka thoma go bolela le ba bangwe ka seo ke bego ke ithuta sona. Ke ile ka makala kudu ge ke lemoga gore go botša ba bangwe ka Beibele go be go matlafatša boikholofelo bja ka. Go ile gwa ba gwa tiiša ditumelo tše tše difsa ka pelong ya ka.

KAMOO KE ILEGO KA HOLEGA KA GONA:

Ga bjale ke nyetše e bile ke thabile gomme ke ile ka thabela go thuša batho ba mmalwa go ithuta Beibele, go akaretša le kgaetšedi ya ka le mma. Go hlankela Modimo le go thuša ba bangwe go ithuta ka yena go neile bophelo bja ka morero wa kgonthe.