Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI 2011-04-01

Jesu—Lebaka Leo ka Lona a Ilego a hwa

Jesu—Lebaka Leo ka Lona a Ilego a hwa

“Morwa wa motho o tletše . . . go nea moya wa gagwe [goba bophelo] e le topollo bakeng sa ba bantši.”—MAREKA 10:45.

JESU o be a tseba seo a se letetšego. O be a kwešiša gore o be a ka se phele bophelo bja gagwe ka khutšo. Go fapana le moo, o be a lemoga gore bophelo bja gagwe bo be bo tla kgaotšwa ka sehlogo ge a le nywageng ya gagwe ya bo-30 gomme o be a ikemišeditše ka botlalo go lebeletšana le lehu la gagwe.

Beibele e bolela ka lehu la Jesu e le le bohlokwa. Tšhupetšo e nngwe e re go boletšwe ka lehu la Jesu ka go lebanya ka makga a ka bago a 175 ka Mangwalong a Bakriste a Segerika goba ka Testamenteng e Mpsha. Lega go le bjalo, ke baka la’ng Jesu a ile a swanelwa ke go tlaišega le go hwa? Re swanetše go tseba, ka ge lehu la Jesu e le le bohlokwa maphelong a rena.

Seo Jesu a bego a se letetše

Ngwageng wa mafelelo wa bophelo bja gagwe, Jesu o ile a lemoša barutiwa ba gagwe ka makga a mmalwa mabapi le tlaišego le lehu tšeo di bego di mo letetše. A le tseleng ya go ya Jerusalema go yo keteka Paseka ya gagwe ya mafelelo, o ile a botša baapostola ba gagwe ba 12 gore: “Morwa wa motho o tla gafelwa baperisita ba bagolo le bamangwalo. Ba tla mo ahlolela lehu ba mo gafela batho ba ditšhaba, gomme bona bao ba tla dira metlae ka yena, ba mo tshwela ka mare ba mo otla le go mmolaya.” * (Mareka 10:33, 34) Ke ka baka la’ng a be a kgodišegile ka seo se bego se tla mo diragalela?

Jesu o be a tlwaelane le diporofeto tše dintši ka Mangwalong a Seheberu tšeo di bego di boletše e sa le pele mabapi le kamoo bophelo bja gagwe bo bego bo tla fela ka gona. (Luka 18:31-33) Ela hloko tše dingwe tša diporofeto tšeo gotee le ditšhupetšo tša Mangwalo tšeo di hlalosago kamoo di ilego tša phethagala ka gona.

Mesia o be a tla . . .

Jesu o ile a phethagatša diporofeto tše gotee le tše dingwe tše dintši. Ga go ka tsela yeo a bego a ka dira se ka noši. Go phethagala ga diporofeto tše ka moka go Jesu go hlatsela gore ruri o be a romilwe ke Modimo. *

Lega go le bjalo, ke ka baka la’ng go be go nyakega gore Jesu a tlaišege le go hwa?

Jesu o ile a hwa bakeng sa go lokiša dikgang tše bohlokwa

Jesu o be a tseba ka dikgang tše di lego bohlokwa legohleng tšeo di ilego tša rotošwa morago kua serapeng sa Edene. Ba tutueditšwe ke sebopiwa sa moya sa lerabele, Adama le Efa ba ile ba kgetha go se kwe Modimo. Go rabela ga banyalani ba go ile gwa hlohla tshwanelo ya Modimo ya go buša goba tsela yeo a bušago ka yona. Sebe sa bona gape se ile sa rotoša potšišo ya ge e ba go ena le motho le ge e le ofe yoo a ka tšwelago pele a botegela Modimo ge a lekwa.—Genesi 3:1-6; Jobo 2:1-5.

 Jesu o neile karabo ya maleba go dikgang tše tše pedi—bogoši bja Jehofa le potego ya motho. Ka go kwa ga gagwe ka tsela e phethagetšego “go fihla lehung . . . koteng ya tlhokofatšo,” Jesu o ile a godiša bogoši bja Modimo. (Bafilipi 2:8) Jesu o ile a ba a hlatsela gore motho yo a phethagetšego a ka botegela Jehofa ka botlalo go sa šetšwe diteko tše šoro.

Jesu o ile a hwa e le gore a lopolle batho

Moporofeta Jesaya o boletše e sa le pele gore go tlaišwa le go hwa ga Mesia yo a holofeditšwego go be go tla tliša poelano bakeng sa dibe tša batho. (Jesaya 53:5, 10) Jesu o be a kwešiša se gabotse gomme ka go rata o ile a neela “moya wa gagwe gore e be topollo bakeng sa ba bantši.” (Mateo 20:28) Lehu la gagwe la sehlabelo le butše tsela bakeng sa batho ba sa phethagalago gore ba be le tswalano e botse le Jehofa le gore ba phološwe sebeng le lehung. Lehu la Jesu le re nea sebaka sa go hwetša seo se lahlegetšego Adama le Efa—tebelelo ya go phela ka mo go sa felego maemong a phethagetšego mo lefaseng. *Kutollo 21:3, 4.

Seo o ka se dirago

Lelokelelong le la dihlogo re hlahlobile seo Beibele e se bolelago ka Jesu—moo a tšwago gona, kamoo a phetšego ka gona le lebaka leo ka lona a ilego a hwa. Go tseba ditherešo tšeo mabapi le Jesu go tla dira se se fetago go phumola dikgopolo tše di fošagetšego ka yena. Go dira ka go dumelelana le tšona go ka tliša ditšhegofatšo—bophelo bjo bokaone gona bjale le bophelo bjo bo sa felego nakong e tlago. Beibele e re botša seo re swanetšego go se dira ge e ba re nyaka go buna ditšhegofatšo tšeo.

  • Ithute ka mo go oketšegilego ka Jesu Kriste le tema yeo a e kgathago mererong ya Jehofa.—JOHANE 17:3.

  • Eba le tumelo go Jesu gomme o bontšhe ka tsela yeo o phelago ka yona gore o mo amogela e le Mophološi wa gago.—JOHANE 3:36; DITIRO 5:31.

Dihlatse tša Jehofa di tla thabela go go thuša gore o ithute ka mo go oketšegilego ka Jesu Kriste, “Morwa yo a tswetšwego a nnoši” wa Modimo, yoo ka yena re ka hwetšago mpho ya “bophelo bjo bo sa felego.”—Johane 3:16.

^ ser. 5 Jesu gantši o be a ipitša gore ke “Morwa wa motho.” (Mateo 8:20) Polelwana ye ga e bontšhe feela gore e be e le motho yo a feletšego eupša e bontšha le gore e be e le “morwa wa motho” yo go boletšwego ka yena ka boporofeteng bja Beibele.—Daniele 7:13, 14.

^ ser. 13 Bakeng sa tsebišo e oketšegilego mabapi le diporofeto tšeo di ilego tša phethagala go Jesu, bona sehlogo se se lego go mametletšo se se rego “Jesu Kriste—Mesia yo a Holofeditšwego” ka pukung ya Ke Eng Seo ge e le Gabotse Beibele e se Rutago? yeo e gatišitšwego ke Dihlatse tša Jehofa.

^ ser. 17 Bakeng sa tsebišo e oketšegilego mabapi le mohola wa sehlabelo sa lehu la Jesu, bona kgaolo 5 e rego, “Topollo—Mpho e Kgolo Kudu ya Modimo,” ka pukung ya Ke Eng Seo ge e le Gabotse Beibele e se Rutago?

Ithute ka mo go oketšegilego

Jesu Kriste ke Mang?

Ithute lebaka leo Jesu e bego e le Mesia yo a holofeditšwego, moo a tšwago gona le lebaka leo e lego Morwa a nnoši wa Modimo.