Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

MOROKAMI 2011-04-01

Jesu Kriste ge e le Gabotse ke Mang?

Jesu Kriste ge e le Gabotse ke Mang?

“Bjale ge a tsena Jerusalema motse ka moka wa huduega, wa re: ‘Ke mang yo?’ Mašaba a dulela gore: ‘Ke Jesu wa moporofeta, wa go tšwa Natsaretha ya Galilea!’”—MATEO 21:10, 11.

KE KA baka la’ng go goroga ga Jesu Kriste * ka lehlabula la 33 C.E. go ile gwa baka khuduego? Ba bantši mo motseng ba be ba kwele ka Jesu le ka dilo tšeo di sa tlwaelegago tšeo a bego a di dirile. Ba be ba tšwela pele ba botša ba bangwe ka yena. (Johane 12:17-19) Lega go le bjalo, mašaba a be a sa tsebe gore gare ga bona go be go na le monna yoo tutuetšo ya gagwe e bego e tla phatlalala lefaseng le go ba gona go theoša le nywagakgolo go ba go fihla mehleng ya rena!

Ela hloko mehlala e mmalwa ya tutuetšo e kgolo yeo Jesu a bilego le yona historing ya motho.

  • Almanaka yeo ka tlwaelo e dirišwago dikarolong tše dintši tša lefase e theilwe ngwageng woo go naganwago gore Jesu o belegwe ka wona.

  • Batho bao e ka bago ba dimilione tše dikete tše pedi—mo e ka bago teetharong ya badudi ba lefase—ba ipitša gore ke Bakriste.

  • Bomoseleme bjo bo nago le ditho tše fetago tše dimilione tše sekete lefaseng ka bophara, bo ruta gore Jesu ke “moporofeta yo mogolo go feta Aborahama, Noa le Moshe.”

  • Dipolelo tše dintši tše bohlale tša Jesu di dirišwa letšatši le letšatši ka ditsela tše di sa swanego. Gare ga tšona go na le tše di latelago:

    ‘Mo retološetše lerama le lengwe.’MATEO 5:39.

    ‘Eya le yena khilomithara e nngwe.’MATEO 5:41.

    ‘Ga go motho yo a ka bago lekgoba la marena a mabedi.’MATEO 6:24.

    “Le se ke la nea dimpša se sekgethwa.”MATEO 7:6.

    “Dilo tšohle tše le nyakago batho ba le dira tšona, le lena le ba dire tšona.”MATEO 7:12.

    “Bala ditshenyegelo.”LUKA 14:28.

Ga re belaele gore Jesu o be a ena le tutuetšo e kgolo. Lega go le bjalo, batho ba na le dipono le ditumelo tše fapafapanego ka yena. Ka baka leo, mohlomongwe o ka ipotšiša gore, ‘Ge e le gabotse Jesu Kriste ke mang?’ Ke Beibele feela yeo e re botšago moo Jesu a tšwago gona, kamoo a phetšego ka gona le lebaka leo ka lona a ilego a hwa. Go tseba ditherešo tšeo ka yena go ka ba le tutuetšo e bohlokwa bophelong bja gago—gona bjale le nakong e tlago.

^ ser. 3 Leina la moporofeta yo yo a tšwago Natsaretha e lego “Jesu” le bolela gore “Jehofa ke Phološo.” Lentšu “Kriste” ke sereto seo se bolelago “Motlotšwa,” seo se hlatselago gore Jesu o be a tloditšwe goba o be a kgethilwe ke Modimo bakeng sa boemo bjo bo kgethegilego.