Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

MOROKAMI 2010-12-01

 Ruta Bana ba Gago

Sephiri Seo o ka se Botšago ba Bangwe

Sephiri Seo o ka se Botšago ba Bangwe

NA O kile wa botšwa sephiri?— * Go na le sephiri seo ke ratago go go botša sona. Ka Beibeleng se bitšwa “sephiri se sekgethwa seo se ilego sa homolelwa ka mehla e sa felego.” (Baroma 16:25) Pele e be e le Modimo feela yo a bego a tseba “sephiri se sekgethwa.” A re bone seo se dirilego gore Modimo a bone go swanetše go se botša batho ba bangwe.

Sa pele, na o rata go tseba gore lentšu ‘kgethwa’ le ra go re’ng?— Lentšu le le bolela go hlweka, goba go kgethega kudu. Ka gona, sephiri se se bitšwa sephiri se sekgethwa ka gobane se tšwa go Modimo, yo mokgethwa. O nagana gore ke mang yo a bego a nyaka go tseba sephiri se se se kgethegilego?— Barongwa ba ile ba dira bjalo. Beibele e re: “Barongwa ba kganyoga go nyankurela dilo tšona tše.” Ee, ba be ba nyaka go kwešiša sephiri se sekgethwa.—1 Petro 1:12.

Ge Jesu a be a le lefaseng, o ile a bolela ka sephiri se sekgethwa gomme a thoma go se hlalosa. O ile a botša barutiwa ba gagwe gore: “Lena le neilwe sephiri se sekgethwa sa mmušo wa Modimo.” (Mareka 4:11) Na o lemogile gore sephiri se sekgethwa se mabapi le’ng?— Se mabapi le Mmušo wa Modimo, woo Jesu a re rutilego go o rapelela!—Mateo 6:9, 10.

Ga bjale a re bone gore Mmušo wa Modimo e bile bjang sephiri “ka mehla e sa felego” go ba go fihla ge Jesu a e-tla lefaseng gomme a thoma go se hlalosa. Ka morago ga ge Adama le Efa ba robile molao wa Modimo gomme ba rakilwe tšhemong ya Edene, bahlanka ba Modimo ba ile ba tseba gore Modimo o sa tlo dira gore lefase ka moka e be paradeise. (Genesi 1:26-28; 2:8, 9; Jesaya 45:18) Ba ile ba ngwala mabapi le lethabo leo batho ba tlago go le hwetša mo lefaseng ge Mmušo wa Modimo o buša.—Psalme 37:11, 29; Jesaya 11:6-9; 25:8; 33:24; 65:21-24.

Ga bjale nagana ka Mmuši wa Mmušo wa Modimo. Na o tseba gore Modimo o kgethile mang gore e be Mmuši?— Morwa wa Gagwe, “Kgošana ya Khutšo.” Beibele e re: “Pušo e tla ba legetleng la gagwe.” (Jesaya 9:6, 7, NW) Nna le wena re swanetše go hwetša “tsebo e nepagetšego ya sephiri se sekgethwa sa Modimo, e lego Kriste.” (Bakolose 2:2) Re swanetše go tseba gore Modimo o ile a tšea bophelo bja morongwa wa pele (morwa wa Moya) yo a mmopilego gomme a bo tsenya ka go Maria. Morwa yoo, yo e kilego ya ba morongwa yo matla, o ile a rongwa ke Modimo lefaseng gore e tle e be sehlabelo seo se tla dirago gore re hwetše bophelo bjo bo sa felego.—Mateo 20:28; Johane 3:16; 17:3.

Lega go le bjalo, go na le mo gontši moo re swanetšego go go tseba mabapi le sephiri se go feta go fo tseba gore Modimo o kgethile Jesu go ba Mmuši wa Mmušo wa Gagwe. Karolo ya sephiri se  sekgethwa ke ya gore ba bangwe, banna le basadi, ba tla ba le Jesu yo a tsošeditšwego bophelong legodimong. Ba tla buša le Jesu legodimong!—Baefeso 1:8-12.

A re ithute maina a ba bangwe bao ba tlago go buša le Jesu legodimong. Jesu o boditše baapostola ba gagwe ba botegago gore o ya go ba lokišetša madulo. (Johane 14:2, 3) Ka go lebelela Mangwalo a latelago, o tla bona maina a banna le basadi ba mmalwa bao ba tlago go buša le Jesu Mmušong wa Tatagwe.—Mateo10:2-4; Mareka 15:39-41; Johane 19:25.

Ka nako e telele, go be go sa tsebje gore ke batho ba bakae bao ba bego ba tla buša le Jesu legodimong e le karolo ya Mmušo wa gagwe. Eupša ga bjale re tseba palo ya bona. Na o a e tseba?— Beibele e re ke ba 144 000. Se le sona ke karolo ya sephiri se sekgethwa.—Kutollo 14:1, 4.

Na o a dumela gore “sephiri se sekgethwa sa mmušo wa Modimo” ke sephiri se se kgahlišago seo motho yo mongwe le yo mongwe a ka se tsebago?— Ge e ba go le bjalo, a re leke go ithuta tšohle mabapi le sona e le gore re ka hlalosetša batho ba bantši ka mo go ka kgonegago dilo tše.

^ ser. 3 Ge e ba o bala le ngwana, thaladi ke ya go go gopotša gore o khutše gomme o kgothaletše ngwana go ntšha sa mafahleng.