Eya go dikagare

Eya go menyu wa bobedi

Dihlatse tša Jehofa

Sepedi

Morokami  |  March 2011

 Ithute Lentšung la Modimo

Jesu Kriste ke Mang?

Jesu Kriste ke Mang?

Sehlogo se se tsoša dipotšišo tšeo o ka bago o ile wa ipotšiša tšona le go go bontšha moo o ka balago dikarabo gona ka Beibeleng ya gago. Dihlatse tša Jehofa di tla thabela go ahlaahla dikarabo tše le wena.

1. Jesu Kriste ke mang?

Go fapana le motho le ge e le ofe, Jesu o phetše legodimong e le motho wa moya pele a ka belegwa lefaseng. (Johane 8:23) E be e le tlholo ya pele ya Modimo e bile o ile a thuša ge go hlolwa dilo tše dingwe ka moka. Ke yena feela yo Jehofa a mo hlodilego ka go lebanya gomme ke ka baka leo a bitšwago Morwa ‘yo a tswetšwego a nnoši’ wa Modimo. Jesu o ile a šoma e le Mmoleledi wa Modimo, ka gona o bitšwa gape gore ke “Lentšu.”—Johane 1:1-3, 14; bala Diema 8:22, 23, 30; Bakolose 1:15, 16.

2. Ke ka baka la’ng Jesu a ile a tla lefaseng?

Modimo o rometše Morwa wa gagwe lefaseng go tšwa legodimong ka go fetišetša bophelo bja gagwe ka popelong ya kgarebe ya Mojuda yeo e bitšwago Maria. Ka gona Jesu ga se a ka a ba le tate wa motho. (Luka 1:30-35) Jesu o tlile lefaseng (1) go tlo ruta therešo ka Modimo, (2) go bea mohlala go direng thato ya Modimo le (3) go nea bophelo bja gagwe bjo bo phethagetšego e le “topollo.”—Bala Mateo 20:28; Johane 18:37.

3. Ke ka baka la’ng re nyaka topollo?

Topollo ke tefo yeo e lefšago bakeng sa go lokolla motho bohlankeng. Lehu le botšofadi e be e se karolo ya morero wa Modimo wa mathomong bakeng sa batho. Re tseba seo bjang? Modimo o ile a botša motho wa pele, Adama, gore ge a ka dira seo Beibele e se bitšago sebe, o be a tla hwa. Ge nkabe Adama a se a ka a dira sebe, nkabe a se a ka a hwa. Gaešita le ge Adama a ile a hwa ka morago ga nywaga e makgolo, o ile a thoma go hwa go tloga letšatšing leo a tshetšego molao wa Modimo ka lona. (Genesi 2:16, 17; 5:5) Adama o ile a fetišetša ditlogolo tša gagwe ka moka sebe le kotlo ya sona, e lego lehu. Ka baka leo, lehu le “tsene” bathong ka moka ka Adama. Ke ka baka leo re nyakago topollo.—Bala Baroma 5:12; 6:23.

 4. Ke ka baka la’ng Jesu a ile a hwa?

Ke mang yo a bego a ka lefa topollo ya go re lokolla lehung? Ge re ehwa, re lefa molato wa dibe tša rena feela. Ga go na motho yo a sego a phethagala yo a ka lefelelago dibe tša batho ba bangwe.—Bala Psalme 49:7-9.

Ka ge Jesu a se a ka a abela go se phethagale go tšwa go tate wa motho, ga se a hwela dibe tša gagwe, eupša o hwetše dibe tša ba bangwe. Modimo o ile a romela Morwa wa gagwe gore a re hwele e le pontšho ya gore O rata batho kudu. Jesu le yena o ile a bontšha gore o a re rata ka go ikokobeletša Tatagwe le go gafa bophelo bja gagwe bakeng sa dibe tša rena.—Bala Johane 3:16; Baroma 5:18, 19.

5. Ke’ng seo Jesu a se dirago gona bjale?

Ka go fodiša balwetši, go tsoša bahu le go ntšha batho tlaišegong, Jesu o bontšhitše seo mafelelong a tlago go se direla batho ka moka ba kwago. (Luka 18:35-42; Johane 5:28, 29) Ka morago ga gore Jesu a hwe, Modimo o ile a mo tsoša e le sebopiwa sa moya. (1 Petro 3:18) Ke moka Jesu o ile a leta a le ka letsogong le letona la Modimo go fihlela ge Jehofa a mo nea matla a go buša e le Kgoši godimo ga lefase ka moka. (Baheberu 10:12, 13) Ga bjale Jesu o buša e le Kgoši legodimong, gomme balatedi ba gagwe mo lefaseng ba tsebatša ditaba tše dibotse lefaseng ka bophara.—Bala Daniele 7:13, 14; Mateo 24:14.

Go se go ye kae, Jesu o tla diriša matla a gagwe e le Kgoši go fediša tlaišego le bao ba e bakago. Batho ba dimilione bao ba bontšhago tumelo go Jesu le go mo kwa ba tla phela paradeiseng mo lefaseng.—Bala Psalme 37:9-11.

Batho ba dimilione bao ba bontšhago tumelo go Jesu le go mo kwa ba tla phela paradeiseng mo lefaseng

Ithute ka mo go Oketšegilego

Ke Eng Seo ge e le Gabotse Beibele e se Rutago?

Jesu Kriste ke Mang?

Ithute lebaka leo Jesu e bego e le Mesia yo a holofeditšwego, moo a tšwago gona le lebaka leo e lego Morwa a nnoši wa Modimo.